مرزا غالب

عشرت قطرہ ہے دریا میں فنا ہو جانا
درد کا حد سے گزرنا ہے دوا ہو جانا
درد منت کشِ دوا نہ ہوا
میں نہ اچھا ہوا، برا نہ ہوا
عشق سے طبیعت نے زیست کا مزا پایا
درد کی دوا پائی، درد بے دوا پایا
دوست ہی کوئی نہیں ہے ، جو کرے چارہ گری
نہ سہی، لیک تمنائے دوا ہے تو سہی
ابنِ مریم ہوا کرے کوئی
میرے دکھ کی دوا کرے کوئی
درد ہو دل میں تو دوا کیجے
دل ہی جب درد ہو تو کیا کیجے
کہیں حقیقت جانکاہی مرض لکھیے
کہیں مصیبتِ نا سازی دوا کہیے

امام بخش ناسخ

ہم ہیں بیمارِ محبت یہ دعا مانگتے ہیں
مثل اکسیر نہ دنیا میں دوا پیدا ہو

بہادر شاہ ظفر

طبیب عشق کی دکاں میں ڈھونڈتے پھرتے
یہ دردمند محبت تری دوا کے لیے
مرگ ہی صحت ہے اس کی مرگ ہی اس کا علاج
عشق کا بیمار کیا جانے دوا کیا چیز ہے
اپنے مرض غم کا حکیم اور کوئی ہے
ہم اور طبیبوں کی دوا کچھ نہیں کرتے

حیدر علی آتش

مرض جدائی یار نے یہ بگاڑ دی ہے ہماری خو
کہ موافق اپنے مزاج کے نظر آتی کوئی دوا نہیں
چلیں گو کہ سیکڑوں آندھیاں جلیں گرچہ لاکھ گھر اے فلک
بھڑک اٹھے آتشؔ طور پھر کوئی اس طرح کی دوا نہیں
خدا نے دردِ محبت عطا کیا ہے جسے
اسے توجہ خاطر نہیں دوا کی طرف
عناب لب کا اپنے مزا کچھ نہ پوچھئے
کس درد کے ہیں آپ دوا کچھ نہ پوچھئے

داغ دہلوی

گر مرض ہو دوا کرے کوئی
مرنے والے کا کیا کرے کوئی

شیخ ابراہیم ذوق

نہ سمجھو دشت شفاخانۂِ جنوں ہے یہ
جو خاک سی بھی پڑے پھانکنی دوا سمجھو

مصحفی غلام ہمدانی

مرض اک جہاں سے نرالا تھا مری جان تیرے مریض کا
نہ ہوا کسی سے علاج جب اجل اس کی کرنے دوا گئی
کیا دخل کسی سے مرض عشق شفا ہو
ممکن ہے کہ اس درد کی دنیا میں دوا ہو
ہمیشہ جس سے پہنچتا رہے تھا دل کو الم
ہزار شکر کہ وہ درد بے دوا نہ رہا
دلِ بیمار ہوا اب چنگا
دوستو ترک دوا کیجیے بس
اجل کے سوا اس کی دارو نہیں کچھ
عجب درد دور از دوا زندگی ہے
نہیں پڑھتا مرا نسخہ عطار
بسکہ مصروف دوا بندی ہے
دھڑکے ہے بے طرح سے یہ پہلو میں رات دن
ڈرتا ہوں زخمِ دل کی نہ جاوے دوا سرک

مصطفٰی خان شیفتہ

درماں مریضِ غم کا ترے کچھ نہ ہو سکا
چھیڑے ہے چارہ گر کو دوا اور دوا کو ہم
اے چارہ ساز لطف! کہ تو چارہ گر نہیں
بس اے طبیب رحم! کہ دل کی دوا کروں

مومن خان مومن

وصل میں احتمال شادی مرگ
چارہ گر درد بے دوا ہے عشق

فیض احمد فیض

بے دم ہوئے بیمار دوا کیوں نہیں دیتے
تم اچھے مسیحا ہو شفا کیوں نہیں دیتے

میر انیس

تپ دروں غمِ فرقت ورم پیادہ روی
مرض تو اتنے ہیں اور کچھ دوا نہیں رکھتے

یگانہ چنگیزی

نہ دوا چاہیے مجھے نہ دعا
کاش اپنی دوا کرے کوئی
مفلسی میں مزاج شاہانہ
کس مرض کی دوا کرے کوئی
درد ہو تو دوا بھی ممکن ہے
وہم کی کیا دوا کرے کوئی
چارہ سازو مجھ سے رسوا جاں بلب بیمار کو
زہر دینا چاہیے تھا تم دوا دینے لگے

باقی صدیقی

دل بنا، دوا ہوا
درد کیا سے کیا ہوا
اس کے غم کا علاج کیا باقیؔ
جو محبت ہی کو دوا سمجھے

جون ایلیا

ہم نہ جیتے ہیں اور نہ مرتے ہیں
درد بھیجو نہ تم دوا بھیجو

جگر مراد آبادی

اسی امید پر ہم طالبان درد جیتے ہیں
خوشا درد دے کہ تیرا اور دردِ لا دوا ہو گا

سراج الدین ظفر

عشق کو کائنات کا مقصد و مدعا سمجھ
پھر ترا ظرف ہے اسے درد سمجھ دوا سمجھ

قمر جلالوی

جب تک رہا بیمار میں دم تم کو کیا یاد
تھی اور کسے دردِ محبت کی دوا یاد
اللٰہ رے او دشمن اظہارِ محبت
وہ درد دیا ہے جو کسی سے نہ دوا ہو

مجید امجد

بنے یہ زہر ہی وجہِ شفا، جو تو چاہے
خرید لوں میں یہ نقلی دوا، جو تو چاہے

الطاف حسین حالی

کر کے بیمار دی دوا تو نے
جان سے پہلے دل لیا تو نے
دردِ دل کو دوا سے کیا مطلب
کیمیا کو طلا سے کیا مطلب
ہو اگر مقصد میں ناکامی تو کر سکتے ہیں صبر
درد خودکامی کو لیکن بے دوا پاتے ہیں ہم
دل کو درد آشنا کیا تو نے
دردِ دل کو دوا کیا تو نے
جب ملی کام جاں کو لذتِ درد
درد کو بے دوا کیا تو نے

احسان دانش

سوز جنوں کو دل کی غذا کر دیا گیا
اک زہر جاں طلب کو دوا کر دیا گیا

اختر شیرانی

دل میں لیتا ہے چٹکیاں کوئی
ہائے اس درد کی دوا کیا ہے

بہزاد لکھنوی

اس نگاہِ ناز نے بہزادؔ مجھ کو کھو دیا
جس نگاہِ ناز کو اپنی دوا سمجھا تھا میں

بشیر بدر

میں خدا کا نام لے کر پی رہا ہوں دوستو
زہر بھی اس میں اگر ہوگا دوا ہو جائے گا

بیان میرٹھی

یہ میں کہوں گا فلک پہ جا کر زمیں سے آیا ہوں تنگ آ کر
جو اے مسیحا تو ہے مسیحا تو کچھ مرے درد کی دوا کر

بیخود بدایونی

یہ درد دل ہی زیست کا باعث ہے چارہ گر
مر جاؤں گا جو آئی موافق دوا مجھے

سدرشن فاکر

فاصلے عمر کے کچھ اور بڑھا دیتی ہے
جانے کیوں لوگ اسے پھر بھی دوا کہتے ہیں
میرے دکھ کی کوئی دوا نہ کرو
مجھ کو مجھ سے ابھی جدا نہ کرو
زہر پینے کی تو عادت تھی زمانے والو
اب کوئی اور دوا دو کہ میں زندہ ہوں ابھی
دنیا کی تمنا تھی کبھی ہم کو بھی فاکرؔ
اب زخمِ تمنا کی دوا ڈھونڈ رہے ہیں

حسرت موہانی

کہتے ہیں اہلِ جہاں دردِ محبت جس کو
نام اسی کا دلِ مضطر نے دوا رکھا ہے
میرے غم کی ہوئی انہیں بھی خبر
اب تو یہ دردِ لا دوا نہ رہا
کافی ہے ان کے پائے حنابستہ کا خیال
ہاتھ آئی خوب سوزِ جگر کی دوا مجھے
لذتِ درد نہ کیوں اہلِ ہوس پر ہو حرام
کہ وہ کم بخت طلب گار دوا ہوتے ہیں
تشخیص طبیباں پہ ہنسی آتی ہے حسرتؔ
یہ دردِ جگر ہے کہ دوا میرے لیے ہے

حفیظ جالندھری

اے دوست مٹ گیا ہوں فنا ہو گیا ہوں میں
اس دور دوستی کی دوا ہو گیا ہوں میں
واعظ کی اب نہ مان اگر جان ہے عزیز
اس دور میں یہ چیز بہ طور اک دوا کے پی

سیف الدین سیف

چھپ چھپ کے اب نہ دیکھ وفا کے مقام سے
گزرا ہمارا درد دوا کے مقام سے

شکیل بدایونی

کہاں جام غم کی تلخی کہاں زندگی کا درماں
مجھے وہ دوا ملی ہے جو مری دوا نہیں ہے
جینے والے قضا سے ڈرتے ہیں
زہر پی کر دوا سے ڈرتے ہیں

فانی بدایونی

دبی زباں سے مرا حال چارہ ساز نہ کہہ
بس اب تو زہر ہی دے زہر میں دوا نہ ملا
کی قضائے مبرم نے زندگی کی غم خواری
درد کی دوا پہنچی درد بے دوا ہو کر
عشق اللہ بچائے وہ مرض ہے فانیؔ
زہر بیمار کو دیتے ہیں دوا کے بدلے

افضل منہاس

تڑپ رہا تھا میں جس دردِ لا دوا کے لیے
وہ مل گیا ہے مگر چھین لے خدا کے لیے

امیر مینائی

نہ تڑپا چارہ گر کے سامنے اے درد یوں مجھ کو
کہیں ایسا نہ ہو یہ بھی تقاضائے دوا ٹھہرے
آئے مجھے دیکھنے اطبا
جب میں نہ رہا دوا کے قابل

فراق گورکھپوری

مجھ کو مارا ہے ہر اک درد و دوا سے پہلے
دی سزا عشق نے ہر جرم و خطا سے پہلے

کیف بھوپالی

بیمارِ محبت کی دوا ہے کہ نہیں ہے
میرے کسی پہلو میں قضا ہے کہ نہیں ہے

مجروح سلطان پوری

ہیں زمانے میں عجب چیز محبت والے
درد خود بنتے ہیں خود اپنی دوا ہوتے ہیں

ناصر کاظمی

کر دیا آج زمانے نے انہیں بھی مجبور
کبھی یہ لوگ مرے دکھ کی دوا کرتے تھے
اس نگری کے کچھ لوگوں نے
دکھ کا نام دوا رکھا ہے