مرزا غالب

ہم کہاں کے دانا تھے ، کس ہنر میں یکتا تھے
بے سبب ہوا غالب دشمن آسماں اپنا
یہ فتنہ آدمی کی خانہ ویرانی کو کیا کم ہے
ہوئے تم دوست جس کے ، دشمن اس کا آسماں کیوں ہو
نویدِ امن ہے بیدادِ دوست جاں کے لیے
رہی نہ طرزِ ستم کوئی آسماں کے لیے
زمانہ عہد میں اس کے ہے محو آرائش
بنیں گے اور ستارے اب آسماں کے لیے

امام بخش ناسخ

رفعت کبھی کسی کی گوارا یہاں نہیں
جس سر زمیں کے ہم ہیں وہاں آسماں نہیں

انشاء اللہ خان انشا

یہ کس سے چاندنی میں ہم بہ زیر آسماں لپٹے
کہ باہم عرش پر مارے خوشی کے قدسیاں لپٹے

حیدر علی آتش

سرکش کی منزلت ہے سبک پیش خاکسار
وہ تمکنت زمیں کی کہاں آسماں میں ہے
وہ شب تھی کہ تھی روشنی جس میں دن کی
زمیں پر سے اک نور تا آسماں تھا
یہ کس رشک مسیحا کا مکاں ہے
زمیں یاں کی چہارم آسماں ہے
اللٰہ رے بے قراری دل ہجرِ یار میں
گاہے زمیں میں تھے تو گہے آسماں میں ہم
گردش نے اس کی سرمہ کیے اپنے استخواں
چکی ہمارے پیسنے کو آسماں ہوا
فکر بلند نے مری ایسا کیا بلند
آتشؔ زمین شعر سے پست آسماں ہوا
اہلِ زمیں سے صاف کہاں آسماں ہوا
کس روز برج ماہ میں فرش کتاں ہوا
روئے زمیں پہ ایسا میں بسمل تپاں ہوا
اڑ کر مرا لہو شفق آسماں ہوا
زمین چمن گل کھلاتی ہے کیا کیا
بدلتا ہے رنگِ آسماں کیسے کیسے
جہان و کارِ جہاں سے ہوں بے خبر میں مست
زمیں کدھر ہے کہاں آسماں نہیں معلوم

داغ دہلوی

گئے ٹھکرا کے مجھ کو اور پھر کہتے گئے یہ بھی
نصیبِ دشمناں تو پائمال آسماں کیوں ہو
دنیا میں آدمی کو مصیبت کہاں‌ نہیں
وہ کون سی زمیں ہے جہاں آسماں نہیں
تری آنکھ پھرتے ہی کیسا پھرا ہے
مری راہ پر آسماں آتے آتے
جس روز کچھ شریک ہوئی میری مشتِ خاک
اس روز سے زمیں پہ ستم آسماں کے ہیں
کچھ تازگی ہو لذتِ آزار کے لیے
ہر دم مجھے تلاش نئے آسماں کی ہے
وقت خرامِ ناز دکھا دو جدا جدا
یہ چال حشر کی یہ روش آسماں کی ہے
تلاش یار میں چھوڑی نہ سرزمیں کوئی
ہمارے پاؤں میں چکر ہے آسماں کی طرح
سمجھ کے کیجیے برباد میرا مشتِ غبار
یہ لے نہ آئے کوئی چکر آسماں کی طرح

شیخ ابراہیم ذوق

نہ کرتا ضبط میں نالہ تو پھر ایسا دھواں ہوتا
کہ نیچے آسماں کے اور پیدا آسماں ہوتا
نہ کرتا ضبط میں گریہ تو اے ذوقؔ اک گھڑی بھر میں
کٹورے کی طرح گھڑیال کے غرق آسماں ہوتا

مصحفی غلام ہمدانی

گر یہی آہ ہے تو دیکھو گے
رخنے کر دیں گے آسماں میں ہم
گر آنکھ ذرا بھی تو نے پھیری
تو گردش آسماں نہیں ہم
نکالی ہیں جو ہم نے اوج سخن سے
زمینیں وہ سب آسماں ہو گئی ہیں
تس پہ دشمن ہمارے جی کی ہوئی
کجی پیل آسماں کی چال
پھر گیا مجھ سے جو مزاج اس کا
گردش آسماں کو کیوں چھیڑا
گر ہم سے نہ ہو وہ دل ستاں ایک
کر دیجے زمیں و آسماں ایک

مصطفٰی خان شیفتہ

نہ خاکیوں سے تعلق نہ قدسیوں سے ربط
نہ ہم زمیں کے لیے ہیں نہ آسماں کے لیے
اک شب ہوا تھا جلوہ نما چرخ پر وہ ماہ
مدہوش ہیں ملائکۂِ آسماں ہنوز

مومن خان مومن

کچھ کچھ درست ضد سے تری ہو چلے ہیں وہ
یک چند اور کج روی اے آسماں نہ چھوڑ

میر مہدی مجروح

دعائے وصل جا اب تو اثر تک
کیے نالوں نے روزن آسماں میں
لطف پایا ہے خاکساری میں
ہوں زمیں گو کہ آسماں ہوں میں
عشق میں سو بلائیں لیں سر پر
اپنے حق میں خود آسماں ہوں میں
جب چلو ٹیٹر ہی کی چلتے ہو
میرے حق میں تو آسماں ہو تم

بیان میرٹھی

مرے خوں کے نشاں ہیں دھو چکے شرم
جبیں کو آستیں کو آسماں کو
خرام مہوشاں چکر میں لائے
زمانہ کو زمیں کو آسماں کو