کس درد کے ہیں آپ دوا کچھ نہ پوچھئے
حیدر علی آتش
عناب لب کا اپنے مزا کچھ نہ پوچھئے
کس درد کے ہیں آپ دوا کچھ نہ پوچھئے
ناز و نیاز عاشق و معشوق کیا کہوں
عجز و غرور شاہ و گدا کچھ نہ پوچھئے
خوشبو سے ہو رہا ہے معطر دماغ جان
چلتی ہے کس طرف کی ہوا کچھ نہ پوچھئے
کیا کیا نگہ پھسلتی ہے رخسارِ یار پر
کیسا یہ آئنہ ہے صفا کچھ نہ پوچھئے
جامہ سے باہر اپنے جو ہوں میں عجب نہیں
کھولے ہیں کس کے بندِ قبا کچھ نہ پوچھئے
آئینہ لے کے کیجیے اتنا مشاہدہ
ہم سے سلوک شرم و حیا کچھ نہ پوچھئے
اللہ نے کیا ہے کسے بادشاہِ حسن
سر پر ہے کس کے ظلِ ہما کچھ نہ پوچھئے
رنگیں کیے ہیں یار نے جیسے کہ دست و پا
کیا رنگ لا رہی ہے حنا کچھ نہ پوچھئے
ناگفتنی ہے عشقِ بتاں کا معاملہ
ہر حال میں ہے شکرِ خدا کچھ نہ پوچھئے
کیا شے ہے وہ کمر جو گزرتا ہے یہ خیال
آتی ہے غیب سے یہ صدا کچھ نہ پوچھئے
کوتاہ خال روئے منور ہے کس قدر
کتنی ہے زلفِ یار رسا کچھ نہ پوچھئے
آتشؔ گناہ عشق کی تعزیر کیا کہوں
مشفق جو کچھ ہے اس کی سزا کچھ نہ پوچھئے
مفعول فاعلات مفاعیل فاعِلن
مضارع مثمن اخرب مکفوف محذوف