مرزا غالب

نہ تھا کچھ تو خدا تھا، کچھ نہ ہوتا تو خدا ہوتا
ڈبویا مجھ کو ہونے نے ، نہ ہوتا میں تو کیا ہوتا
ہوئی مدت کہ غالب مرگیا، پر یاد آتا ہے
وہ ہر اک بات پر کہنا کہ یوں ہوتا تو کیا ہوتا
ہوس کو ہے نشاطِ کار کیا کیا
نہ ہو مرنا تو جینے کا مزا کیا
تجاہل پیشگی سے مدعا کیا
کہاں تک اے سراپا ناز کیا کیا؟
میں، اور صد ہزار نوائے جگر خراش
تو، اور ایک وہ نہ شنیدن کہ کیا کہوں
جوں شمع ہم اک سوختہ سامانِ وفا ہیں
اور اس کے سواکچھ نہیں معلوم کہ کیا ہیں
آج ہم اپنی پریشانی خاطر ان سے
کہنے جاتے تو ہیں، پر دیکھئے کیا کہتے ہیں
بیکاری جنوں کو ہے سر پیٹنے کا شغل
جب ہاتھ ٹوٹ جائیں تو پھر کیا کرے کوئی
شرع و آئین پر مدار سہی
ایسے قاتل کا کیا کرے کوئی
درد ہو دل میں تو دوا کیجے
دل ہی جب درد ہو تو کیا کیجے
ہم کو فریاد کرنی آتی ہے
آپ سنتے نہیں تو کیا کیجے
ہے موجزن اک قلزمِ خوں کاش یہی ہو
آتا ہے ابھی دیکھیے کیا کیا مرے آگے
پر ہوں میں شکوے سے یوں، راگ سے جیسے باجا
اک ذرا چھیڑیے پھر دیکھیے کیا ہوتا ہے
کھلتا کسی پہ کیوں مرے دل کا معاملہ
شعروں کے انتخاب نے رسوا کیا مجھے
بتائیں ہم تمہارے عارض و کاکل کو کیا سمجھے
اسے ہم سانپ سمجھے اور اسے من سانپ کا سمجھے
چاہیے اچھوں کو ، جتنا چاہیے
یہ اگر چاہیں تو پھر کیا چاہیے
بے صرفہ ہی گزرتی ہے ، ہو گرچہ عمرِ خضر
حضرت بھی کل کہیں گے کہ ہم کیا کیا کیے
مقدور ہو تو خاک سے پوچھوں کہ اے لئیم
تو نے وہ گنجہائے گرانمایہ کیا کیے

امام بخش ناسخ

کیوں کر کہوں عارف خدا ہوں
آگاہ نہیں کہ آپ کیا ہوں

انشاء اللہ خان انشا

انشاؔ صد آفریں ترے ذہن سلیم کو
مضموں زیادہ اس سے بھلا اور کیا بندھے

بہادر شاہ ظفر

خاک سے پیدا ہوئے ہیں دیکھ رنگا رنگِ گل
ہے تو یہ ناچیز لیکن اس میں کیا کیا چیز ہے
گرچہ کچھ بھی نہیں ہوں میں لیکن
اس پہ بھی کچھ نہ پوچھو کیا کچھ ہوں
کیا کچھ نہ کیا اور ہیں کیا کچھ نہیں کرتے
کچھ کرتے ہیں ایسا بخدا کچھ نہیں کرتے
عشق کا رستہ سراسر ہے دمِ شمشیر پر
بوالہوس اس راہ میں رکھنا قدم کیا سہل ہے

حیدر علی آتش

دولتِ حسن کی بھی ہے کیا لوٹ
آنکھوں کو پڑ گئی ہے لوٹا لوٹ

داغ دہلوی

آرزو ہے وفا کرے کوئی
جی نہ چاہے تو کیا کرے کوئی
گر مرض ہو دوا کرے کوئی
مرنے والے کا کیا کرے کوئی
تم سراپا ہو صورت تصویر
تم سے پھر بات کیا کرے کوئی
جس میں لاکھوں برس کی حوریں ہوں
ایسی جنت کو کیا کرے کوئی
یوں وفا عہدِ وفا کرتے ہیں
آپ کیا کہتے ہیں کیا کرتے ہیں
چلئے عاشق کا جنازہ اٹھا
آپ بیٹھے ہوئے کیا کرتے ہیں
یہ بتاتا نہیں کوئی مجھ کو
دل جو آتا ہے تو کیا کرتے ہیں
روز لیتے ہیں نیا دل دلبر
نہیں معلوم یہ کیا کرتے ہیں
داغؔ تو دیکھ تو کیا ہوتا ہے
جبر پر صبر کیا کرتے ہیں
تجھ کو بد عہد و بے وفا کہیے
ایسے جھوٹے کو اور کیا کہیے
وہ مجھے قتل کر کے کہتے ہیں
مانتا ہی نہ تھا یہ کیا کہیے
تجھ کو اچھا کہا ہے کس کس نے
کہنے والوں کو اور کیا کہیے
بت کو بت اور خدا کو جو خدا کہتے ہیں
ہم بھی دیکھیں تو اسے دیکھ کے کیا کہتے ہیں
ہم تصور میں بھی جو بات ذرا کہتے ہیں
سب میں اڑ جاتی ہے ظالم اسے کیا کہتے ہیں
دردِ دل کا نہ کہیے یا کہیے
جب وہ پوچھے مزاج کیا کہیے
کیا بتاؤں کہ کیا لیا میں نے
کیا کہوں میں کی کیا دیا تو نے
مجھ گنہ گار کو جو بخش دیا
تو جہنم کو کیا دیا تو نے
دل کو کیا ہو گیا خدا جانے
کیوں ہے ایسا اداس کیا جانے
جانتے جانتے ہی جانے گا
مجھ میں کیا ہے ابھی وہ کیا جانے
ہائے دو دل جو کبھی مل کے جدا ہوتے ہیں
نہیں‌معلوم وہ کیا کرتے ہیں‌ کیا ہوتے ہیں

شیخ ابراہیم ذوق

لیتے ہی دل جو عاشق دل سوز کا چلے
تم آگ لینے آئے تھے کیا آئے کیا چلے
دیوانہ آ کے اور بھی دل کو بنا چلے
اک دم تو ٹھہرو اور بھی کیا آئے کیا چلے
دکھلا کے مجھ کو نرگسِ بیمار کیا چلے
آوارہ مثل آہوئے صحرا بنا چلے
کیا دیکھتا ہے ہاتھ مرا چھوڑ دے طبیب
یاں جان ہی بدن میں نہیں نبض کیا چلے
ساتھ اپنے لے کے توسن عمرِ رواں کو آہ
ہم اس سرائے دہر میں کیا آئے کیا چلے
ہیں دہن غنچوں کے وا کیا جانے کیا کہنے کو ہیں
شاید اس کو دیکھ کر صلِ علی کہنے کو ہیں
آج ان سے مدعی کچھ مدعا کہنے کو ہیں
پر نہیں معلوم کیا کہویں گے کیا کہنے کو ہیں
مرض عشق جسے ہو اسے کیا یاد رہے
نہ دوا یاد رہے اور نہ دعا یاد رہے
تم جسے یاد کرو پھر اسے کیا یاد رہے
نہ خدائی کی ہو پروا نہ خدا یاد رہے
لوٹتے سیکڑوں نخچیر ہیں کیا یاد رہے
چیر دو سینے میں دل کو کہ پتا یاد رہے
سمجھ ہے اور تمہاری کہوں میں تم سے کیا
تم اپنے دل میں خدا جانے سن کے کیا سمجھو

مصحفی غلام ہمدانی

مخلوق ہوں یا خالق مخلوق نما ہوں
معلوم نہیں مجھ کو کہ میں کون ہوں کیا ہوں
مغرور نہ رہ ہستی موہوم پہ غافل
یاں آنکھ جھپکتے ہی خدا جانیے کیا ہو
گوشت اور پوست بھی گل جاتا ہے
جسم کے بیچ یہ کیا رکھتی ہے
تجھ سے گر وہ دلا نہیں ملتا
زہر بھی تجھ کو کیا نہیں ملتا
بیٹھے بیٹھے پھر گئیں آنکھیں مری
مجھ کو ان آنکھوں نے یہ کیا کر دیا
مجھ سے اک بات کیا کیجیے بس
اس قدر مہر و وفا کیجیے بس
سدا فکر روزی ہے تا زندگی ہے
جو جینا یہی ہے تو کیا زندگی ہے
یہ بھی کوئی طور سے ٹک جلوہ دکھا چھپ جانا
اور بھی لوگ ہیں ترسانے کو کیا ہم ہی ہیں
سب یہ نقشہ ہے ترا عاریتی
اک ذرا سوچ تو کیا تجھ میں ہے
نہیں خواہش اس کی کھلی ہم پہ اب تک
وہ کیا مانگتا ہے وہ کیا چاہتا ہے

مصطفٰی خان شیفتہ

ابھی اے شیفتہ واقف نہیں تم
کہ باتیں عشق میں ہوتی ہیں کیا کیا
شکرِ ستم نے اور بھی مایوس کر دیا
اس بات کا وہ غیر سے شکوہ کیا کیے
یار کو محرومِ تماشا کیا
مرگِ مفاجات نے یہ کیا کیا
مہرِ قمر کا ہے اب ان کو گمان
آہِ فلک سیر نے یہ کیا کیا
شکوہ جفا کا کیجے تو کہتے ہیں کیا کروں
تم سے وفا کروں کہ عدو سے وفا کروں
پیتا ہوں میں مدام مئے ناب معرفت
اصلِ شرور و امِ خبائث کو کیا کروں
سفیہ جیسے کہ خدمت سے چل نکلتے ہیں
غرورِ مہر و وفا نے مجھے کیا گستاخ

مومن خان مومن

اگر غفلت سے باز آیا جفا کی
تلافی کی بھی ظالم نے تو کیا کی
ضبط فغاں گو کہ اثر تھا کیا
حوصلہ کیا کیا نہ کیا کیا کیا
دشمن مومنؔ ہی رہے بت سدا
مجھ سے مرے نام نے یہ کیا کیا
تم ہمارے کسی طرح نہ ہوئے
ورنہ دنیا میں کیا نہیں ہوتا
کیوں الجھتے ہو جنبشِ لب سے
خیر ہے میں نے کیا کیا صاحب
ہائے ری چھیڑ رات سن سن کے
حال میرا کہا کہ کیا صاحب
ستم آزار ظلم و جور و جفا
جو کیا سو بھلا کیا صاحب
ضد سے وہ پھر رقیب کے گھر میں چلا گیا
اے رشک میری جان گئی تیرا کیا گیا
شوخ کہتا ہے بے حیا جانا
دیکھو دشمن نے تم کو کیا جانا
شکوہ کرتا ہے بے نیازی کا
تو نے مومنؔ بتوں کو کیا جانا
سنگ اسود نہیں ہے چشمِ بتاں
بوسہ مومنؔ طلب کرے کیا منہ
ناصح یہ گلہ کیا ہے کہ میں کچھ نہیں کہتا
تو کب مری سنتا ہے کہ میں کچھ نہیں کہتا
مت پوچھ کہ کس واسطے چپ لگ گئی ظالم
بس کیا کہوں میں کیا ہے کہ میں کچھ نہیں کہتا
اثر غم ذرا بتا دینا
وہ بہت پوچھتے ہیں کیا ہے عشق
سنو ذکر ہے کئی سال کا کہ کیا اک آپ نے وعدہ تھا
سو نباہنے کا تو ذکر کیا تمہیں یاد ہو کہ نہ یاد ہو
کیونکر یہ کہیں منت اعدا نہ کریں گے
کیا کیا نہ کیا عشق میں کیا کیا نہ کریں گے

میر مہدی مجروح

غور ہر چند کر رہا ہوں میں
پر یہ کھلتا نہیں کہ کیا ہوں میں
مردے کو جلا لیتے گرتے کو اٹھا لیتے
اک دم کو جو یاں آتے تو آپ کا کیا جاتا
غیروں کو بھلا سمجھے اور مجھ کو برا جانا
سمجھے بھی تو کیا سمجھے جانا بھی تو کیا جانا
کچھ عرضِ تمنا میں شکوہ نہ ستم کا تھا
میں نے تو کہا کیا تھا اور آپ نے کیا جانا
مر گیا وہ پہ یاد آتا ہے
اس کا کہنا کہ آہ کیا کیجے
صبر کے فائدے بہت ہیں ولے
دل ہی بس میں نہ ہو تو کیا کیجے

فیض احمد فیض

تمہاری ہر نظر سے منسلک ہے رشتۂ ہستی
مگر یہ دور کی باتیں کوئی نادان کیا سمجھے
وہ عہد غم کی کاہشہائے بے حاصل کو کیا سمجھے
جو ان کی مختصر روداد بھی صبر آزما سمجھے
اک تری دید چھن گئی مجھ سے
ورنہ دنیا میں کیا نہیں باقی
گھر جو ویراں تھا سرِ شام وہ کیسے کیسے
فرقتِ یاد نے آباد کیا آخرِ شب

مرزا رفیع سودا

یارو نہ بندھی اس سے کبھو شکل ملاقات
ملنے کو تو اس شوخ کے ترسا ہی کیا میں
جو مہرباں ہیں وہ سوداؔ کو مغتنم جانیں
سپاہی زادوں سے ملتا ہے دیکھیے کیا ہو

یگانہ چنگیزی

کیوں کسی سے وفا کرے کوئی
دل نہ مانے تو کیا کرے کوئی
ہنس بھی لیتا ہوں اوپری دل سے
جی نہ بہلے تو کیا کرے کوئی
کوہ کن اور کیا بنا لیتا
بن کے بگڑے تو کیا کرے کوئی
زمانہ خدا کو خدا جانتا ہے
یہی جانتا ہے تو کیا جانتا ہے
انوکھا گنہ گار یہ سادہ انساں
نوشتے کو اپنا کیا جانتا ہے
جان ایماں ہے ابھی وہ آنکھ شرمائی ہوئی
کیفیت میں ڈوب کر کیا جانے کیا ہو جائے گی
دنیا کا چلن ترک کیا بھی نہیں جاتا
اس جادۂ باطل سے پھرا بھی نہیں جاتا

باقی صدیقی

ہم چھپائیں گے بھید کیا دل کا
رنگ آنکھوں میں آ گیا دل کا
وہ مقام دل وہ جاں کیا ہو گا
تو جہاں آخری پردا ہو گا
خود سے ہم دور نکل آئے ہیں
تیرے ملنے سے بھی اب کیا ہو گا
تیری ہر بات پہ چپ رہتے ہیں
ہم سا پتھر بھی کیا ہو گا
دل بنا، دوا ہوا
درد کیا سے کیا ہوا
یہ کرم بجا مگر
وہ غرور کیا ہوا
منزلوں رہ گئے پیچھے باقیؔ
وہ گھڑی راہ میں کیا بیٹھے ہیں
وہ نظر بھی نہ دے سکی تسکیں
اے دل بے قرار اب کیا ہو
مدعا خامشی تک آ پہنچا
اب نگاہوں سے بات کیا ہو گی
دور تاروں کی انجمن جیسے
زندگی دیکنے میں کیا کیا ہے
بات کو جرم ناسزا سمجھے
اہلِ غم جانے تجھ کو کیا سمجھے
چھوڑیے بھی اب آئینے کا خیال
دیکھ پائے کوئی تو کیا سمجھے
جنوں کی راکھ سے منزل میں رنگ کیا آئے
متاعِ درد تو ہم راہ میں لٹا آئے
ایسے دل پر بھی کوئی کیا جائے
سامنے ان کے نہ بیٹھا جائے
لاکھ مجبوریاں سہی لیکن
آپ چاہیں تو کیا سے کیا ہو جائے
صبح کا بھید ملا کیا ہم کو
لگ گیا رات کا دھڑکا ہم کو
سیر مانندِ صبا کیجے گا
رہ کے گلشن میں بھی کیا کیجے گا
کس توقع پہ صدا کیجے گا
نہ سنے کوئی تو کیا کیجے گا
دل کی اک شاخ بردہکے سوا
چمنِ دہر میں کیا ہے اپنا
تری نگاہ کا انداز کیا نظر آیا
درخت سے ہمیں سایہ جدا نظر آیا
سنو تو کس لیے پتھر اٹھائے پھرتے ہو
کہو تو آئنہ خانے میں کیا نظر آیا
موج ہاتھ آئے تو دریا مانگیں
دردِ دل مانگ کے پھر کیا مانگیں
دست کوتاہ نہیں دستِ طلب
مانگنے والوں سے ہم کیا مانگیں
سوچتے ہیں سرِ ساحل باقیؔ
یہ سمندر ہمیں کیا دیتے ہیں
گل کے پردے میں ہے کیا معلوم نہیں
شعلہ صر صر ہے کہ صبا معلوم نہیں
گو خموشی نہیں غموں کا علاج
پھر بھی کیا کہتے اور کیا سنتے
ہے موت کا خیال بھی کس درجہ دلخراش
اور صورت حیات بھی کیا کیا ہے سامنے

جون ایلیا

کس سے اظہار مدعا کیجے
آپ ملتے نہیں ہیں کیا کیجے
ہو نہ پایا یہ فیصلہ اب تک
آپ کیجے تو کیا کیا کیجے
نطق حیوان پر گراں ہے ابھی
گفتگو کم سے کم کیا کیجے
جو بھی ہو تم پہ معترض اس کو یہی جواب دو
آپ بہت شریف ہیں آپ نے کیا نہیں کیا
جز گماں اور تھا ہی کیا میرا
فقط اک میرا نام تھا میرا
گو اپنے ہزار نام رکھ لوں
پر اپنے سوا میں اور کیا ہوں
اک سایہ مرا مسیحا تھا
کون جانے وہ کون تھا کیا تھا
کبھی جب مدتوں کے بعد اس کا سامنا ہو گا
سوائے پاس آداب تکلف اور کیا ہو گا
صبا شکوا ہے مجھ کو ان دریچوں سے دریچوں سے
دریچوں میں تو دیمک کے سوا اب اور کیا ہو گا
دل سے ہے بہت گریز پا تو
تو کون ہے اور ہے بھی کیا تو
ہم کسی کے نہیں جہاں کے سوا
ایسی وہ خاص بات کیا ہے کہیں
کوئے جاناں میں اور کیا مانگو
حالت حال یک صدا مانگو

جگر مراد آبادی

ہمیں معلوم ہے ہم سے سنو محشر میں کیا ہو گا
سب اس کو دیکھتے ہوں گے وہ ہم کو دیکھتا ہو گا
سرِ محشر ہم ایسے عاصیوں کا اور کیا ہو گا
درِ جنت نہ وا ہو گا در رحمت تو وا ہو گا
نگاہ قہر پر بھی جان و دل سب کھوئے بیٹھا ہے
نگاہِ مہر عاشق پر اگر ہو گی تو کیا ہو گا
یہ حسن یہ شوخی یہ کرشمہ یہ ادائیں
دنیا نظر آئی مجھے تو کیا نظر آیا
اک سرخوشی عشق ہے اک بے خودی شوق
آنکھوں کو خدا جانے مری کیا نظر آیا
قربان تری شان عنایت کے دل و جاں
اس کم نگہی پر مجھے کیا کیا نظر آیا
ہر حقیقت کو بانداز تماشا دیکھا
خوب دیکھا ترے جلووں کو مگر کیا دیکھا
آئینہ خانۂ عالم میں کہیں کیا دیکھا
تیرے دھوکے میں خود اپنا ہی تماشا دیکھا
دل آگاہ میں کیا کہیے جگرؔ کیا دیکھا
لہریں لیتا ہوا اک قطرے میں دریا دیکھا
میں شکوہ بلب تھا مجھے یہ بھی نہ رہا یاد
شاید کہ مرے بھولنے والے نے کیا یاد
میرے پاس آؤ یہ کیا سامنے ہوں
مری سمت دیکھو یہ کیا جا رہا ہوں
دل کو مٹا کے داغِ تمنا دیا مجھے
اے عشق تیری خیر ہو یہ کیا دیا مجھے

خواجہ میر درد

اذیت مصیبت ملامت بلائیں
ترے عشق میں ہم نے کیا کیا نہ دیکھا
تیری گلی میں میں نہ چلوں اور صبا چلے
یوں ہی خدا جو چاہے تو بندے کی کیا چلے
دیکھیے اب کے غم سے جی میرا
نہ بچے گا بچے گا کیا ہو گا

عبدالحمید عدم

ہر پری وش کو خدا تسلیم کر لیتا ہوں میں
کتنا سودائی ہوں کیا تسلیم کر لیتا ہوں میں
ہے یقیناً کچھ مگر واضح نہیں
آپ کی آنکھوں میں کیا موجود ہے

قمر جلالوی

جب تک رہا بیمار میں دم تم کو کیا یاد
تھی اور کسے دردِ محبت کی دوا یاد
رخ ادھر آنکھ ادھر آپ یہ کیا کرتے ہیں
پھر نہ کہنا مرے تیر خطا کرتے ہیں
سجدے ترے کہنے سے میں کر لوں بھی تو کیا ہو
تو اے بتِ کافر نہ خدا ہے نہ خدا ہو
جب بھی خالی ہاتھ تھے اور اب بھی خالی ہاتھ ہیں
لے کے کیا آئے تھے اور لے کر کیا چلے
یہ تو نے کیا کہا خونِ تمنا ہو نہیں سکتا
تری مہندی تو سلامت ہے تو کیا کیا ہو نہیں سکتا
دیکھ لینا یہ ستم اک دن مٹا دیں گے مجھے
تم یہ کہتے ہوے رہ جاؤ گے کیا ہو گیا
بس اتنا کہہ دو کہ دلائیں تمھیں کیا یاد
جب تم یہ کہو ہم کو نہیں عہدِ وفا یاد

شکیب جلالی

میں گھٹا ہوں، نہ پون ہوں، نہ چراغ
ہم نشیں میرا کوئی کیا ہوتا
سیراب کس طرح ہو زمیں دور دور کی
ساحل نے ہے ندی کو مقید کیا ہوا
وہ الوداع کا منظر، وہ بھیگتی پلکیں
پسِ غبار بھی کیا کیا دکھائی دیتا ہے

عرفان صدیقی

لمحۂ شوق ہوں، میری کوئی قیمت ہی نہیں
میں میسر تجھے آ جاؤں تو مہنگا کیا ہوں
صرف ایک سر ملا تھا سو نذرانہ کر دیا
اب ناصران معرکۂ صبر کیا کریں
نرم جھونکے سے یہ اک زخم سا کیا لگتا ہے
اے ہوا، کچھ ترے دامن میں چھپا لگتا ہے
ذرا بدن کسی موجِ رواں کو سونپ کے دیکھ
کنارِ آب مری جان سوچتا کیا ہے
غرض نہیں کہ کوئی اور کیا سمجھتا رہا
بس ایک لکھتا رہا دوسرا سمجھتا رہا
صبح سورج نے اسی حجرے میں پھر پایا مجھے
میں کہاں تھا کیا خبر عرفانؔ کیا کرتا تھا رات
چاکر دنیا سے عرضِ مدعا کیوں کیجیے
خسروِ دوراں سے کیا ہو گا علیؑ آنے کو ہیں
دل ہی فانوسِ وفا‘ دل ہی خس و خارِ ہوس
دیکھنا یہ ہے کہ اس کا قرب کیا روشن کرے
کام اس شکوۂ تنہائی سے کیا چلتا ہے
تو اکیلا ہے کہ دنیا سے جدا چلتا ہے
کچھ تو کرنا ہے کہ پتھر نہ سمجھ لے سیلاب
ورنہ اس ریت کی دیوار سے کیا ہونا ہے
ایک ہی رنگ ہے ، تیرے لب و رخسار کا رنگ
اور میرے ورق سادہ میں کیا رکھا ہے

مجید امجد

صدیوں کے گھاٹ پر، بھرے میلوں کی بھیڑ میں
اے دردِ شادماں، ترا کیا کیا لباس تھا
ان گنت امروں میں اور کیا ہے ترے دل کے لیے
اک جیون ہار ڈر سا ہے ترے دل کے لیے
سب ضمیروں کے ثمر ہیں، پستیاں، سچائیاں
جانے تیرے ذہن میں کیا ہے ترے دل کے لیے
غموں کے سبز تبسم سے کنج مہکے ہیں
سمے کے سم کے ثمر ہیں، میں اور کیا رکھتا
تجھے تو علم ہے ، کیوں میں نے اس طرح چاہا
جو تو نے یوں نہیں چاہا تو کیا، جو تو چاہے

الطاف حسین حالی

جو دل پہ گزرتی ہے کیا تجھ کو خبر ناصح
گر آج نہ تم آتے کیا جانیے کیا ہوتا
خوش ہے امید خلد پر حالیؔ
کوئی پوچھے کہ کیا کیا تو نے
ہے کچھ اک باقی خلش امید کی
یہ بھی مٹ جائے تو پھر کیا چاہیے
منہ نہ دیکھیں دوست پھر میرا اگر جائیں کہ میں
اس سے کیا کہتا رہا اور آپ کیا کرتا رہا
راہ کے طالب ہیں پر بے راہ پڑتے ہیں قدم
دیکھیے کیا ڈھونڈتے ہیں اور کیا پاتے ہیں ہم
پھر جو دیکھا تو کچھ نہ تھا یا رب
کون پوچھے کہ کیا کیا تو نے
بہت حظ اٹھاتا ہے دل تجھ سے مل کر
قلق دیکھیے کیا ہوا چاہتا ہے

جمال احسانی

عمر گزری جس کا رستہ دیکھتے
آ بھی جاتا وہ تو ہم کیا دیکھتے
تو مجھے چھوڑ کے جا سکتا نہیں
چھوڑ اس بات میں کیا رکھا ہے
صورت دل بڑے شہروں میں رہ یک طرفہ
جانے والوں کو بہت یاد کیا کرتی ہے

رئیس فروغؔ

اس دن ہوائے صبح یہ کہتی ہوئی گئی
یوسف میاں کے سانولے بیٹے میں کیا نہیں
امید اور خوف ناچتے ہیں
وہ ناچ گھر ہے مکان کیا ہے
شاید کسی آواز کی خوشبو نظر آئے
آنکھیں ہیں تو خوابوں کی تمنا بھی کیا کر
سونے دے انہیں رنگ جو سوئے ہیں بدن میں
آوارہ ہواؤں کو نہ محسوس کیا کر
آواز تو ہے بات سمجھ میں نہیں آتی
یہ فون بہت اس نے مجھے تنگ کیا ہے
آدرش کو سینے سے لگائے ہوئے میں نے
لکھا ہے اگر شعر تو فاقہ بھی کیا ہے
تو نے تو میگھ راج کو نہلا کے رکھ دیا
ساون کی ایک شام ترے ہاتھ کیا لگی
کون سا نام نہیں ہے بدنام
کوئی کہلائے تو کیا کہلائے

احسان دانش

عشق کی دنیا میں اک ہنگامہ برپا کر دیا
اے خیال دوست یہ کیا ہو گیا کیا کر دیا
ابھی کل تک جوانی کے خمستاں تھے نگاہوں میں
یہ دنیا دو ہی دن میں رہ گئی ہے کیا سے کیا ہو کر
موت بھی آئی تو اس ناز کے ساتھ
مجھ پہ احسان کیا ہو جیسے
ہچکیاں رات کو آتی ہی رہیں
تو نے پھر یاد کیا ہو جیسے

اختر شیرانی

وہ کبھی مل جائیں تو کیا کیجیے
رات دن صورت کو دیکھا کیجیے
پوچھ بیٹھے ہیں ہمارا حال وہ
بے خودی تو ہی بتا کیا کیجیے
تو میرے دل کی سن آغوش بن کر کہہ رہا ہے کچھ
تری نیچی نظر تو جانے کیا کچھ اور کہتی ہے

ادا جعفری

ہر لمحۂ بیتاب نے ڈھونڈی ہیں پناہیں
گونجی تھی خموشی تری آواز تو کیا تھی

اسرار الحق مجاز

میری نظروں میں حشر بھی کیا ہے
میں نے ان کا جلال دیکھا ہے
سچ تو یہ ہے مجازؔ کی دنیا
حسن اور عشق کے سوا کیا ہے
شوق کے ہاتھوں اے دلِ مضطر کیا ہونا ہے کیا ہو گا
عشق تو رسوا ہو ہی چکا ہے حسن بھی کیا رسوا ہو گا
حسن کی بزم خاص میں جا کر اس سے زیادہ کیا ہو گا
کوئی نیا پیماں باندھیں گے کوئی نیا وعدہ ہو گا
چارہ گری سر آنکھوں پر اس چارہ گری سے کیا ہو گا
درد کہ اپنی آپ دوا ہے تم سے کیا اچھا ہو گا
واعظ سادہ لوح سے کہہ دو چھوڑے عقبیٰ کی باتیں
اس دنیا میں کیا رکھا ہے اس دنیا میں کیا ہو گا
تجھی سے تجھے چھیننا چاہتا ہوں
یہ کیا چاہتا ہوں یہ کیا چاہتا ہوں

بہزاد لکھنوی

بس اک سکون ہی ہم کو نہ مل سکا تا عمر
وگرنہ تیرے تصدق میں ہم کو کیا نہ ملا
کیا یہ بھی میں بتلا دوں تو کون ہے میں کیا ہوں
تو جان تماشا ہے میں محوِ تماشا ہوں
ان کو بت سمجھا تھا یا ان کو خدا سمجھا تھا میں
ہاں بتا دے اے جبین شوق کیا سمجھا تھا میں
میری حالت دیکھیے میرا تڑپنا دیکھیے
آپ کو اس سے غرض کیا ہے کہ کیا سمجھا تھا میں
یہ فغاں یہ شور یہ نالے یہ شیون تھے فضول
کیا بتاتی تھی محبت اور کیا سمجھا تھا میں

بشیر بدر

وہی شہر ہے وہی راستے وہی گھر ہے اور وہی لان بھی
مگر اس دریچے سے پوچھنا وہ درخت انار کا کیا ہوا
اب کسے چاہیں کسے ڈھونڈا کریں
وہ بھی آخر مل گیا اب کیا کریں
گھر نیا کپڑے نئے برتن نئے
ان پرانے کاغذوں کا کیا کریں
مندر گئے مسجد گئے پیروں فقیروں سے ملے
اک اس کو پانے کے لئے کیا کیا کیا کیا کیا ہوا

بیان میرٹھی

صانع گلشن ارم میں نے کہا کہ ہائے ہائے
در پہ اس انجمن سے دور قتل مجھے کیا کہ یوں

بیخود بدایونی

کیوں میں اب قابل جفا نہ رہا
کیا ہوا کہیے مجھ میں کیا نہ رہا
رقیبوں کا مجھ سے گلا ہو رہا ہے
یہ کیا کر رہے ہو یہ کیا ہو رہا ہے

زہرا نگاہ

یہ سچ ہے یہاں شور زیادہ نہیں ہوتا
گھر بار کے بازار میں پر کیا نہیں ہوتا
بہت دن بعد زہراؔ تو نے کچھ غزلیں تو لکھیں
نہ لکھنے کا کسی سے کیا کوئی وعدہ کیا تھا
تاروں کو گردشیں ملیں ذروں کو تابشیں
اے رہ نورد راہ جنوں تجھ کو کیا ملا
کیوں گھر کے اب آئے ہیں یہ بادل یہ گھٹائیں
ہم نے تو تجھے دیر ہوئی یاد کیا تھا

سدرشن فاکر

دل کے دیوار و در پہ کیا دیکھا
بس ترا نام ہی لکھا دیکھا
تیری آنکھوں میں ہم نے کیا دیکھا
کبھی قاتل کبھی خدا دیکھا
میں نے مجرم کو بھی مجرم نہ کہا دنیا میں
بس یہی جرم کیا ہے کوئی افسوس نہیں
دنیا سے وفا کر کے صلہ ڈھونڈ رہے ہیں
ہم لوگ بھی ناداں ہیں یہ کیا ڈھونڈ رہے ہیں

ضیا جالندھری

در و دیوار میں ہے اجنبیت
میں خود بھی کھو گیا تم کیا گئی ہو
میں آفتاب کو کیسے دکھاؤں تاریکی
تجھے میں کیسے بتاؤں کہ کیا ہے تنہائی
کہاں پہ سرحد نا بود و بود ملتی ہے
ثبوت ہو کہ نہ ہو اعتبار کیا کہ میں ہوں
میں ہوں ازل سے وقت کی گردش کا راز دار
یہ بزم کائنات ہے کیا میرا جسم ہے

ظہیر کاشمیری

رت جگے وہ بھی نشاطِ غم محبوب کے ساتھ
حسن والوں نے بڑا کام کیا ہو جیسے

عبید اللہ علیم

جس شخص نے عمر ہجر کاٹی
اس شخص کو ایک رات کیا دے

فارغ بخاری

پوچھے ہے چٹک کے غنچۂ زخم
اے اجنبی تیرا نام کیا ہے
سوچا ہے یہ میں نے پی کے اکثر
نشے میں یہ روشنی سی کیا ہے
مسیح وقت سہی ہم کو اس سے کیا لینا
کبھی ملے بھی تو کچھ دردِ دل بڑھا لینا
تیری خاطر یہ فسوں ہم نے جگا رکھا ہے
ورنہ آرائش افکار میں کیا رکھا ہے

احمد راہی

کوئی بتلائے کہ کیا ہیں یارو
ہم بگولے کہ ہوا ہیں یارو

ماجد صدیقی

ماجدؔ ہو اس سے شکوہ بہ لب تم جوہر نفس
سوچو تو زندگی کو ابھی تم نے کیا دیا
واضح ہیں ہر کسی پہ ترے جسم کے خطوط
تو تو چھپی سی چیز تھی تو نے یہ کیا کیا
ماجدؔ یہ طرز حسنِ بیاں اور یہ رفعتیں
دل اس سے بڑھ کے اور تمنا بھی کیا کرے
جو مرحلۂ زیست ہے پہلے سے کڑا ہے
کیا جرم نجانے دلِ وحشی نے کیا ہے
چاند نکلا ہے ڈوبے گا کچھ دیر میں
چاہیے بھی ہمیں اس سمے اور کیا
میں برگ ہوں خاک ہوں ہوا ہوں
اے کاش یہ جان لوں کہ کیا ہوں
ہوا یہ سایۂ ابلق بھی اب جو نذر خزاں
تو راہ چلتے مسافر کو اور کیا دوں گا

اختر امام رضوی

رنگ کی آنچ میں جلتا ہوا خوشبو کا بدن
آنکھ اس پھول کی تصویر میں کیا کیا دیکھے

تلوک چند محروم

ملنے کا جب مزا ہے کہ دل آپ کا ملے
ظاہر میں آپ مجھ سے ملے بھی تو کیا ملے
خشک گزرا اب کے ساون بھی بہت حیراں ہوں میں
ہو گئی تبدیل یا رب فصل کیا برسات کی

جلیل مانک پوری

لہو کی بوند بھی اے تیر یار دل میں نہیں
یہ فکر ہے کہ تواضع کروں میں کیا تیری
چاہیے دنیا نہ عقبیٰ چاہیے
جو تجھے چاہے اسے کیا چاہیے

ثروت حسین

میں کتاب خاک کھولوں تو کھلے
کیا نہیں موجود کیا موجود ہے
وہ میرے سامنے ملبوس کیا بدلنے لگا
نگار خانۂ ابر و ہوا بدلنے لگا
گدائے شہر آئندہ تہی کاسہ ملے گا
تجاوز اور تنہائی کی حد پر کیا ملے گا

جوش ملیح آبادی

رہتا نہیں ہے دہر میں جب کوئی آسرا
اس وقت آدمی پہ گزرتی ہے کیا نہ پوچھ
اس روئے دل نشیں پہ نگاہیں جمی رہیں
فریاد کر رہی ہے بصیرت کہ کیا کرے
حکمت نمک حرام ہوں بے شک ترا مگر
جس پر پڑے یہ وقت وہ بچارا کیا کرے
سبزے کا فرش ابر کا خیمہ گلوں کا عطر
گلشن میں اہتمام ہے کیا کیا ترے لیے
خود اپنی ہی صداؤں سے گونجے ہوئے ہیں کان
کوئی کسی کی بات سنے بھی تو کیا سنے

حسرت موہانی

اور تو پاس مرے ہجر میں کیا رکھا ہے
اک ترے درد کو پہلو میں چھپا رکھا ہے
قوی دل شادماں دل پارسا دل
ترے عاشق نے بھی پایا ہے کیا دل
دل کو رنگینی خواہش کی خطا پر آخر
ملتی ہے اس گلِ رعنا سے سزا کیا دیکھو
مستی حسن سے اپنی بھی نہیں تم کو خبر
کیا سنو عرض مری حال مرا کیا دیکھو
وہ چپ ہو گئے مجھ سے کیا کہتے کہتے
کہ دل رہ گیا مدعا کہتے کہتے
لطف کی ان سے التجا نہ کریں
ہم نے ایسا کبھی کیا نہ کریں
صبر مشکل ہے آرزو بے کار
کیا کریں عاشقی میں کیا نہ کریں
سیہ کار تھے باصفا ہو گئے ہم
ترے عشق میں کیا سے کیا ہو گئے ہم
جو پھر ملنے کی ہوتی کچھ بھی امید
تو ہم اس کے لیے کیا کیا نہ کرتے

حفیظ جالندھری

حضرتِ دل کام سے جاؤں گا میں
دل لگی میں آپ کا کیا جائے گا
اٹھ کے بالیں سے مرے دفن کی تدبیر کرو
نبض کیا دیکھتے ہو نبض میں کیا رکھا ہے
وہ قافلہ آرام طلب ہو بھی تو کیا ہو
آواز نفس ہی جسے آواز درا ہو
ہر روز جو سمجھانے چلے آتے ہو ناصح
میں پوچھتا ہوں تم مجھے سمجھے ہوئے کیا ہو
ذوق نگاہ کے سوا شوق گناہ کے سوا
مجھ کو بتوں سے کیا ملا مجھ کو خدا نے کیا دیا
حیران نہ ہو دیکھ میں کیا دیکھ رہا ہوں
بندے تری صورت میں خدا دیکھ رہا ہوں
دزدیدہ نگاہوں سے کدھر دیکھ رہے ہو
کیا بات ہے ! یہ آج میں کیا دیکھ رہا ہوں

رسا چغتائی

پھر محبت کا فلسفہ کیا ہے
یہ اگر سب لہو کی وحشت ہے
میں آج سر آتشِ نمرود کھڑا ہوں
اب دیکھیے یہ خلقِ خدا کیا مجھے سمجھے

خاطر غزنوی

یہ دل ہمارے لیے جس نے رت جگے کاٹے
اب اس سے بڑھ کے کوئی دوست تجھ سے کیا مانگیں
فضائیں چپ ہیں کچھ ایسی کہ درد بولتا ہے
بدن کے شور میں کس کو پکاریں کیا مانگیں
لوگوں نے تو سورج کی چکا چوند کو پوجا
میں نے تو ترے سائے کو بھی سجدہ کیا ہے

سیف الدین سیف

تمہارے درد مندوں کی خبر لے
غمِ دوراں کو ایسی کیا پڑی ہے

سلام مچھلی شہری

صبح دم بھی یوں فسردہ ہو گیا
اے دلِ نازک تجھے کیا ہو گیا

سیماب اکبر آبادی

اب کیا بتاؤں میں ترے ملنے سے کیا ملا
عرفان غم ہوا مجھے اپنا پتا ملا
یہ ایک ہی تو نعمت انساں نواز تھی
دل مجھ کو مل گیا تو خدائی کو کیا ملا
غم مجھے حسرت مجھے وحشت مجھے سودا مجھے
ایک دل دے کر خدا نے دے دیا کیا کیا مجھے
دل لے کے خود کو رہتے ہیں کیا کیا لیے ہوئے
شیشے وہی تو ہیں مری دنیا لیے ہوئے
اس کے جی میں کیا یہ آئی یہ اسے کیا ہو گیا
خود چھپا عالم سے اور خود عالم آرا ہو گیا
شکریہ ہستی کا! لیکن تم نے یہ کیا کر دیا
پردے ہی پردے میں اپنا راز افشا کر دیا
ادراک خود آشنا نہیں ہے
ورنہ انساں میں کیا نہیں ہے
کیوں جامِ شرابِ ناب مانگوں
ساقی کی نظر میں کیا نہیں ہے
تقدیر میں اضافۂ سوز وفا ہوا
دل میں جو تم نے آگ لگا دی تو کیا ہوا
زندگی دو دن کی اس پر یہ جہاں ایجادیاں
اہتمام اتنا کریں سیمابؔ اور پھر کیا کریں
جلوہ گاہ دل میں مرتے ہی اندھیرا ہو گیا
جس میں تھے جلوے ترے وہ آئنہ کیا ہو گیا
میں اور ترا سودا تو اور یہ استغنا
شاید مجھے فطرت نے مجبور کیا ہو گا
سیمابؔ جب اس دل میں تصویر نہیں ان کی
یہ آئینہ دھندلا ہے یہ آئینہ کیا ہو گا
بندۂ معنیٰ کہاں صورت کا بندا ہو گیا
سوچتا ہوں مجھ کو کیا ہونا تھا میں کیا ہو گیا
ہم ہیں سر تا بہ پا تمنا
کیسی امید کیا تمنا

شاد عظیم آبادی

ہرگز کبھی کسی سے نہ رکھنا دلا غرض
جب کچھ غرض نہیں تو زمانے سے کیا غرض

شان الحق حقی

فقط ایماں ہی کیا پامال ہیں ایماں شکن لاکھوں
دلوں کی وہ متاع کافری کیا ہو گئی آخر

شبلی نعمانی

نگہت زلف غبارِ رہ دوست
آخر اس کوچہ سے کیا لائی ہے
آہ کو سوئے اثر بھیجا تھا
واں سے کیا جانیے کیا لائی ہے

شکیل بدایونی

کوئی آرزو نہیں ہے کوئی مدعا نہیں ہے
ترا غم رہے سلامت مرے دل میں کیا نہیں ہے
ہائے اس مجبوری ذوقِ نظر کو کیا کروں
وہ مجھے دیکھیں نہ دیکھیں میں انہیں دیکھا کروں
میں نے مانا ضامن تسکینِ دل ہے ترک شوق
لیکن اپنے واقعات زندگی کو کیا کروں
زندگی شاید عزائم پروری کا نام ہے
سوچتا ہوں ہر نفس اب کیا کروں اب کیا کروں
یوں تو ان آنکھوں سے کیا کیا نہیں دیکھا جاتا
ہاں مگر اپنا ہی جلوہ نہیں دیکھا جاتا
ہزار قید خزاں سے چھٹ کر بہار کا آسرا کریں گے
بہار بھی ہم قفس زدوں کو نہ راس آئی تو کیا کریں گے
نگاہ کی بندشیں سلامت جنوں کی پابندیاں مسلم
کہیں بھرم کھل گیا تو اے دل میں کیا کروں گا وہ کیا کریں گے
بہار آئے چمن میں یہ انتظار نہ دیکھ
شکیلؔ اپنے جنوں کی بہار کیا کم ہے
جیسے کسی نے چھین لی رنگینی بہار
کیا جانیے بہار میں کیا یاد آ گیا
دور ہوں لیکن بتا سکتا ہوں ان کی بزم میں
کیا ہوا کیا ہو رہا ہے اور کیا ہونے کو ہے

عزیز حامد مدنی

لکھی ہوئی جو تباہی ہے اس سے کیا جاتا
ہوا کے رخ پہ مگر کچھ تو ناخدا جاتا
خدا کا شکر ہے تو نے بھی مان لی مری بات
رفو پرانے دکھوں پر نہیں کیا جاتا

فانی بدایونی

اے اجل اے جان فانیؔ تو نے یہ کیا کر دیا
مار ڈالا مرنے والے کو کہ اچھا کر دیا
کسی کے ایک اشارے میں کس کو کیا نہ ملا
بشر کو زیست ملی موت کو بہانہ ملا
وفا چاہتے ہیں وفا چاہتا ہوں
وہ کیا چاہتے ہیں میں کیا چاہتا ہوں
محبت کو رسوا کیا چاہتا ہوں
نظر محرم التجا چاہتا ہوں
تعین غمِ عشق کا چاہتا ہوں
انہیں چاہتا ہوں یہ کیا چاہتا ہوں
کوئی وجہِ تسکیں نہیں غم نہ راحت
خدا جانے فانیؔ میں کیا چاہتا ہوں
خود مسیحا خود ہی قاتل ہیں تو وہ بھی کیا کریں
زخم پیدا کریں یا زخمِ دل اچھا کریں
جسم آزادی میں پھونکی تو نے مجبوری کی روح
خیر جو چاہا کیا اب یہ بتا ہم کیا کریں
خون کے چھینٹوں سے کچھ پھولوں کے خاکے ہی سہی
موسمِ گل آ گیا زنداں میں بیٹھے کیا کریں
ہاں نہیں شرط مروت حسرت تاثیر درد
رحم آ ہی جائے گا ان سے تقاضا کیا کریں
مجھ کو مرے نصیب نے روزِ ازل سے کیا دیا
دولت دو جہاں نہ دی اک دلِ مبتلا دیا
بیداد کے خوگر تھے فریاد تو کیا کرتے
کرتے تو ہم اپنا ہی کچھ تم سے گلہ کرتے
تقدیر محبت تھی مر مر کے جیے جانا
جینا ہی مقدر تھا ہم مر کے بھی کیا کرتے
نادم اسے چاہا تھا جان اس پہ فدا کر کے
تدبیر تو اچھی تھی تقدیر کو کیا کرتے
آتے ہی تیرے وعدۂ فردا کا اعتبار
گھبرا کے مر نہ جائے تو پھر کیا کرے کوئی
نہ ابتدا کی خبر ہے نہ انتہا معلوم
رہا یہ وہم کہ ہم ہیں سو وہ بھی کیا معلوم
ترے خیال کے اسرار بے خودی میں کھلے
ہمیں چھپا نہ سکے ورنہ دل کو کیا معلوم
جب پرسشِ حال وہ فرماتے ہیں جانیے کیا ہو جاتا ہے
کچھ یوں بھی زباں نہیں کھلتی کچھ درد سوا ہو جاتا ہے

اختر ہوشیارپوری

رونقیں جتنی تھیں دہلیزوں سے باہر آ گئیں
شام ہی سے گھر کا دروازہ کھلا کیا رہ گیا
انگلیوں کے نقش گل دانوں پہ آتے ہیں نظر
آؤ دیکھیں اپنے اندر اور کیا کیا رہ گیا
یہی نہیں کہ سر شب قیامتیں ٹوٹیں
سحر کے وقت بھی ان بستیوں میں کیا نہ ہوا
رات بھر جس کی صدا آتی رہی
سوچتا ہوں وہ پرندہ کیا ہوا

اکبر حمیدی

مجھے لکھو وہاں کیا ہو رہا ہے
یہاں تو پھر تماشا ہو رہا ہے

احمد فراز

جو بھی دکھ یاد نہ تھا یاد آیا
آج کیا جانیے کیا یاد آیا
ایسی مجبوری کے عالم میں‌ کوئی
یاد آیا بھی تو کیا یاد آیا
یاد آیا تھا بچھڑنا تیرا
پھر نہیں‌ یاد کہ کیا یاد آیا
زخم کو پھول تو صرصر کو صبا کہتے ہیں
جانے کیا دور ہے ، کیا لوگ ہیں، کیا کہتے ہیں
کوئی بتلاؤ کہ اک عمر کا بچھڑا محبوب
اتفاقا کہیں‌ ملا جائے تو کیا کہتے ہیں
اپنا یہ شیوہ تو نہیں تھا اپنے غم اوروں کو سونپیں
خود تو جاگتے یا سوتے ہیں اس کو کیوں بے خواب کیا ہے
ہم اپنے آپ میں گم تھے ہمیں خبر کیا تھی
کہ ماور ائے غمِ جاں بھی ایک دنیا تھی
تو بھی ہیرے سے بن گیا پتھر
ہم بھی کل جانے کیا سے کیا ہو جائیں
کل ہم نے بزمِ یار میں کیا کیا شراب پی
صحرا کی تشنگی تھی سو دریا شراب پی
تو ہم سفر نہیں ہے تو کیا سیر گلستاں
تو ہم سبو نہیں ہے تو پھر کیا شراب پی
شکست دے گیا اپنا غرور ہی اس کو
وگرنہ اس کے مقابل بساط کیا تھی مری
کسی سے دل کی حکایت کبھی کہا نہیں کی
وگرنہ زندگی ہم نے بھی کیا سے کیا نہیں کی

اقبال ساجد

دنیا نے زر کے واسطے کیا کچھ نہیں کیا
اور ہم نے شاعری کے سواِ کچھ نہیں کیا
غربت کی تیز آگ پہ اکثر پکائی بھوک
خوش حالیوں کے شہر میں کیا کچھ نہیں کیا

امیر مینائی

ایک دل ہم دم مرے پہلو سے کیا جاتا رہا
سب تڑپنے بلبلانے کا مزہ جاتا رہا
شربتِ دیدار سے تسکین سی کچھ ہو گئی
دیکھ لینے سے دوا کے ، درد کیا جاتا رہا
مجھ کو گلیوں میں جو دیکھا، چھیڑ کر کہنے لگے
کیوں میاں کیا ڈھونڈتے پھرتے ہو، کیا جاتا رہا
ایک دل ہمدم، مرے پہلو سے ، کیا جاتا رہا
سب تڑپنے تلملانے کا مزا جاتا رہا
محنت یہ کی کہ فکر کا ناخن بھی گھس گیا
عقدہ یہ آج تک نہ کھلا مجھ پہ کیا ہوں میں
ایک بوسے کے عوض مانگتے ہیں دل کیا خوب
جی میں سوچیں تو وہ کیا دیتے ہیں کیا لیتے ہیں؟
اپنی محفل سے اٹھاتے ہیں عبث ہم کو حضور
چپ کے بیٹھے ہیں الگ، آپ کا کیا لیتے ہیں؟
یہ عالم بیقراری کا ہے جب آغاز الفت میں
دھڑکتا ہے دل اپنا دیکھئے انجام کیا ٹھہرے
اٹھو جاؤ سدھا رو، کیوں مرے مردے پہ روتے ہو
ٹھہرنے کا گیا وقت اب اگر ٹھہرے تو کیا ٹھہرے
وصل ہو جائے یہیں حشر، حشر میں کیا رکھا ہے
آج کی بات کو کیوں کل پہ اٹھا رکھا ہے
محتسب پوچھ نہ تو شیشے میں کیا رکھا ہے
پارسائی کا لہو اس میں بھرا رکھا ہے

شاذ تمکنت

منایا جشن شبِ غم کہ ایک دن تو کٹا
جو تجھ سے چھوٹ کے جیتا رہے وہ کیا نہ کرے
ایک رات آپ نے امید پہ کیا رکھا ہے
آج تک ہم نے چراغوں کو جلا رکھا ہے
لے اڑے اہلِ جنوں حسن کی اک ایک ادا
خلوت و بزم میں اب فرق ہی کیا رکھا ہے
تصویرِ خیالی ہے ہر آنکھ سوالی ہے
دنیا مجھے کیا دے گی دنیا سے میں کیا لوں گا
آج کے دور میں ویرانے بھی تعمیر ہوئے
کل کی تہذیب خدا جانیے کیا ٹھہرے گی
شاذؔ تارا نہیں ٹوٹا کوئی دل ٹوٹا ہے
راہ تکتا تھا شبِ غم کوئی کیا میری طرح
کس کس کو اب رونا ہو گا جانے کیا کیا بھول گیا
چشم و لب کا ذکر ہی کیا ہے میں تو سراپا بھول گیا

فراق گورکھپوری

تمہیں کیوں کر بتائیں زندگی کو کیا سمجھتے ہیں
سمجھ لو سانس لینا خودکشی کرنا سمجھتے ہیں
کسی بدمست کو راز آشنا سب کا سمجھتے ہیں
نگاہِ یار تجھ کو کیا بتائیں کیا سمجھتے ہیں
کہاں کا وصل تنہائی نے شاید بھیس بدلا ہے
ترے دم بھر کے مل جانے کو ہم بھی کیا سمجھتے ہیں
نہ شوخی شوخ ہے اتنی نہ پرکار اتنی پرکاری
نہ جانے لوگ تیری سادگی کو کیا سمجھتے ہیں
جور و بے مہری اغماض پہ کیا روتا ہے
مہرباں بھی کوئی ہو جائے گا جلدی کیا ہے
کھو دیا تم کو تو ہم پوچھتے پھرتے ہیں یہی
جس کی تقدیر بگڑ جائے وہ کرتا کیا ہے
نگۂ شوخ میں اور دل میں ہیں چوٹیں کیا کیا
آج تک ہم نہ سمجھ پائے کہ جھگڑا کیا ہے
عشق سے توبہ بھی ہے حسن سے شکوے بھی ہزار
کہیے تو حضرتِ دل آپ کا منشا کیا ہے
زینت دوش ترا نامۂ اعمال نہ ہو
تیری دستار سے واعظ یہ لٹکتا کیا ہے
ہاں ابھی وقت کا آئینہ دکھائے کیا کیا
دیکھتے جاؤ زمانہ ابھی دیکھا کیا ہے
ان سے بڑھ چڑھ کے تو اے دوست ہیں یادیں ان کی
ناز و انداز و ادا میں تری رکھا کیا ہے
دل ترا جان تری آہ تری اشک ترے
جو ہے اے دوست وہ تیرا ہے ہمارا کیا ہے
دار پر گاہِ نظر گاہ سوئے شہر نگار
کچھ سنیں ہم بھی تو اے عشق ارادہ کیا ہے
گرد و غبار ہستی فانی اڑا دیا
اے کیمیائے عشق مجھے کیا بنا دیا
حیات و مرگ کے کچھ راز کھل گئے ہوں گے
فسانۂ شبِ غم ورنہ دوستو کیا تھا
شب عدم کا فسانہ گدازِ شمع حیات
سوائے کیف فنا میرا ماجرا کیا تھا
رنج و راحت وصل‌ و فرقت ہوش و وحشت کیا نہیں
کون کہتا ہے کہ رہنے کی جگہ دنیا نہیں
کچھ اشارے تھے جنہیں دنیا سمجھ بیٹھے تھے ہم
اس نگاہ آشنا کو کیا سمجھ بیٹھے تھے ہم
انقلاب پے بہ پے ہر گردش و ہر دور میں
اس زمین و آسماں کو کیا سمجھ بیٹھے تھے ہم
حسن کو اک حسن ہی سمجھے نہیں اور اے فراقؔ
مہرباں نا مہرباں کیا کیا سمجھ بیٹھے تھے ہم

قتیل شفائی

صدمہ تو ہے مجھے بھی کہ تجھ سے جدا ہوں میں
لیکن یہ سوچتا ہوں کہ اب تیرا کیا ہوں میں
مل جل کے برہنہ جسے دنیا نے کیا ہے
اس درد نے اب میرا بدن اوڑھ لیا ہے

قیوم نظر

تیری نگہ سے تجھ کو خبر ہے کہ کیا ہوا
دل زندگی سے بارِ دگر آشنا ہوا
چمن بندی پہ ہے محشر بپا کیا
کھلے ہیں گل اڑی ہے خاک کیا کیا
فریب آ گہی نے مار ڈالا
خدا کیا ناخدا کیا اور کیا کیا
سوچتا ہوں تو ہنسی آتی ہے
سامنے اس کے میں کیا کرتا تھا

کلیم عاجز

منہ فقیروں سے نہ پھیرا چاہیے
یہ تو پوچھا چاہیے کیا چاہیے
چاہتے ہیں تیرے ہی دامن کی خیر
ہم ہیں دیوانے ہمیں کیا چاہیے
مجھے اس کا کوئی گلہ نہیں کہ بہار نے مجھے کیا دیا
تری آرزو تو نکال دی ترا حوصلہ تو بڑھا دیا

محبوب خزاں

دکھ بہت ہیں زندگی میں کیا کریں گے ہم
وہ جو تیرا فرض تھا ادا کریں گے ہم
کس سے پوچھیں کہ وصل میں کیا ہے
ہجر میں کیا نہیں کہ تم سے کہیں

مجروح سلطان پوری

چمن ہے مقتل نغمہ اب اور کیا کہیے
بس اک سکوت کا عالم جسے نوا کہیے

محسن احسان

اسیرانِ قفس یہ پوچھتے ہیں
مقیمان چمن کو کیا ہوا ہے
ہم ایک عمر سے محسنؔ خمار خواب میں ہیں
ہماری بات زمانے میں کوئی کیا سنتا

ناصر کاظمی

ہم تجھے بھول کے خوش بیٹھے ہیں
ہم سا بیدرد کوئی کیا ہو گا
سر میں جب عشق کا سودا نہ رہا
کیا کہیں زیست میں کیا کیا نہ رہا
خواب میں رات ہم نے کیا دیکھا
آنکھ کھلتے ہی چاند سا دیکھا
دن کے ہنگاموں کو بے کار نہ جان
شب کے پردوں میں ہے کیا غور سے سن
میں وہ اسمِ عظیم ہوں جس کو
جن و ملک نے سجدہ کیا تھا
پتھر کا وہ شہر بھی کیا تھا
شہر کے نیچے شہر بسا تھا
جنگل، دریا، کھیت کے ٹکڑے
یاد نہیں اب آگے کیا تھا
دیکھ کے تیرے دیس کی رچنا
میں نے سفر موقوف کیا تھا
تیرے دھیان کی کشتی لے کر
میں نے دریا پار کیا تھا
دیر کے مرجھائے پیڑوں کو
خوشبو نے آباد کیا تھا
بول مری مٹی کی چڑیا
تو نے مجھ کو یاد کیا تھا
کسی پرانے وہم نے شاید
تجھ کو پھر بے چین کیا تھا
رنج تو ہے لیکن یہ خوشی ہے
اب کے سفر ترے ساتھ کیا تھا
دل کو یونہی سا رنج ہے ورنہ
تیرا میرا ساتھ ہی کیا تھا
اس دنیا میں اپنا کیا ہے
کہنے کو سب کچھ اپنا ہے
منہ دیکھے کی باتیں ہیں سب
کس نے کس کو یاد کیا ہے
ہچکی تھمتی ہی نہیں ناصر
آج کسی نے یاد کیا ہے
بیٹھے ہو کیوں ہار کے سائے میں دیوار کے
شاعرو، صورت گرو کچھ تو کیا چاہیے
تری گلی میں بہت دیر سے کھڑا ہوں مگر
کسی نے پوچھ لیا تو جواب کیا دوں گا
یہ تری منزل وہ مرا رستہ
تیرا میرا ساتھ ہی کیا ہے
دیکھ کر جو ہمیں چپ چاپ گزر جاتا ہے
کبھی اس شخص کو ہم پیار کیا کرتے تھے
دل میں اور تو کیا رکھا ہے
تیرا درد چھپا رکھا ہے
بھول بھی جاؤ بیتی باتیں
ان باتوں میں کیا رکھا ہے
ان سہمے ہوئے شہروں کی فضا کچھ کہتی ہے
کبھی تم بھی سنو یہ دھرتی کیا کچھ کہتی ہے
موسمِ گلزارِ ہستی ان دنوں کیا ہے نہ پوچھ
تو نے جو دیکھا سنا کیا میں نے دیکھا ہے نہ پوچھ
کب تلک مدعا کہے کوئی
نہ سنو تم تو کیا کہے کوئی
جی میں آتا ہے کچھ کہوں ناصر
کیا خبر سن کے کیا کہے کوئی
راتوں میں یہ رات امر ہے
کل جاگے تو پھر کیا جاگے

نوح ناروی

یہ کدورت یہ عداوت یہ جفا خوب نہیں
مجھ کو مٹی میں ملا کر تمہیں کیا ملتا ہے
اگر اس کا مرا جھگڑا یہیں طے ہو تو اچھا ہو
خدا جانے خدا کے سامنے کل کیا نہ ہو کیا ہو
کبھی لطف اٹھائے کبھی غم اٹھائے
خدا کی خدا کی میں کیا کیا نہ دیکھا
کیسی عذرا کیسی لیلیٰ کیسا وامق کیسا مجنوں
اب مشہور جہاں میں کیا کیا میں ہی میں ہوں تو ہی تو ہے