مرزا غالب

جمع کرتے ہو کیوں رقیبوں کو
اک تماشا ہوا، گلا نہ ہوا
نوازش ہائے بے جا دیکھتا ہوں
شکایت ہائے رنگیں کا گلا کیا
نفس موجِ محیطِ بیخودی ہے
تغافل ہائے ساقی کا گلا کیا
آپ نے مسنی الضر کہا ہے تو سہی
یہ بھی اے حضرتِ ایوب! گلا ہے تو سہی
شکوے کے نام سے بے مہر خفا ہوتا ہے
یہ بھی مت کہہ کہ جو کہیے تو گلا ہوتا ہے

داغ دہلوی

اس گلے کو گلہ نہیں کہتے
گر مزے کا گلا کرے کوئی

مصحفی غلام ہمدانی

کوئی زخم خوردہ ہے خار کا کوئی خوں طپیدہ بہار کا
ہے مرا ہی حوصلہ مصحفیؔ کہ کسی سے مجھ کو گلا نہیں
جب آپ ہم نے بتاں ترک آشنائی کی
کسی بھی طرح کا تم سے ہمیں گلا نہ رہا
آرسی سے نہ کرو کج نظری
اس کا تم سے وہ گلا رکھتی ہے
گر زباں اپنی ہو گویا تو مدام
طالعوں کا ہی گلا کیجیے بس

فیض احمد فیض

تیری چشم الم نواز کی خیر
دل میں کوئی گلا نہیں باقی
کچھ اپنے دل کی خو کا بھی شکرانہ چاہیے
سو بار ان کی خو کا گلا کر چکے ہیں ہم

باقی صدیقی

لو سلام سرِ رہ سے بھی گئے
اور جا جا کے گلا کیجے گا

جون ایلیا

کسی سے کوئی خفا بھی نہیں رہا اب تو
گلا کرو کہ گلا بھی نہیں رہا اب تو

احسان دانش

کس کس کا اعتماد وفا ہو گیا شکست
کس کس کو حسن سے ہے گلا دیکھتے چلو

ادا جعفری

کچھ لوگ شرمسار خدا جانے کیوں ہوئے
اپنے سوا ہمیں تو کسی سے گلا نہ تھا

بیخود بدایونی

میں جانتا ہوں آپ ہیں مست اپنے حال میں
بیخودؔ نہیں ہے آپ سے مطلق گلا مجھے
رقیبوں کا مجھ سے گلا ہو رہا ہے
یہ کیا کر رہے ہو یہ کیا ہو رہا ہے

جوش ملیح آبادی

میری دانش وری کے لوہے کو
تاب رخ سے گلا رہا ہے یہ کون

امیر مینائی

آنکھ کیا ہے ، موہنی ہے ، سحر ہے ، اعجاز ہے
اک نگاہِ لطف میں سارا گلا جاتا رہا
جب تلک تم تھے کشیدہ، دل تھا شکووں سے بھرا
تم گلے سے مل گئے ، سارا گلا جاتا رہا

قتیل شفائی

جو بھی غنچہ ترے ہونٹوں پہ کھلا کرتا ہے
وہ تری تنگی داماں کا گلا کرتا ہے
میں تو بیٹھا ہوں دبائے ہوئے طوفانوں کو
تو مرے دل کے دھڑکنے کا گلا کرتا ہے
کون کافر تجھے الزام تغافل دے گا
جو بھی کرتا ہے محبت سے گلا کرتا ہے

محبوب خزاں

چاہی تھی دل نے تجھ سے وفا کم بہت ہی کم
شاید اسی لیے ہے گلا کم بہت ہی کم