مرزا غالب

خوں ہے دل خاک میں احوال بتاں پر، یعنی
ان کے ناخن ہوئے محتاجِ حنا میرے بعد
تیری فرصت کے مقابل اے عمر!
برق کو پابہ حنا باندھتے ہیں
اہلِ تدبیر کی واماندگیاں
آبلوں پر بھی حنا باندھتے ہیں
دل خوں شدۂِ کشمکش حسرتِ دیدار
آئینہ بہ دستِ بتِ بدمستِ حنا ہے

امام بخش ناسخ

خلقت خوش ہو جو میں ہوں پامال
گلزار جہاں میں کیا حنا ہوں
مل گیا خاک میں پس پس کے حسینوں پر میں
قبر پر بوئیں کوئی چیز حنا پیدا ہو

انشاء اللہ خان انشا

مل خونِ جگر میرا ہاتھوں سے حنا سمجھے
میں اور تو کیا کوسوں پر تم سے خدا سمجھے
قدرتِ خدا کے دیکھو کہ چوری تو ہم کریں
اور الٹے دست گیر ہو دزد حنا بندھے

بہادر شاہ ظفر

مجھے صاف بتائے نگار اگر تو یہ پوچھوں میں رو رو کے خونِ جگر
ملے پاؤں سے کس کے ہیں دیدۂ تر کف پا پہ جو رنگِ حنا نہ رہا
یار تھا گلزار تھا مے تھی فضا تھی میں نہ تھا
لائق پا بوس جاناں کیا حنا تھی میں نہ تھا
ہاتھ کیوں باندھے مرے چھلا اگر چوری گیا
یہ سراپا شوخی دزد حنا تھی میں نہ تھا

حیدر علی آتش

ملا جو تم نے لہو دست و پا میں عاشق کا
نہ ہو گا میل طبیعت کو پھر حنا کی طرف
رنگیں کیے ہیں یار نے جیسے کہ دست و پا
کیا رنگ لا رہی ہے حنا کچھ نہ پوچھئے
دل مرا مٹھی میں رکھتے ہو تمہارے ہاتھ سے
چھین کر اک دن اسے دزد حنا لے جائے گا

شیخ ابراہیم ذوق

قاتل سے دخل کیا ہے کہ جاں بر ہو اپنا ہوش
گر اڑ کے مثل طائر رنگِ حنا چلے
باغ عالم میں جہاں نخل حنا لگتا ہے
دل پر خوں کا وہاں ہاتھ پتا لگتا ہے

مصحفی غلام ہمدانی

گر چرخ پہ جاوے تو شفق ہووے مرا خوں
ور خاک میں پنہاں ہو تو واں رنگِ حنا ہو
چہچہا رنگ مرے خون کا سا
ترے پانو کی حنا رکھتی ہے
کیوں کہ ہم خون نہ روئیں شبِ عید
یار مشغول حنا بندی ہے
پوروں پہ ڈورے باندھے ہیں اس پر شعور نے
تا اس کے فندقوں کی نہ جاوے حنا سرک
خیر باشد کہ مرے خون کی سی
سرخی اے رنگِ حنا تجھ میں ہے
شب و روز رویا کریں خون آنکھیں
یہی تو وہ رنگِ حنا چاہتا ہے

مرزا رفیع سودا

دیکھا ہے جب سے رنگ کفک تیرے پاؤں میں
آتش کو چھوڑ گبر ہوئے ہیں حنا پرست

عرفان صدیقی

گھلا تصویر میں رنگِ حنا آہستہ آہستہ
بڑھی سر کی طرف تیغِ جفا آہستہ آہستہ
پلکوں سے گرا کرتے تھے بھیگے ہوئے جگنو
پھیلے ہوئے ہاتھوں پہ شفق تھی نہ حنا تھی
دھنک سے پھول سے ‘ برگِ حنا سے کچھ نہیں ہوتا
بدن صحرا ہوئے ‘ آب و ہوا سے کچھ نہیں ہوتا
رات کی رات وہی رنگ ترنگوں کی پکار
صبح تک خون بھی خاموش، حنا بھی خاموش
رات کی رات وہی رنگ ترنگوں کی پکار
صبح تک خون بھی خاموش‘ حنا بھی خاموش
لو دے اٹھا ہے دستِ دعا پر شفق کا رنگ
تیری ہتھیلیوں پہ حنا ہو گئی ہے شام
زرد چہروں پر بھی چمکے ‘ سرخ جذبوں کی دھنک
سانولے ہاتھوں کو بھی رنگِ حنا روشن کرے
نہ موجِ خوں پہ، نہ تیغِ جفا پہ لکھیں گے
اب اک سخن ترے رنگِ حنا پہ لکھیں گے
کون بجھتے ہوئے منظر میں جلاتا ہے چراغ
سرمئی شام، یہ تحریرِ حنا کس کی ہے

رئیس فروغؔ

جاگیں سہاگنیں بھی پر اس چاند رات کو
کنواری ہتھیلیوں میں زیادہ حنا لگی
بعض حالات میں کچھ ہاتھوں پر
ہو لہو بھی تو حنا کہلائے

ادا جعفری

ہتھیلیوں کے گلابوں سے خون رستا رہا
مگر وہ شوخی رنگِ حنا نہیں آئی

سدرشن فاکر

چند معصوم سے پتوں کا لہو ہے فاکرؔ
جس کو محبوب کی ہاتھوں کی حنا کہتے ہیں

عالم تاب تشنہ

یہ کہنا اب بھی سلگتا ہے جسم کا چندن
تمہارا قرب تھا اک شعلۂ حنا کہنا

علی سردار جعفری

ابھی اور تیز کر لے سر خنجر ادا کو
مرے خوں کی ہے ضرورت تری شوخی حنا کو
لو کے موسم میں بہاروں کی ہوا مانگتے ہیں
ہم کف دستِ خزاں پر بھی حنا مانگتے ہیں