ہماری خوشی کب خدا چاہتا ہے
مصحفی غلام ہمدانی
ہمیں نت اسیر بلا چاہتا ہے
ہماری خوشی کب خدا چاہتا ہے
شب و روز رویا کریں خون آنکھیں
یہی تو وہ رنگِ حنا چاہتا ہے
وہ کرتا ہے اپنے ہی جی میں برائی
کسی کا کوئی گر برا چاہتا ہے
دلا بیٹھ رہ رکھ کے دنداں جگر پر
توکل کا گر تو مزا چاہتا ہے
اسے آپ سے دھیان آنے کا تیرے
وہ گل تجھ کو بادِ صبا چاہتا ہے
مرے استخواں سے بھی ہے اس کو نفرت
مرے فاقہ کر کے ہما چاہتا ہے
نہیں خواہش اس کی کھلی ہم پہ اب تک
وہ کیا مانگتا ہے وہ کیا چاہتا ہے
مگر یہ کہ ان روزوں پھر مصحفیؔ کو
ترے غم میں سودا ہوا چاہتا ہے
فَعُولن فَعُولن فَعُولن فَعُولن
متقارب مثمن سالم