مرزا غالب

گر نہیں نکہتِ گل کو ترے کوچے کی ہوس
کیوں ہے گرد رہ جولان صبا ہو جانا
دماغِ عطر پیراہن نہیں ہے
غم آوارگی ہائے صبا کیا
چار موج اٹھتی ہے طوفانِ طرب سے ہر سو
موجِ گل، موجِ شفق، موجِ صبا، موجِ شراب
تیرے توسن کو صبا باندھتے ہیں
ہم بھی مضموں کی ہوا باندھتے ہیں

انشاء اللہ خان انشا

پکڑی کسی سے جاوے نسیم اور صبا بندھے
مولیٰ کرے کچھ اپنی بھی اب تو ہوا بندھے

شیخ ابراہیم ذوق

خاک برباد نہ کرنا مری اس کوچے میں
تجھ سے کہہ دیتا ہوں میں بادِ صبا یاد رہے

مصحفی غلام ہمدانی

کہیں مغز اس کے میں صبح دم تری بوئے زلف رسا گئی
ترے کوچے سے جو چمن تلک گل اڑاتی خاک صبا گئی
ہے مجھ سے گریبان گل صبح معطر
میں عطر نسیمِ چمن و بادِ صبا ہوں
کیا دور ہے گر روح مری بعد فنا بھی
پھرتی رہے کوچے میں ترے بادِ صبا ہو
چمن کو چھوڑ ہم ایسے چلے گئے سوئے دشت
کہ نام کو بھی پھر اندیشۂِ صبا نہ رہا
کر دیا اس نے تو مجھ کو مدہوش
کس کی بو بادِ صبا رکھتی ہے
تو گلشن میں رہ گل یہ کہتا تھا اس سے
ترے دم سے میری صبا زندگی ہے
تو جاوے نہ جاوے جو کرنی تھی ہم کو
سماجت تری اے صبا کر چکے ہم
کون اس باغ سے اے بادِ صبا جاتا ہے
رنگِ رخسار سے پھولوں کے اڑا جاتا ہے
خم گیسو کو چھوا تھا کس کے
شب سے گلشن میں صبا بندی ہے
جانے دے ٹک چمن میں مجھے اے صبا سرک
کیوں چھیڑتی ہے تو مجھے نا آشنا سرک
گل ہے بے حال یہ کس گیسو کی
نکہت اے بادِ صبا تجھ میں ہے
تو جو یوں گل کو بنا دیتی ہے
کچھ تو اے بادِ صبا تجھ میں ہے
اس گلشن پر خار سے مانندِ صبا بھاگ
وحشت یہی کہتی ہے کہ زنجیر تڑا بھاگ
اسے آپ سے دھیان آنے کا تیرے
وہ گل تجھ کو بادِ صبا چاہتا ہے

مصطفٰی خان شیفتہ

شمیمِ گل میں بوئے پیرہن ہے
غلط ہے یہ کہ احسانِ صبا کیا
افغانِ چرس رس کی لپٹ نے جلا دیا
نامے کو ڈھونڈتی ہے صبا اور صبا کو ہم
افشائے رازِ عشق میں ضربُ المثل ہے وہ
کیوں کر غبارِ دل میں نہ رکھیں صبا سے ہم
یہ رازِ محبت ہے نہ افسانۂِ بلبل
محرم ہو مری بادِ صبا، ہو نہیں سکتا
تمہاری بزم میں افسردہ میں نہ بیٹھوں گا
نسیم باغ میں چالاک ہے ، صبا گستاخ

مومن خان مومن

وہ لالہ رو گیا نہ ہو گلگشت باغ کو
کچھ رنگ بوئے گل کے عوض ہے صبا کے ساتھ
یاد ہوائے یار نے کیا کیا نہ گل کھلائے
آئی چمن سے نکہتِ گل جب صبا کے ساتھ
چمن میں کوئی اس کو سے نہ آیا
گئی برباد سب محنت صبا کی
بوئے سمن سے شاد تھے اغیار بے تمیز
اس گل کو اعتبار نسیم و صبا گیا

میر مہدی مجروح

سوزِ دل کر چکا ہے جسم کو خاک
اب ترا منتظر صبا ہوں میں

فیض احمد فیض

جس ادا سے کوئی آیا تھا کبھی اول شب
اسی انداز سے چل بادِ صبا آخرِ شب

مرزا رفیع سودا

نسیم ہے ترے کوچے میں اور صبا بھی ہے
ہماری خاک سے دیکھو تو کچھ رہا بھی ہے

باقی صدیقی

چمن میں شور بہت شوخی صبا کا تھا
وہ رنگِ گل تھا کہ شعلہ تری ادا کا تھا
ہم ترسنے لگے بوئے گل کو
کہیں گلشن میں صبا ہے کہ نہیں
کسی گل کے نہ ہم رہے باقیؔ
دو قدم کیا چلے صبا کے ساتھ
کوئی لائے پیام فصلِ بہار
ہم نہیں جانتے صبا کیا ہے
نمو کے بوجھ سے شاخیں نہ ٹوٹ جائیں کہیں
تم آؤ تو کوئی غنچہ کھلے ، صبا آئے
سیر مانندِ صبا کیجے گا
رہ کے گلشن میں بھی کیا کیجے گا
بن گئے لالہ و گل جز و قفس
کس سے اب ذکر صبا کیجے گا
گل کے پردے میں ہے کیا معلوم نہیں
شعلہ صر صر ہے کہ صبا معلوم نہیں
سانس کلیوں کا رکا جاتا ہے
شوخی موجِ صبا کیا دیکھیں
جب پڑتا ہے پھولوں پہ ترے حسن کا پرتو
گلشن میں مچلتی ہے صبا اور زیادہ
بوئے گل دیکھی ہے رسوا ہوتے
کیا کریں بات صبا سے تیری
یہی رنگ چمنکی باتیں تھیں
یہی شور صبا تھا پہلے بھی
حسن سرو و سمن کے پردے ہیں
داستانِ غم صبا سنتے

جون ایلیا

حضرت زلف غالیہ افشاں
نام اپنا صبا صبا کیجے
موج آتی تھی ٹھہرنے کی جہاں
اب وہاں خیمۂ صبا ہی نہیں
دھول اڑتی ہے جو اس آنگن میں
اس کو بھیجو صبا صبا بھیجو
بے شمیم و ملال و حیراں ہے
خیمہ گاہ صبا کئی دن سے
شام تھی اور برگ و گل شل تھے مگر صبا بھی تھی
ایک عجیب سکوت تھا ایک عجب صدا بھی تھی

خواجہ میر درد

تیری گلی میں میں نہ چلوں اور صبا چلے
یوں ہی خدا جو چاہے تو بندے کی کیا چلے

عبدالحمید عدم

مہمان میزباں ہی کو بہکا کے لے اڑا
خوشبوئے گل بھی گھوم رہی ہے صبا کے ساتھ

شکیب جلالی

وہ گل نہ رہے ‘ نکہتِ گل خاک ملے گی
یہ سوچ کے گلشن میں صبا تک نہیں آتی
یا جاتے ہوئے مجھ سے لپٹ جاتی تھیں شاخیں
یا میرے بلانے سے صبا تک نہیں آتی

عرفان صدیقی

بگولے یک بیک ان سونے والوں کو جگاتے ہیں
سلاتی ہے جنہیں بادِ صبا آہستہ آہستہ
خوشبو کی طرح ساتھ لگا لے گئی ہم کو
کوچے سے ترے بادِ صبا لے گئی ہم کو
ان کو سفر میں باد ستم گر کا ڈر نہیں
شہر نبی کی موجِ صبا ان کے ساتھ ہے
کس نے اس ریت پہ گلبرگ بچھا رکھے ہیں
یہ زمیں کس کی ہے ‘ یہ موجِ صبا کس کی ہے
کب تک ان سڑکوں پہ بھٹکوں گا بگولوں کی طرح
میں بھی کچھ آنکھوں کی ٹھنڈک ہوں صبا لے چل مجھے