مرزا غالب

بسکہ دشوار ہے ہر کام کا آساں ہونا
آدمی کو بھی میسر نہیں انساں ہونا

حیدر علی آتش

برق بے نور ہے اس رخ کی چمک کے آگے
عالم نور کا انساں نہ ہوا تھا سو ہوا
دل کی کدورتیں اگر انساں سے دور ہوں
سارے نفاق گبر و مسلماں سے دور ہوں
وحشتِ دل نے کیا ہے وہ بیاباں پیدا
سیکڑوں کوس نہیں صورت انساں پیدا
خوف نا فہمی مردم سے مجھے آتا ہے
گاؤ خر ہونے لگے صورت انساں پیدا
ہنگامہ حسن و عشق کا ہے گرم آج کل بہت
دیوانہ پری ہے جو انساں ہے ان دنوں

داغ دہلوی

کہتے ہیں جس کو حور وہ انساں تمہیں تو ہو
جاتی ہے جس پہ جان مری جاں تمہیں تو ہو

شیخ ابراہیم ذوق

جو کچھ کہ ہے دنیا میں وہ انساں کے لیے ہے
آراستہ یہ گھر اسی مہماں کے لیے ہے
گر خدا دیوے قناعت ماہ دوہفتہ کی طرح
دوڑے ساری کو کبھی آدھی نہ انساں چھوڑ کر

مصحفی غلام ہمدانی

عاشق تو ملیں گے تجھے انساں نہ ملے گا
مجھ سا تو کوئی بندۂِ فرماں نہ ملے گا

مومن خان مومن

آسیب چشم قہر پری طلعتاں نہیں
اے انس اک نظر کہ میں انساں نہیں رہا

باقی صدیقی

جو روح کو حیات دے ، دل کو سکون دے
یہ بھیڑ دے کے ایک وہ انساں خریدیے

عبدالحمید عدم

فقیہ و شیخ کے ذہنوں میں بت ہوں گے خداؤں کے
میں انساں ہوں مجھے تو صرف انساں یاد آتے ہیں

قمر جلالوی

سامان خاک آیا تھا انساں کے ساتھ ساتھ
صرف ایک روح تھی تنِ عریاں کے ساتھ ساتھ
تم میرا خوں چھپا تو رہے ہو خبر بھی ہے
دو دو فرشتے رہتے ہیں انساں کے ساتھ ساتھ

مجید امجد

دنیا اک دائم آباد محلہ
اس اینٹوں کے ابد میں سائے انساں

مصطفی زیدی

ادھر سے مدعی گزریں گے ایقان شریعت کے
نظر آ جائے شاید کوئی انساں دیکھتے رہنا

احسان دانش

جس کے دامن سے ہے وابستہ مرا ذوق حیات
وہ بھی کافر مرے معیار کا انساں نہ ہوا
جس کے مشرب میں محبت ہو محبت کا جواب
میری تقدیر میں ایسا کوئی انساں نہ ہوا

اختر شیرانی

پوچھتے منزل سلمیٰ کی خبر ہم جس سے
وادیِ نجد میں ایسا کوئی انساں نہ ملا

اسرار الحق مجاز

خون آدم پہ کوئی حرف نہ آنے پائے
جنہیں انساں نہیں کہتے انہیں انساں کر دیں

ظہیر کاشمیری

میں نے جب غور سے دیکھا تو وہ پتھر نکلا
ورنہ وہ حسنِ نظر آتا تھا انساں کی طرح

علی سردار جعفری

عقل کے نور سے دل کیجیے اپنا روشن
دل کی راہوں سے سوئے منزل انساں چلیے

ماجد صدیقی

قصۂ دہر کا عنواں ہونا
ہے میسر مجھے انساں ہونا

تلوک چند محروم

اسی سے اختیار و جبر کا مفہوم کھلتا ہے
جو ہونا چاہتا ہے کوئی انساں ہو نہیں سکتا
کچھ بری بات نہیں صاحب ایماں ہونا
اگر ایمان سے مطلوب ہو انساں ہونا

جوش ملیح آبادی

یہ ثابت کر دیا تجھ کو بنا کر دست قدرت نے
کہ ہو سکتی ہیں اتنی خوبیاں صورت میں انساں کی

سید ضمیر جعفری

کچھ ایسے مقامات بھی تھے راہِ وفا میں
محسوس یہ ہوتا تھا کہ انساں نہیں گزرے

سیماب اکبر آبادی

وسعتیں محدود ہیں ادراک انساں کے لیے
ورنہ ہر ذرہ ہے دنیا چشم عرفاں کے لیے
تمہیں کیوں مدِ نظر اب ہے خرابی اس کی
تم تو کہتے تھے کہ گھر ہے دلِ انساں میرا

شاد عظیم آبادی

سر میں سودائے خرد پاؤں میں زنجیر شکوک
بھید پائے گا نہ اس شکل سے انساں ان کا

شکیل بدایونی

ذوق گناہ و عزم پشیماں لیے ہوئے
کیا کیا ہنر ہیں حضرت انساں لیے ہوئے
کفر و خرد کو راس نہ آئے گی زندگی
جب تک جنوں ہے مشعل انساں لیے ہوئے
چلے تو ذرا دورِ جام محبت
فرشتے بھی تقلید انساں کریں گے

فانی بدایونی

برق دم لینے کو ٹھہرے تو رگِ جاں ہو جائے
فتنۂ حشر مجسم ہو تو انساں ہو جائے
شیوہ اپنا غم پرستی قبلہ اپنا خاک دل
روح غم کو پیکر خاکی میں انساں دیکھ کر
معنٰیِ صورت میں ہم نے تیری صورت دیکھ لی
تیری قدرت دیکھ لی انساں کو انساں دیکھ کر

احمد فراز

یوں ہی موسم کی ادا دیکھ کے یاد آیا ہے
کس قدر جلد بدل جاتے ہیں انساں جاناں

فراق گورکھپوری

جب خون ہو چکا دل ہستی‌ٔ اعتبار
کچھ درد بچ رہے جنہیں انساں بنا دیا