مرزا غالب

نہ تھا کچھ تو خدا تھا، کچھ نہ ہوتا تو خدا ہوتا
ڈبویا مجھ کو ہونے نے ، نہ ہوتا میں تو کیا ہوتا
آتا ہے داغ حسرتِ دل کا شمار یاد
مجھ سے مرے گنہ کا حساب ، اے خدا! نہ مانگ
دیکھیے لاتی ہے اس شوخ کی نخوت کیا رنگ
اس کی ہر بات پہ ہم ’نامِ خدا‘ کہتے ہیں
تم ہو بت، پھر تمھیں پندارِ خدائی کیوں ہے ؟
تم خداوند ہی کہلاؤ، خدا اور سہی
بک رہا ہوں جنوں میں کیا کیا کچھ
کچھ نہ سمجھے خدا کرے کوئی
ان بتوں کو خدا سے کیا مطلب
توبہ توبہ خدا خدا کیجے
بیگانگی خلق سے بیدل نہ ہو غالب
کوئی نہیں تیرا، تو مری جان، خدا ہے
اسدؔ ان ساری تشبیہوں کو رد کر کے یہ کہتا ہے
سویدا اس کو سمجھے اس کو ہم نورِ خدا سمجھے

امام بخش ناسخ

کیوں کر کہوں عارف خدا ہوں
آگاہ نہیں کہ آپ کیا ہوں
منہ ان کا نہیں ہے شکر ورنہ
ہر بت کہتا کہ میں خدا ہوں
کہہ رہا ہے جرس قلب بآواز بلند
گم ہو رہبر تو ابھی راہِ خدا پیدا ہو
یاں کچھ اسباب کے ہم بندے ہی محتاج نہیں
نہ زباں ہو تو کہاں نامِ خدا پیدا ہو
یہی کہتا ہے جلوہ میرے بت کا
کہ اک ذاتِ خدا ہے اور میں ہوں

انشاء اللہ خان انشا

مل خونِ جگر میرا ہاتھوں سے حنا سمجھے
میں اور تو کیا کوسوں پر تم سے خدا سمجھے

بہادر شاہ ظفر

ہوا میں پھرتے ہو کیا حرص اور ہوا کے لیے
غرور چھوڑ دو اے غافلو خدا کے لیے
یوں تو ہیں سارے بتاں غارتگر ایمان و دیں
ایک وہ کافر صنم نامِ خدا کیا چیز ہے
میں ہوں عاصی کہ پر خطا کچھ ہوں
تیرا بندہ ہوں اے خدا کچھ ہوں
ظفرؔ آدمی اس کو نہ جانیے گا وہ ہو کیسا ہی صاحب فہم و ذکا
جسے عیش میں یادِ خدا نہ رہی جسے طیش میں خوفِ خدا نہ رہا
میں نے پوچھا کیا ہوا وہ آپ کا حسن و شباب
ہنس کے بولا وہ صنم شانِ خدا تھی میں نہ تھا
اے ظفرؔ یہ دل پہ میرے داغ کیسا رہ گیا
خانہ باغ یار میں خلقِ خدا تھی میں نہ تھا

حیدر علی آتش

نہ تجھے دماغ نگاہ ہے نہ کسی کو تاب جمال ہے
انہیں کس طرح سے دکھاؤں میں وہ جو کہتے ہیں کہ خدا نہیں
رجوع بندہ کی ہے اس طرح خدا کی طرف
پھرے ضمیر خبر جیسے مبتدا کی طرف
بہت خراب رہا بت کدے میں اے آتشؔ
خدا پرست ہے چل خانۂِ خدا کی طرف
ناگفتنی ہے عشقِ بتاں کا معاملہ
ہر حال میں ہے شکرِ خدا کچھ نہ پوچھئے
فرط شوق اس بت کے کوچہ میں لگا لے جائے گا
کعبۂِ مقصود تک مجھ کو خدا لے جائے گا

داغ دہلوی

چاہ سے آپ کو تو نفرت ہے
مجھ کو چاہے خدا کرے کوئی
بت کو بت اور خدا کو جو خدا کہتے ہیں
ہم بھی دیکھیں تو اسے دیکھ کے کیا کہتے ہیں
داغؔ کو کون دینے والا تھا
جو دیا اے خدا دیا تو نے
دل کو کیا ہو گیا خدا جانے
کیوں ہے ایسا اداس کیا جانے
کہہ دیا میں نے رازِ دل اپنا
اس کو تم جانو یا خدا جانے
معشوق جائے حور ملے مے بجائے آب
محشر میں دو سوال کریں گے خدا سے ہم
یہ آرزو ہے آنکھ میں سرمہ لگائیں گے
اے داغؔ خاک پائے رسولِ خدا سے ہم

شیخ ابراہیم ذوق

قسمت اس بت سے جا لڑی اپنی
دیکھو احمق خدا سے لڑتی ہے
جب یہ دیں دار ہیں دنیا کی نمازیں پڑھتے
کاش اس وقت انہیں نامِ خدا یاد رہے
محو اتنا بھی نہ ہو عشقِ بتاں میں اے ذوقؔ
چاہیے بندے کو ہر وقت خدا یاد رہے
تم جسے یاد کرو پھر اسے کیا یاد رہے
نہ خدائی کی ہو پروا نہ خدا یاد رہے
کشتۂِ ناز کی گردن پہ چھری پھیرو جب
کاش اس وقت تمہیں نامِ خدا یاد رہے
گر حقیقت میں ہے رہنا تو نہ رکھ خود بینی
بھولے بندہ جو خودی کو تو خدا یاد رہے
عالم حسن خدائی ہے بتوں کی اے ذوقؔ
چل کے بت خانے میں بیٹھو کہ خدا یاد رہے
بجا کہے جسے عالم اسے بجا سمجھو
زبانِ خلق کو نقارۂِ خدا سمجھو

مصحفی غلام ہمدانی

اے مصحفیؔ شانیں ہیں مری جلوہ گری میں
ہر رنگ میں میں مظہر آثار خدا ہوں
شیخ کلبے سے اٹھ نکل باہر
گھر میں بیٹھے خدا نہیں ملتا
خدا سے نہیں کام اب ہم کو یارو
کہ اک بت کو اپنا خدا کر چکے ہم
نہ برہمن کی مشیخت ہے نہ رہبان کی قدر
اب تو اس مے کدے میں نامِ خدا ہم ہی ہیں
پیچھے مرے پڑا ہے تو کیوں گھر کی راہ لے
رسوا کرے گا کیا مجھے بہرِ خدا سرک
کبریائی کی ادا تجھ میں ہے
گرچہ تو بت ہے خدا تجھ میں ہے
شوخی و ناز و ادا تجھ میں ہے
یا یہ اک قہرِ خدا تجھ میں ہے
اے مصحفیؔ ہے مار فلک رہزن مردم
تو بھاگ سکے اس سے تو از بہرِ خدا بھاگ
ہمیں نت اسیر بلا چاہتا ہے
ہماری خوشی کب خدا چاہتا ہے

مومن خان مومن

کہا اس بت سے مرتا ہوں تو مومنؔ
کہا میں کیا کروں مرضی خدا کی
کیوں سنے عرض مضطرب مومنؔ
صنم آخر خدا نہیں ہوتا
نام عشقِ بتاں نہ لو مومنؔ
کیجیے بس خدا خدا صاحب
مر چلے اب تو اس صنم سے ملیں
مومنؔ اندیشۂِ خدا کب تک

میر مہدی مجروح

کیوں نہ ہو دار کا وہ مستوجب
جو کہ بندہ کہے خدا ہوں میں
مجھ پہ تہمت صنم پرستی کی
شیخ صاحب خدا خدا کیجے

فیض احمد فیض

وہ بتوں نے ڈالے ہیں وسوسے کہ دلوں سے خوفِ خدا گیا
وہ پڑی ہیں روز قیامتیں کہ خیال روز جزاً گیا
ستم سکھلائے گا رسمِ وفا، ایسے نہیں ہوتا
صنم دکھلائیں گے راہِ خدا ایسے نہیں ہوتا

مرزا رفیع سودا

رکھتا ہے کچھ ایسی وہ برہمن بچہ رفتار
بت ہو گیا دھج دیکھ کے جس کی بہ خدا میں
ہندو ہیں بت پرست مسلماں خدا پرست
پوجوں میں اس کسی کو جو ہو آشنا پرست

میر انیس

کوئی انیس کوئی آشنا نہیں رکھتے
کسی کی آس بغیر از خدا نہیں رکھتے
کنج عزلت میں مثال آسیا ہوں گوشہ گیر
رزق پہنچاتا ہے گھر بیٹھے خدا میرے لیے

یگانہ چنگیزی

دردِ دل پھر کہیں نہ کروٹ لے
اب نہ چونکے خدا کرے کوئی
زمانہ خدا کو خدا جانتا ہے
یہی جانتا ہے تو کیا جانتا ہے
اسی میں دل اپنا بھلا جانتا ہے
کہ اک ناخدا کو خدا جانتا ہے
بتوں کو دیکھ کے سب نے خدا کو پہچانا
خدا کے گھر تو کوئی بندۂ خدا نہ گیا

باقی صدیقی

دیار غم سے گیا کون سرخرو باقیؔ
مگر وہ لوگ جنہیں آسرا خدا کا تھا
وقف رستے میں کھڑا ہے کہ نہیں
دل سے اب پوچھ خدا ہے کہ نہیں
اس طرح وہ بت آیا مری راہ میں باقیؔ
یاد آنے لگا مجھ کو خدا اور زیادہ

جون ایلیا

جس کو بھی شیخ و شاہ نے حکمِ خدا دیا قرار
ہم نے نہیں کیا وہ کام ہاں بہ خدا نہیں کیا
اک عجب طور حال ہے کہ جو ہے
یعنی میں بھی نہیں خدا بھی نہیں
مجھ کو خواہش ہی ڈھونڈنے کی نہ تھی
مجھ میں کھویا رہا خدا میرا
ہر شخص سے بے نیاز ہو جا
پھر سب سے یہ کہہ کہ میں خدا ہوں
ہے خدا ہی پہ منحصر ہر بات
اور آفت یہ ہے خدا ہی نہیں
اتنا خالی تھا اندروں میرا
کچھ دنوں تو خدا رہا مجھ میں
وہ سکھ وہاں کہ خدا کی ہیں بخششیں کیا کیا
یہاں یہ دکھ کہ خدا بھی نہیں رہا اب تو
منکران خدائے بخشندہ
اس سے تو اور اک خدا مانگو

جگر مراد آبادی

جس پہ تیری نظر نہیں ہوتی
اس کی جانب خدا نہیں ہوتا
یہ نسبت عشق کی بے رنگ لائے رہ نہیں سکتی
جو محبوبِ خدا کا ہے وہ محبوبِ خدا ہو گا
سمجھتا کیا ہے تو دیوانگان عشق کو زاہد
یہ ہو جائیں گے جس جانب اسی جانب خدا ہو گا
مجازیؔ سے جگرؔ کہہ دو ارے او عقل کے دشمن
مقر ہو یا کوئی منکر خدا یوں بھی ہے اور یوں بھی

عبدالحمید عدم

کشتی چلا رہا ہے مگر کس ادا کے ساتھ
ہم بھی نہ ڈوب جائیں کہیں نا خدا کے ساتھ
پیرِ مغاں سے ہم کو کوئی بیر تو نہیں
تھوڑا سا اختلاف ہے مردِ خدا کے ساتھ
محشر کا خیر کچھ بھی نتیجہ ہو اے عدمؔ
کچھ گفتگو تو کھل کے کریں گے خدا کے ساتھ
ہر پری وش کو خدا تسلیم کر لیتا ہوں میں
کتنا سودائی ہوں کیا تسلیم کر لیتا ہوں میں
آ گہی میں اک خلا موجود ہے
اس کا مطلب ہے خدا موجود ہے

قمر جلالوی

بیمار تجھے نزؑ میں وہ بت ہی رہا یاد
کافر کو بھی آ جاتا ہے ایسے میں خدا یاد
سجدے ترے کہنے سے میں کر لوں بھی تو کیا ہو
تو اے بتِ کافر نہ خدا ہے نہ خدا ہو
بجا ہے حکم کی تعمیل مانتا ہوں میں
اگر حضور نے کہہ دیا کل خدا ہوں میں

عرفان صدیقی

کتنا خالی ہے یہ دامن، جس طرح دامانِ دشت
کچھ نہ کچھ تو دے اسے میرے خدا، جیسے ہوا
جہاں پناہ یہ ساری زمین آپ کی ہے
میں آج تک اسے ملکِ خدا سمجھتا رہا
بجا حضور، یہ ساری زمین آپ کی ہے
میں آج تک اسے ملکِ خدا سمجھتا رہا
ان کی ظفر پہ جیش حریفاں تھی حیرتی
ان کی طرف تو کوئی خدا کے سوا نہ تھا
اب دعائیں نہ صحیفے سر دنیائے خراب
میں بھی خاموش ہوا میرا خدا بھی خاموش
ہم بندگاں تو نذرِ وفا ہونے والے ہیں
پھر آپ لوگ کس کے خدا ہونے والے ہیں
کوئی بجلی ان خرابوں میں گھٹا روشن کرے
اے اندھیری بستیو! تم کو خدا روشن کرے
حق ان کے ساتھ حق کی رضا ان کے ساتھ ہے
تنہا نہیں ہیں وہ کہ خدا ان کے ساتھ ہے
اب زباں خنجرِ قاتل کی ثنا کرتی ہے
ہم وہی کرتے ہیں جو خلقِ خدا کرتی ہے
نیازِ عشق بھی حد سے سوا نہ ہونے پائے
جبیں اٹھا، کہ یہ بندہ خدا نہ ہونے پائے

مجید امجد

لاؤ کہیں سے کوئی ضمیرِ فرشتہ صید
ڈھونڈو کہیں سے کوئی نگاہِ خدا شکار

مصطفی زیدی

بہت سے وہ تھے جنہوں نے بتوں سے فیض اٹھائے
بہت سے وہ تھے جنہوں نے خدا سے باتیں کیں

الطاف حسین حالی

در گزرے دوا سے تو بھروسے پہ دعا کے
در گزریں دعا سے بھی دعا ہے یہ خدا سے
دل و دیں کھو کے آئے تھے سوئے دیر
یاں بھی سب کچھ دیا خدا تو نے
جن کے معبود حورو غلماں ہیں
ان کو زاہد خدا سے کیا مطلب
خوف کا کوئی نشاں ظاہر نہیں افعال میں
گو کہ دل میں متصل خوفِ خدا پاتے ہیں ہم

رئیس فروغؔ

وہ لمحہ جیسے خدا کے بغیر بیت گیا
اسے گزار کے میں نے خدا سے کچھ نہ کہا
شہر میں سب سے چھوٹا تھا جو آدمی
اپنی تنہائیوں میں خدا بھی رہا

احسان دانش

کوتاہی نظر سے احاطہ نہ ہو سکا
ملنے کو یوں ملا ہے بتوں میں خدا مجھے
افلاس کے شباب مقدس میں بارہا
آیا ہے پوچھنے مرے گھر پر خدا مجھے
رہے جو زندگی میں زندگی کا آسرا ہو کر
وہی نکلے سریر آرا قیامت میں خدا ہو کر
مرے سجدوں کی یا رب تشنہ کامی کیوں نہیں جاتی
یہ کیا بے اعتنائی اپنے بندے سے خدا ہو کر
عشق کو شرک کی حد تک نہ بڑھا
یوں نہ مل ہم سے خدا ہو جیسے
وہ دیر کا تھا کہ کعبے کا یہ نہیں معلوم
مری خودی کا محافظ خدا رہا ہے کوئی
اصنام زر کے پاؤں میں ڈالے ہوئے جبیں
کتنے ہیں بندگانِ خدا دیکھتے چلو

بہزاد لکھنوی

خدا کو ڈھونڈ رہا تھا کہیں خدا نہ ملا
زہے نصیب کہ بندے کو مدعا نہ ملا
ہم اپنی بے خودی شوق پر نثار رہے
خودی کو ڈھونڈ لیا جب ہمیں خدا نہ ملا
ان کو بت سمجھا تھا یا ان کو خدا سمجھا تھا میں
ہاں بتا دے اے جبین شوق کیا سمجھا تھا میں

بشیر بدر

بارہا یہ ہمیں محسوس ہوا
درد سینے کا خدا ہو جیسے
میں غزل کی شبنمی آنکھ سے یہ دکھوں کے پھول چنا کروں
مری سلطنت مرا فن رہے مجھے تاج و تخت خدا نہ دے

بیان میرٹھی

وہ بت کہ دیں اس کو تو نہ گر دے تو لاکھ طوفاں اٹھا کے دھر دے
زبان پھر صاف قطع کر دے جو منہ سے نکلے خدا خدا کر
نرگس مہوشاں سے پوچھ گردش آسماں سے پوچھ
سرمہ ہوئے وفا سرشت کیا کہیں اے خدا کہ یوں

بیخود بدایونی

کیا جانیے کیا کرتا کیا دیکھتا کیا کہتا
زاہد کو بھی میری سی دیتا جو خدا آنکھیں

سدرشن فاکر

سامنے ہے جو اسے لوگ برا کہتے ہیں
جس کو دیکھا ہی نہیں اس کو خدا کہتے ہیں
تیری آنکھوں میں ہم نے کیا دیکھا
کبھی قاتل کبھی خدا دیکھا
ناخدا کو خدا کہا ہے تو پھر
ڈوب جاؤ خدا خدا نہ کرو

ظہیر کاشمیری

فرض برسوں کی عبادت کا ادا ہو جیسے
بت کو یوں پوج رہے ہیں کہ خدا ہو جیسے
مرا ہی بن کے وہ بت مجھ سے آشنا نہ ہوا
وہ بے نیاز تھا اتنا تو کیوں خدا نہ ہوا

عبید اللہ علیم

میرے وطن پہ اترتے ہوئے اندھیروں کو
جو تم کہو مجھے قہرِ خدا سا لگتا ہے
زمین جب بھی ہوئی کربلا ہمارے لیے
تو آسمان سے اترا خدا ہمارے لیے
انہیں غرور کہ رکھتے ہیں طاقت و کثرت
ہمیں یہ ناز بہت ہے خدا ہمارے لیے
صاحب مہر و وفا ارض و سما کیوں چپ ہے
ہم پہ تو وقت کے پہرے ہیں خدا کیوں چپ ہے

علی سردار جعفری

کوئی بولتا نہیں ہے میں پکارتا رہا ہوں
کبھی بت کدے میں بت کو کبھی کعبے میں خدا کو
کاش کر لیتے کبھی کعبۂ دل کا بھی طواف
وہ جو پتھر کے مکانوں سے خدا مانگتے ہیں

فارغ بخاری

اس رند سیہ مست کا ایمان نہ پوچھو
تشنہ ہو تو مخلوق ہے پی لے تو خدا ہے
اس اوج پر نہ اچھالو مجھے ہوا کر کے
کہ میں جہاں سے ہوں اترا خدا خدا کر کے

ماجد صدیقی

جاؤں در بہار پہ کاسہ بدست میں
ایسا تو وقت مجھ پہ نہ آئے خدا کرے
غزل لکھوں تو کسے اپنا مدعا مانوں
کوئی صنم بھی تو ہو میں جسے خدا مانوں

تلوک چند محروم

دیتا ہے ترک عشقِ بتاں کی صلاح تو
واعظ خدا کرے کہ نہ تجھ کو خدا ملے
زرد ہے دھانوں کی رنگت خشک دہقانوں کے لب
بھیج دے کالی گھٹا اب اے خدا برسات کی

جلیل مانک پوری

بتوں کو تاکتے گزری ہے شرم آئے گی
جلیلؔ لے نہ چلو سامنے خدا کے مجھے

جوش ملیح آبادی

بندہ ترے وجود کا منکر نہیں مگر
دنیا نے کیا دیئے ہیں سبق اے خدا نہ پوچھ
صیاد دام زلف سے مجھ کو رہا کرے
وہ دن تمام عمر نہ آئے خدا کرے
حیرت ہے آہ صبح کو ساری فضا سنے
لیکن زمیں پہ بت نہ فلک پر خدا سنے
عالم ہے یہ کہ گوش بشر تک ہے بے نیاز
ہونا تھا یہ کہ بندہ کہے اور خدا سنے

حسرت موہانی

تری محفل میں اہلِ دل کو جلوہ
نظر آ جائے گا شانِ خدا کا

حفیظ جالندھری

کوئی چارہ نہیں دعا کے سوا
کوئی سنتا نہیں خدا کے سوا
بت کدے سے چلے ہو کعبے کو
کیا ملے گا تمہیں خدا کے سوا
واسطہ کس کا دیں حفیظؔ ان کو
ان بتوں کا کوئی خدا ہی نہیں
ادھر دنیا ہے اور دنیا کے بندے
ادھر میرا خدا ہے اور میں ہوں
حفیظؔ ایسی فلاکت کے دنوں میں
فقط شکرِ خدا ہے اور میں ہوں
مجاز عین حقیقت ہے با صفا کے لیے
بتوں کو دیکھ رہا ہوں مگر خدا کے لیے
حفیظؔ عازم کعبہ ہوا ہے جانے دو
اب اس پہ رحم کرو اے بتو خدا کے لیے
داور حشر کا انصاف اشارے ان کے
بس یہی ہے کسی بندے کا خدا ہو جانا
ہاں کیفِ بے خودی کی وہ ساعت بھی یاد ہے
محسوس کر رہا تھا خدا ہو گیا ہوں میں
بھر لے پیالہ خم کدۂ زیست سے حفیظؔ
خونِ جگر ہے سامنے چل کر خدا کے پی
حیران نہ ہو دیکھ میں کیا دیکھ رہا ہوں
بندے تری صورت میں خدا دیکھ رہا ہوں

رسا چغتائی

ہر چیز سے ماورا خدا ہے
دنیا کا عجیب سلسلہ ہے
دل میں آباد ہیں جو صدیوں سے
ان بتوں کو کہاں خدا لے جائے
ایسا لگتا ہے خواب کی تعبیر
دیکھتا ہے خدا مکانوں میں
ایسا اجڑا صنم کدہ دل کا
ہو گیا خانۂ خدا سا کچھ
رات کیا سوچ رہا تھا میں بھی
اپنے عالم کا خدا تھا میں بھی

خاطر غزنوی

میں کہ جس کی میں نے تو دیکھا نہ تھا سوچا نہ تھا
سوچتا ہوں وہ صنم میرا خدا کیسے ہوا
کیسی چلی ہے اب کے ہوا تیرے شہر میں
بندے بھی ہو گئے ہیں خدا تیرے شہر میں

سیف الدین سیف

اللہ رے خود فریبی اہلِ حرم کہ اب
بندے بھی دیکھتے ہیں خدا کے مقام سے

سلام مچھلی شہری

سوچتا ہوں پھر اٹھا لوں بربط کہنہ سلامؔ
منتظر ہے شعر و نغمہ کا خدا میرے لیے

سیماب اکبر آبادی

خود بین و خود شناس ملا خود نما ملا
انساں کے بھیس میں مجھے اکثر خدا ملا
کیوں یہ خدا کے ڈھونڈنے والے ہیں نامراد
گزرا میں جب حدود خودی سے خدا ملا

شاد عظیم آبادی

مشرب عشق میں دلا کفر ہے یار سے ریا
جب کہ بتوں کا دھیان ہو ذکرِ خدا کی وجہ کیا
اے بت جفا سے اپنی لیا کر وفا کا کام
بندوں کے کام آ کہ یہی ہے خدا کا کام
ہر رات اپنی آنکھوں کو رونا ہے فرضِ عین
طاعت گزار کرتے ہیں جیسے خدا کا کام

شکیل بدایونی

آپ جو کچھ کہیں ہمیں منظور
نیک بندے خدا سے ڈرتے ہیں
رنگ صنم کدہ جو ذرا یاد آ گیا
ٹوٹیں وہ بجلیاں کہ خدا یاد آ گیا

عزیز حامد مدنی

مانا کہ زندگی میں ہے ضد کا بھی ایک مقام
تم آدمی ہو بات تو سن لو خدا نہیں
کشید مے پہ ہے کیسا فساد حاکم شہر
تری گرہ سے ہے کیا بندۂ خدا جاتا

فانی بدایونی

نشان مہر ہے ہر ذرہ ظرف مہر نہیں
خدا کہاں نہ ملا اور کہیں خدا نہ ملا
ڈرو نہ تم کہ نہ سن لے کہیں خدا میری
کہ روشناس اجابت نہیں دعا میری
اور بندے ہیں جن کو دعوی خدائی ہے
تھی ہماری قسمت میں بندگی خدا ہو کر
کشتی اعتبار توڑ کے دیکھ
کہ خدا بھی ہے نا خدا ہی نہیں
فانیؔ سفینہ اب بھی نہ ڈوبے تو کیا کرے
طوفان کو نہ دیکھ ستم نا خدا کے دیکھ
کی سپرد در بت خانہ اجل نے مری خاک
کس کو سونپا مجھے ظالم نے خدا کے بدلے
یکتائے زمانہ ہونے پر صاحب یہ غرور خدائی کا
سب کچھ ہو مگر خاکم بدہن کیا کوئی خدا ہو جاتا ہے

اختر ہوشیارپوری

ہر چند سینے میں دل کفر آشنا نہیں
میں اس کو پوجتا ہوں جو میرا خدا نہیں
دل میں اک جذبۂ بیداد و جفا ہی ہوگا
وہ خدا وند بھی ہوگا تو خدا ہی ہوگا

افضل منہاس

دنیا میں یہی سوچ کے زندہ ہوں میں افضلؔ
احساس تو بخشا ہے مجھے میرے خدا نے
تڑپ رہا تھا میں جس دردِ لا دوا کے لیے
وہ مل گیا ہے مگر چھین لے خدا کے لیے

اکبر حمیدی

اکبرؔ جہاں میں کار کشائی بتوں کی تھی
اچھا رہا جو ماننے والا خدا کا تھا
نام اکبرؔ تو مرا ماں کی دعا نے رکھا
ہاں بھرم اس کا مگر میرے خدا نے رکھا

احمد فراز

سنگ دل ہے وہ تو کیوں اس کا گلہ میں نے کیا
جب کہ خود پتھر کو بت، بت کو خدا میں نے کیا
فرازؔ کس کے ستم کا گلا کریں کس سے
کہ بے نیاز ہوئی خلق بھی خدا کی طرح
جب تلک دور ہے تو تیری پرستش کر لیں
ہم جسے چھو نہ سکیں اس کو خدا کہتے ہیں
تجھے تراش کے میں سخت منفعل ہوں کہ لوگ
تجھے صنم تو سمجھنے لگے خدا مجھ کو
صنم تراش پر آداب کافرانہ سمجھ
ہر ایک سنگ سرِ راہ کو خدا نہ سمجھ
جس کو دیکھو تیری خو میں پاگل پھرتا ہے
ورنہ ہم مشرب تو نہیں‌ تھے خلقِ خدا اور میں
کل رات ہم سخن کوئی بت تھا خدا کہ میں
میں سوچ ہی رہا تھا کہ دل نے کہا کہ میں
بندگی ہم نے چھوڑ دی ہے فرازؔ
کیا کریں لوگ جب خدا ہو جائیں
ہم تو بدنام محبت تھے سو رسوا ٹھہرے
ناصحوں کو بھی مگر خلقِ خدا جانتی ہے
شہر بیمار کے ہر کوچہ و بام و در پر
ہم بھی مرتے تھے کہ جب خلقِ خدا زندہ تھی
یہ عالم شوق کا دیکھا نہ جائے
وہ بت ہے یا خدا دیکھا نہ جائے

اقبال ساجد

بستی میں خاک اڑائی نہ صحرا میں ہم گئے
کچھ دن سے ہم نے خلقِ خدا کچھ نہیں کیا

امیر مینائی

کیا بری شے ہے جوانی رات دن ہے تاک جھانک
ڈر توں کا ایک طرف، خوفِ خدا جاتا رہا
بولا وہ بت سرہانے مرے آ کے وقتِ نزع
فریاد کو ہماری چلے ہو خدا کے پاس؟
اے حضرتِ دل بتوں کو سجدہ
اتنا تو نہ بھولیے خدا کو
مطلبِ جو اپنے اپنے کہے عاشقوں نے سب
وہ بت بگڑ کے بول اٹھا، کیا خدا ہوں میں

شاذ تمکنت

مرا ضمیر بہت ہے مجھے سزا کے لیے
تو دوست ہے تو نصیحت نہ کر خدا کے لیے
حیات راس نہ آئے اجل بہانہ کرے
ترے بغیر بھی جینا پڑے خدا نہ کرے
خود اپنا حالِ دلِ مبتلا سے کچھ نہ کہا
دعا سے ہاتھ اٹھائے خدا سے کچھ نہ کہا
رنگ لایا مرا بے برگ و نوا ہو جانا
اتنا آسان نہ تھا اس کا خدا ہو جانا
گناہ اور حسیں، اہرمن کے بس میں نہیں
ستم ظریف کوئی بندۂ خدا ہی نہ ہو
میں ہی تنہا ہوں فقط تیری بھری دنیا میں
اور بھی لوگ ہیں کیا میرے خدا میری طرح

قتیل شفائی

وہ دل ہی کیا ترے ملنے کی جو دعا نہ کرے
میں تجھ کو بھول کے زندہ رہوں خدا نہ کرے
شرمندہ انہیں اور بھی اے میرے خدا کر
دستار جنہیں دی ہے انہیں سر بھی عطا کر
جہاں رفاقت ہو فتنہ پرداز مولوی کی
بہشت ایسی کسی کو میرے خدا نہ دینا
گر چاہتے ہو خوش رہیں کچھ بندگان خاص
جتنے صنم ہیں ان کو خدا کہہ لیا کرو
اپنے لیے اب ایک ہی راہ نجات ہے
ہر ظلم کو رضائے خدا کہہ لیا کرو
لگی ہے مہر مقدر کی دانے دانے پر
یہ خوش مذاقی شانِ خدا بھی خوب رہی

کلیم عاجز

مرا حال پوچھ کے ہم نشیں مرے سوزِ دل کو ہوا نہ دے
بس یہی دعا میں کروں ہوں اب کہ یہ غم کسی کو خدا نہ دے

کیفی اعظمی

وہ گئے جب سے ایسا لگتا ہے
چھوٹا موٹا خدا گیا کوئی

محسن احسان

فقیہِ شہر نے بے زار کر دیا ورنہ
دلوں میں قدر بہت خانۂ خدا کی تھی

ناصر کاظمی

سوچ اے دشمنِ اربابِ وفا
کیوں تجھے خلقِ خدا چاہتی ہے
اسی گوشے میں ہیں سب دیر و حرم
دل صنم ہے کہ خدا غور سے سن
تنہائی میں یادِ خدا تھی
تنہائی میں خوفِ خدا تھا
ناصر آشوبِ زمانہ سے غافل نہ رہو
کچھ ہوتا ہے جب خلقِ خدا کچھ کہتی ہے
منتِ ناخدا نہیں منظور
چاہے اس کو خدا کہے کوئی

نوح ناروی

ہر طلب گار کو محنت کا صلہ ملتا ہے
بت ہیں کیا چیز کہ ڈھونڈے سے خدا ملتا ہے
نوحؔ ہم کو نظر آیا نہ یہاں بت بھی کوئی
لوگ کہتے تھے کہ کعبہ میں خدا ملتا ہے