اس قدر مہر و وفا کیجیے بس
مصحفی غلام ہمدانی
مجھ سے اک بات کیا کیجیے بس
اس قدر مہر و وفا کیجیے بس
آفریں سامنے آنکھوں کے مری
یوں ہی تا دیر رہا کیجیے بس
دلِ بیمار ہوا اب چنگا
دوستو ترک دوا کیجیے بس
خون عاشق سے یہ پرہیز اسے
آشنائے کف پا کیجیے بس
شرم تا چند حیا بھی کب تک
منہ سے برقعے کو جدا کیجیے بس
گر زباں اپنی ہو گویا تو مدام
طالعوں کا ہی گلا کیجیے بس
تم میاں مصحفیؔ رخصت تو ہوئے
اب کھڑے کیوں ہو دعا کیجیے بس