مرزا غالب

اب جفا سے بھی ہیں محروم ہم اللہ اللہ
اس قدر دشمنِ اربابِ وفا ہو جانا
فروغِ شعلۂِ خس یک نفس ہے
ہوس کو پاسِ ناموسِ وفا کیا
غم سے مرتا ہوں کہ اتنا نہیں دنیا میں کوئی
کہ کرے تعزیتِ مہر و وفا میرے بعد
ظالم مرے گماں سے مجھے منفعل نہ چاہ
ہے ہے خدا نہ کردہ، تجھے بے وفا کہوں
جوں شمع ہم اک سوختہ سامانِ وفا ہیں
اور اس کے سواکچھ نہیں معلوم کہ کیا ہیں
سادہ پرکار ہیں خوباں غالب
ہم سے پیمانِ وفا باندھتے ہیں
غیر سے دیکھیے کیا خوب نباہی اس نے
نہ سہی ہم سے ، پر اس بت میں وفا ہے تو سہی
مجبوری و دعوائے گرفتاریِ الفت
دستِ تہِ سنگ آمدہ پیمانِ وفا ہے
ضد کی ہے اور بات مگر خو بری نہیں
بھولے سے اس نے سینکڑوں وعدے وفا کیے

بہادر شاہ ظفر

تجھ سے الفت نباہتا ہوں میں
با وفا ہوں کہ بے وفا کچھ ہوں
دل ہم نے دیا تھا تجھے امیدِ وفا پر
تم ہم سے نہیں کرتے وفا کچھ نہیں کرتے

حیدر علی آتش

یہ خلاف ہو گیا آسماں یہ ہوا زمانہ کی پھر گئی
کہیں گل کھلے بھی تو بوند سے کہیں حسن ہے تو وفا نہیں

داغ دہلوی

آرزو ہے وفا کرے کوئی
جی نہ چاہے تو کیا کرے کوئی
اس ادا سے وہ جفا کرتے ہیں
کوئی جانے کہ وفا کرتے ہیں
یوں وفا عہدِ وفا کرتے ہیں
آپ کیا کہتے ہیں کیا کرتے ہیں
تجھ کو بد عہد و بے وفا کہیے
ایسے جھوٹے کو اور کیا کہیے
ہوش جاتے رہے رقیبوں کے
داغؔ کو اور با وفا کہیے

شیخ ابراہیم ذوق

ہم پہ سو بار جفا ہو تو رکھو ایک نہ یاد
بھول کر بھی کبھی ہووے تو وفا یاد رہے

مصحفی غلام ہمدانی

غرض اس نباہ کے صدقے میں غرض ایسی چاہ کے صدقے میں
نہ ترا ہی جور و جفا گیا نہ مری ہی مہر و وفا گئی
اک نے پوچھا یہ مصحفیؔ سے بھلا
کیوں تو اے بے وفا نہیں ملتا
مجھ سے اک بات کیا کیجیے بس
اس قدر مہر و وفا کیجیے بس
تری بے وفائی کا شکوہ کریں کیا
خود اپنی ہی یاں بے وفا زندگی ہے
تو سمجھے نہ سمجھے ہمیں ساتھ تیرے
جو کرنی تھی اے بے وفا کر چکے ہم
پوچھ لیتا ہے تو اوروں سے مجھے
بارے اتنی تو وفا تجھ میں ہے
ملا دو دل کو اپنے دل سے میرے ایک ہو جاؤ
بدن کو وصل کر دو لذت مہر و وفا چکھو

مصطفٰی خان شیفتہ

کبھی مجھ پر عتابِ بے سبب کیوں
کبھی بے وجہ غیروں سے وفا کیا
جفا و جور کا اس سے گلہ کیا
جو پوچھے مہربانی کیا، وفا کیا
مطبوع یار کو ہے جفا اور جفا کو ہم
کہتی ہے بد عدو کو وفا اور وفا کو ہم
کرتے ہیں غلط یار سے اظہارِ وفا ہم
ثابت جو ہوا عشق، کجا یار کجا ہم
شکوہ جفا کا کیجے تو کہتے ہیں کیا کروں
تم سے وفا کروں کہ عدو سے وفا کروں
کب طالعِ خفتہ نے دیا خواب میں آنے
وعدہ بھی کیا وہ کہ وفا ہو نہیں سکتا
لازم ہے بے وفا تجھے اہلِ وفا سے ربط
کیسا ہے دیکھ عکسِ ادا کو ادا سے ربط
تیرے ستم سے ہے یہ دعا لب پہ دم بہ دم
یا رب نہ ہو کسی کو کسی بے وفا سے ربط

مومن خان مومن

تھے وعدے سے پھر آنے کے خوش یہ خبر نہ تھی
ہے اپنی زندگانی اسی بے وفا کے ساتھ
کب تک نبھائیے بت نا آشنا کے ساتھ
کیجے وفا کہاں تلک اس بے وفا کے ساتھ
جفا سے تھک گئے تو بھی نہ پوچھا
کہ تو نے کس توقع پر وفا کی
بے وفا کہنے کی شکایت ہے
تو بھی وعدہ وفا نہیں ہوتا
ہے یہ بندہ ہی بے وفا صاحب
غیر اور تم بھلے بھلا صاحب
مجھ پہ عاشق نہیں ہے کچھ ظالم
صبر آخر کرے وفا کب تک
آپ مجھ سے نباہیں گے سچ ہے
باوفا حسن و بے وفا ہے عشق

میر مہدی مجروح

ہے حق بطرف اس کے چاہے سو ستم کر لے
اس نے دلِ عاشق کو مجبورِ وفا جانا

فیض احمد فیض

اپنی مشقِ ستم سے ہاتھ نہ کھینچ
میں نہیں یا وفا نہیں باقی
قرضِ نگاہِ یار ادا کر چکے ہیں ہم
سب کچھ نثار راہِ وفا کر چکے ہیں ہم
جو طلب پہ عہدِ وفا کیا، تو وہ قدر رسمِ وفا گئی
سرِ عام جب ہوئے مدعی، تو ثوابِ صدق و وفا گیا
لو تم بھی گئے ہم نے تو سمجھا تھا کہ تم نے
باندھا تھا کوئی یاروں سے پیمانِ وفا اور
چاند سے ماند ستاروں نے کہا آخرِ شب
کون کرتا ہے وفا، عہدِ وفا آخرِ شب
ستم سکھلائے گا رسمِ وفا، ایسے نہیں ہوتا
صنم دکھلائیں گے راہِ خدا ایسے نہیں ہوتا

مرزا رفیع سودا

گر کیجیے انصاف تو کی زور وفا میں
خط آتے ہی سب چل گئے اب آپ ہیں یا میں
سوداؔ سے شخص کے تئیں آزردہ کیجیے
اے خود پرست حیف نہیں تو وفا پرست
جلے ہے شمع سے پروانہ اور میں تجھ سے
کہیں ہے مہر بھی جگ میں کہیں وفا بھی ہے

یگانہ چنگیزی

کیوں کسی سے وفا کرے کوئی
دل نہ مانے تو کیا کرے کوئی
تہ کا اندیشہ رہے گا پھر نہ ساحل کی ہوس
دل سے جب قطع امید بے وفا ہو جائے گی
آج ہو شاید کسی کو آتشِ غم کی خبر
شکر ہے اب استخواں بوئے وفا دینے لگے

باقی صدیقی

مسکرایا ہے زمانہ کیا کیا
کھا کے جب تیر وفا بیٹھے ہیں
حسرت راہِ وفا کیا دیکھیں
انے نقشِ کفِ پا کیا دیکھیں
مرگ و ہستی کی حدیں ملنے لگیں
بات چل نکلی وفا سے تیری

جون ایلیا

دل نے وفا کے نام پر کارِ وفا نہیں کیا
خود کو ہلاک کر لیا خود کو فدا نہیں کیا
شکست ذات کا اقرار اور کیا ہو گا
کہ ادعائے وفا بھی نہیں رہا اب تو

جگر مراد آبادی

دنیا کے ستم یاد نہ اپنی ہی وفا یاد
اب مجھ کو نہیں کچھ بھی محبت کے سوا یاد
میرے عرضِ غم پہ وہ کہنا کسی کا ہائے ہائے
شکوۂ غم شیوۂ اہلِ وفا ہوتا نہیں
تعجب کیا اگر رسمِ وفا یوں بھی ہے اور یوں بھی
کہ حسن و عشق کا ہر مسئلہ یوں بھی ہے اور یوں بھی

خواجہ میر درد

کہہ بیٹھیو نہ دردؔ کہ اہلِ وفا ہوں میں
اس بے وفا کے آگے جو ذکر وفا چلے

عبدالحمید عدم

آپ نے مجھ کو خوب پہچانا
واقعی سخت بے وفا ہوں میں
کیا یہ ثبوت کم نہیں میری وفاؤں کا
میں آپ کہہ رہا ہوں بہت بے وفا ہوں میں
جب سے چلی ہے آدم و یزداں کی داستاں
ہر با وفا کا ربط ہے اک بے وفا کے ساتھ
بے وفا میں نے محبت سے کہا تھا آپ کو
لیجیے اب با وفا تسلیم کر لیتا ہوں میں

قمر جلالوی

بس اتنا کہہ دو کہ دلائیں تمھیں کیا یاد
جب تم یہ کہو ہم کو نہیں عہدِ وفا یاد
کھا اس کی قسم جو نہ تجھے دیکھ چکا ہو
تیرے تو فرشتوں سے بھی وعدہ نہ وفا ہو
منصور سے کہتی ہے یہی دارِ محبت
اس کی یہ سزا ہے جو گنہگارِ وفا ہو

عرفان صدیقی

ہمیں دنیا جو دے گی ہم وہیں لوٹائیں گے اس کو
گنہ بن جائے گی رسمِ وفا آہستہ آہستہ
کچھ نہ ملے تو کوچہ گرد، لوٹ کے گھر تو آ سکیں
پاؤں میں کوئی حلقۂ عہدِ وفا بھی چاہیے
کار آفریں کے دستِ بریدہ کی دسترس
اک فرض تھا کہ عرضِ وفا کے سوا نہ تھا
ایک ضد تھی مرا پندارِ وفا کچھ بھی نہ تھا
ورنہ ٹوٹے ہوئے رشتوں میں بچا کچھ بھی نہ تھا
کیسے کیسے سرفروش اس مہرباں کے ساتھ تھے
ایک ایک آخر سر راہِ وفا مارا گیا
میں کوئی گوشہ گزیں‘ ترکِ وفا کا نوحہ گر
دیر تک تحریر تعویذ وفا کرتا تھا رات
آج تک اہلِ ستم ہی سے شکایت تھی مجھے
سو مرے باب میں ہیں اہلِ وفا بھی خاموش
ہم بندگاں تو نذرِ وفا ہونے والے ہیں
پھر آپ لوگ کس کے خدا ہونے والے ہیں
یہ مت سمجھ کہ ترے قتل کا خیال نہ تھا
نکل چکی تھی مگر بے وفا چلی ہی نہیں
ہم تعارف ہی سے دیوانے ہوئے جاتے ہیں
اور ابھی مرحلۂ کارِ وفا رکھا ہے
گل کر دیے ہیں دستِ جفا نے جہاں چراغ
ان راستوں میں شمعِ وفا ان کے ساتھ ہے

الطاف حسین حالی

جانتے اپنے سوا سب کو ہیں بے مہر و وفا
اپنے میں گر شمۂ مہر و وفا پاتے ہیں ہم

رئیس فروغؔ

ایک سائے میں ٹھہر کر ہم بھی
کچھ دنوں اہلِ وفا کہلائے

احسان دانش

مل مل کے دوستوں نے وہ دی ہے دغا مجھے
اب خود پہ بھی نہیں ہے گمان وفا مجھے
اے کھنچنے والے دیکھ مری بے پناہیاں
آتی ہے دشمنوں سے بھی بوئے وفا مجھے
پھر بات بات میں ہے لچک التفات کی
کیا پھر دکھاؤ گے کوئی خواب وفا مجھے
یہ روز تجدید عہد الفت یہ روز پیمان دل نوازی
ہزار تسلیم کر رہا ہوں مگر یقین وفا نہیں ہے

اختر شیرانی

آشنا ہو کر تغافل آشنا کیوں ہو گئے
باوفا تھے تم تو آخر بے وفا کیوں ہو گئے
ان وفاداری کے وعدوں کو الٰہی کیا ہوا
وہ وفائیں کرنے والے بے وفا کیوں ہو گئے
کس طرح دل سے بھلا بیٹھے ہماری یاد کو
اس طرح پردیس جا کر بے وفا کیوں ہو گئے

ادا جعفری

کیا کہتے کہ ہونٹوں پہ بس اک حرفِ وفا تھا
کیا کیجیے ہر سانس جو تعزیر وفا تھی
گھر کا رستہ بھی ملا تھا شاید
راہ میں سنگ وفا تھا شاید
سنا ہے دل بھی نگر تھا رسا بسا بھی تھا
جلا تو آنچ بھی اہلِ وفا نہیں آئی

بہزاد لکھنوی

ہزار ٹھوکریں کھائیں ہزار سو بہزادؔ
جہانِ حسن میں کوئی بھی با وفا نہ ملا

بشیر بدر

سر جھکاؤ گے تو پتھر دیوتا ہو جائے گا
اتنا مت چاہو اسے وہ بے وفا ہو جائے گا
انسان اپنے آپ میں مجبور ہے بہت
کوئی نہیں ہے بے وفا افسوس مت کرو

زہرا نگاہ

صد حیف اس کے ہاتھ ہے ہر زخم کا رفو
دامن میں جس کے ایک بھی تار وفا نہیں

سدرشن فاکر

یہ سکھایا ہے دوستی نے ہمیں
دوست بن کر کبھی وفا نہ کرو

ظہیر کاشمیری

اب حسن کے مزاج سے واقف ہوا ہوں میں
اک بھول تھی جو تم سے کہا تھا وفا کرو

علی سردار جعفری

تجھے کس نظر سے دیکھے یہ نگاہ درد آگیں
جو دعائیں دے رہی ہے تری چشم بے وفا کو

احمد راہی

شبنمستان گل نغمہ میں
نکہت‌ صبح وفا ہیں یارو

اختر امام رضوی

اب تمہارے لیے خود اپنا تماشائی ہوں
دوستو داد وفا کیوں نہیں دیتے مجھ کو

تلوک چند محروم

یہ گل رخان دہر وہ گل ہیں کہ نام کو
جن میں نہ خوئے مہر نہ بوئے وفا ملے
انہیں اپنی جفاؤں پر پشیمانی ہوئی آخر
شریک ماتم‌ اہلِ وفا ہونے کا وقت آیا

جوش ملیح آبادی

لے دے کے رہ گیا ہے یہی ایک آسرا
ایسا کبھی نہ ہو کہ وہ ترک وفا کرے

حسرت موہانی

نثار ان پر ہوئے اچھے رہے ہم
تقاضا تھا یہی خوئے وفا کا
کیا کام انہیں پرسش ارباب وفا سے
مرتا ہے تو مر جائے کوئی ان کی بلا سے
مرا عشق بھی خود غرض ہو چلا ہے
ترے حسن کو بے وفا کہتے کہتے
جی میں آتا ہے کہ اس شوخ تغافل کیش سے
اب نہ ملیے پھر کبھی اور بے وفا ہو جائیے
بھول کر بھی اس ستم پرور کی پھر آئے نہ یاد
اس قدر بیگانۂ عہدِ وفا ہو جائیے
شوق ان کا سو مٹ چکا حسرتؔ
کیا کریں ہم اگر وفا نہ کریں
انہیں رنج اب کیوں ہوا ہم تو خوش ہیں
کہ مر کر شہیدِ وفا ہو گئے ہم

حفیظ جالندھری

مجھ سے کیا ہو سکا وفا کے سوا
مجھ کو ملتا بھی کیا سزا کے سوا
کوئی پرساں نہیں پیرِ مغاں کا
فقط میری وفا ہے اور میں ہوں

خاطر غزنوی

جفائیں بخش کے مجھ کو مری وفا مانگیں
وہ میرے قتل کا مجھ ہی سے خوں بہا مانگیں

سید ضمیر جعفری

بڑی حیرت سے ارباب وفا کو دیکھتا ہوں میں
خطا کو دیکھتا ہوں اور سزا کو دیکھتا ہوں میں

سیف الدین سیف

چھپ چھپ کے اب نہ دیکھ وفا کے مقام سے
گزرا ہمارا درد دوا کے مقام سے

سیماب اکبر آبادی

یا زخمِ دل کو چھیل کے سینے سے پھینک دے
یا اعتراف کر کہ نشان وفا ملا
بقدرِ شوق اقرارِ وفا کیا
ہمارے شوق کی ہے انتہا کیا
تقدیر میں اضافۂ سوز وفا ہوا
دل میں جو تم نے آگ لگا دی تو کیا ہوا
مجھے فکر و سر وفا ہے ہنوز
بادۂ عشق نارسا ہے ہنوز

شاد عظیم آبادی

اپنی ہیں جیسی خصلتیں مجھ پہ بھی ہے گماں وہی
یہ نہیں گر سبب تو پھر ترکِ وفا کی وجہ کیا
روح و جسد کا سابقہ کتنے دنوں کا ہے بھلا
دونوں کی جنس دو ہے جب ان میں وفا کی وجہ کیا
اے بت جفا سے اپنی لیا کر وفا کا کام
بندوں کے کام آ کہ یہی ہے خدا کا کام

شان الحق حقی

کسی پہ منت بے جا نہیں کہ سچ یہ ہے
سنور گئے دل و جاں شیوۂ وفا سے مرے

شکیل بدایونی

امید عہدِ وفا اور ان بتوں سے شکیلؔ
جو بھول کر بھی کسی سے وفا نہیں کرتے
دشمنوں کو ستم کا خوف نہیں
دوستوں کی وفا سے ڈرتے ہیں
یہ دیکھنا ہے کہ بعد ترکِ تعلقات اے شکیلؔ کب تک
نہ کوئی ہم پر جفا کرے گا نہ ہم کسی سے وفا کریں گے
بہار آئی کسی کا سامنا کرنے کا وقت آیا
سنبھل اے دل کہ اظہارِ وفا کرنے کا وقت آیا
انہیں آمادۂ مہر و وفا کرنے کا وقت آیا
بڑی مدت میں عرضِ مدعا کرنے کا وقت آیا
ہر چند دل کو ترکِ محبت کا تھا خیال
لیکن کسی کا عہدِ وفا یاد آ گیا
یوں تو ہزار نقش ہیں صفحۂ کائنات پر
اس کا پتہ نہیں مگر نقشِ وفا کو کیا ہوا

عزیز حامد مدنی

لطفِ سخن یہی تھا کہ خود تم بھی کچھ کہو
یہ وہم ہے کہ اب کوئی گوش وفا نہیں

فانی بدایونی

وہ تم کہ تم نے جفا کی تو کچھ برا نہ کیا
وہ میں کہ ذکر کے قابل نہیں وفا میری
اب ہوئی زمانہ میں شیوۂ وفا کی قدر
عالم آشنا ہے وہ دشمن وفا ہو کر
وفا چاہتے ہیں وفا چاہتا ہوں
وہ کیا چاہتے ہیں میں کیا چاہتا ہوں
مری وفا کے سوا غایت جفا کیوں ہو
تری جفا کے سوا حاصل وفا معلوم
کی وفا یار سے ایک ایک جفا کے بدلے
ہم نے گن گن کے لیے خونِ وفا کے بدلے
اب خیر سے ان کی بزم کا اتنا رنگ تو بدلا میرے بعد
جب نام مرا آ جاتا ہے کچھ ذکر وفا ہو جاتا ہے

اختر ہوشیارپوری

وہ میری زندگی ہے مگر زندگی کی طرح
مجھ سے خفا نہیں ہے کہ وہ بے وفا نہیں
مٹی سے کھیلتا ہوا رزق ہوا ہوا
اخترؔ اب اور شرح وفا کیا کرے کوئی
ہونٹوں پہ قرض حرف وفا عمر بھر رہا
مقروض تھا سو چپ کی صدا عمر بھر رہا
یہ کہیں عمر گزشتہ تو نہیں تم تو نہیں
کوئی پھرتا ہے سر شہر وفا آوارہ
کہیں گرتی ہوئی دیواریں کہیں جھکتی چھتیں
آپ کہتے ہیں تو یہ قصر وفا ہی ہوگا

افضل منہاس

عطر میں کپڑے بسا کر مطمئن ہے کس لیے
با وفا ہو جا کہ یوں بوئے وفا بھی آئے گی
ہر ایک چیز یہاں کاغذی لباس میں ہے
کوئی جگہ نہیں ملتی گل وفا کے لیے

اکبر حمیدی

جل کر گرا ہوں سوکھے شجر سے اڑا نہیں
میں نے وہی کیا جو تقاضا وفا کا تھا
ایسے حالات میں اک روز نہ جی سکتے تھے
ہم کو زندہ ترے پیمان وفا نے رکھا

احمد فراز

پھر کوئی ہاتھ ہے دل پر جیسے
پھر ترا عہدِ وفا یاد آیا
مجھے وفا کی طلب ہے مگر ہر اک سے نہیں
کوئی ملے مگر اس یار بے وفا کی طرح
آ کہ اب تسلیم کر لیں تو نہیں تو میں سہی
کون مانے گا کہ ہم میں بے وفا کوئی نہیں
یہ قربتیں ہی تو وجہ فراق ٹھہری ہیں
بہت عزیز ہیں یاران بے وفا مجھ کو
تو بھی نادم ہے زمانے سے فراز
وہ بھی نا خوش ہیں وفا سے تیری
وہ زندگی ہو کہ دنیا فرازؔ کیا کیجے
کہ جس سے عشق کرو بے وفا نکلتی ہے
سو دوریوں پہ بھی مرے دل سے جدا نہ تھی
تو میری زندگی تھی مگر بے وفا نہ تھی
پیام آئے ہیں اس یار بے وفا کے مجھے
جسے قرار نہ آیا کہیں بھلا کے مجھے
گلہ فضول تھا عہدِ وفا کے ہوتے ہوئے
سو چپ رہا ستمِ ناروا کے ہوتے ہوئے
شہرِ محبت، ہجر کا موسم، عہدِ وفا اور میں
تو تو اس بستی سے خوش خوش چلا گیا، اور میں؟
کل جب رکے گا بازوئے قاتل تو دیکھنا
اے اہلِ شہر تم تھے شہیدِ وفا کہ میں
سلسلے جو وفا کے رکھتے ہیں
حوصلے انتہا کے رکھتے ہیں
اس سے پہلے کہ بے وفا ہو جائیں
کیوں نہ اے دوست ہم جدا ہو جائیں
کہا تھا کس نے کہ عہدِ وفا کرو اس سے
جو یوں کیا ہے تو پھر کیوں گلہ کرو اس سے
ہر اک سے کون محبت نباہ سکتا ہے
سو ہم نے دوستی یاری تو کی، وفا نہیں کی
غیرتِ عشق سلامت تھی انا زندہ تھی
وہ بھی دن تھے کہ رہ و رسمِ وفا زندہ تھی
غلط ہے جو سنا پر آزما کر
تجھے اے بے وفا دیکھا نہ جائے

امیر مینائی

جفا دیکھو جنازے پر مرے آئے تو فرمایا
کہو تم بے وفا ٹھہرے کہ اب ہم بے وفا ٹھہرے
جب یار ہوا جفا کے قابل
تب ہم نہ رہے وفا کے قابل

شاذ تمکنت

میں روز مرتا ہوں اس انتظار کے صدقے
برا نہ مان اگر زندگی وفا نہ کرے
اتنی تہذیب رہ و رسم تو باقی تھی کہ وہ
لاکھ رنجش سہی وعدہ تو وفا کرتے تھے
جانے کیا قیمت ارباب وفا ٹھہرے گی
میں اگر عرض کروں گا تو خطا ٹھہرے گی

فراق گورکھپوری

اب کمی کیا ہے ترے بے سر و سامانوں کو
کچھ نہ تھا تیری قسم ترکِ وفا سے پہلے
ہم انہیں پا کے فراقؔ اور بھی کچھ کھوئے گئے
یہ تکلف تو نہ تھے عہدِ وفا سے پہلے

قتیل شفائی

رہے گا ساتھ ترا پیار زندگی بن کر
یہ اور بات مری زندگی وفا نہ کرے
ہم دیا کرتے تھے اغیار کو طعنہ جن کا
اب تو ہم کو بھی وہ آداب وفا یاد نہیں
خلوص کو جو خوشامدوں میں شمار کر لیں
تم ایسے لوگوں کو تحفتاً بھی وفا نہ دینا
پہلے تو نوازا گیا میں خلعت غم سے
پھر شہریت ملک وفا دی گئی مجھ کو
خود کو فریب دو کہ نہ ہو تلخ زندگی
ہر سنگ دل کو جانِ وفا کہہ لیا کرو
ستم کے بعد کرم کی ادا بھی خوب رہی
جفا تو خیر جفا تھی وفا بھی خوب رہی

کلیم عاجز

وہ ستم نہ ڈھائے تو کیا کرے اسے کیا خبر کہ وفا ہے کیا؟
تو اسی کو پیار کرے ہے کیوں یہ کلیمؔ تجھ کو ہوا ہے کیا؟
ہم گدایان محبت کا یہی سب کچھ ہے
گرچہ دنیا یہی کہتی ہے وفا کچھ بھی نہیں
کرتے رہیں گے تم سے محبت بھی وفا بھی
گو تم کو محبت نہ وفا یاد رہے گی

محبوب خزاں

چاہی تھی دل نے تجھ سے وفا کم بہت ہی کم
شاید اسی لیے ہے گلا کم بہت ہی کم

مجروح سلطان پوری

یہی ہے جی میں کہ وہ رفتۂ تغافل و ناز
کہیں ملے تو وہی قصۂ وفا کہیے

ناصر کاظمی

موت آرائشِ ہستی کے لیے
خندۂ زخمِ وفا چاہتی ہے
کیا گزرتی ہے کسی کے دل پر
تو بھی اے جانِ وفا غور سے سن
عشق کو حسن سے خالی نہ سمجھ
نالۂ اہلِ وفا غور سے سن
رونا آتا ہے ہمیں بھی لیکن
اس میں توہینِ وفا ہوتی ہے
منظر زخمِ وفا کس کو دکھائیں
شہر میں قحطِ وفا ہے اب کے
زندگی بھر وفا ہمیں سے ہوئی
سچ ہے یارو خطا ہمیں سے ہوئی
غیرتِ عشق کو قبول نہیں
کہ تجھے بے وفا کہے کوئی