کیا کیا سلوک ہم سے چمن کی ہوا کرے
ماجد صدیقی
جھلسے بدن کو گاہ نمو آشنا کرے
کیا کیا سلوک ہم سے چمن کی ہوا کرے
جاؤں در بہار پہ کاسہ بدست میں
ایسا تو وقت مجھ پہ نہ آئے خدا کرے
ہم کیوں کریں دراز کہیں دست آرزو
اپنی بلا سے کوئی مسیحا ہوا کرے
ہاں ہاں مری نگاہ بھی سورج سے کم نہیں
آنکھوں میں کس کی دم کہ مرا سامنا کرے
ہاں ہاں مجھے ضیائے تخیل عطا ہوئی
ایسا کوئی ملے بھی تو اس دل میں جا کرے
ماجدؔ یہ طرز حسنِ بیاں اور یہ رفعتیں
دل اس سے بڑھ کے اور تمنا بھی کیا کرے
مفعول فاعلات مفاعیل فاعِلن
مضارع مثمن اخرب مکفوف محذوف