مرزا رفیع سودا

ہندو ہیں بت پرست مسلماں خدا پرست
پوجوں میں اس کسی کو جو ہو آشنا پرست
زبان شکوہ سوا اب زمانہ میں ہیہات
کوئی کسو سے بہم دیگر آشنا بھی ہے

میر انیس

کوئی انیس کوئی آشنا نہیں رکھتے
کسی کی آس بغیر از خدا نہیں رکھتے
وہ لوگ کون سے ہیں اے خدائے کون و مکاں
سخن سے کان کو جو آشنا نہیں رکھتے
زندگی میں تو نہ اک دم خوش کیا ہنس بول کر
آج کیوں روتے ہیں میرے آشنا میرے لیے

یگانہ چنگیزی

نگاہِ یاس ہی گویا دو بارہ زندگی پائی
جو چونکا خوابِ غفلت کے مزے سے آشنا ہو کر
اپنی ہستی خود ہم آغوش فنا ہو جائے گی
موجِ دریا آب ساحل آشنا ہو جائے گی

باقی صدیقی

غمِ جہاں کی خبر اس طرح بھی ہم کو ملی
کہ رنگ اڑا ہوا اک درد آشنا کا تھا
بات کی داستان کیا معنی
درد تھا درد آشنا کے ساتھ
کلی کلی کی صدا گونجنے لگی دل میں
جہاں بھی کوئی چمن آشنا نظر آیا

جون ایلیا

ایک سرود روشنی نیمۂ شب کا خواب تھا
ایک خموش تیرگی سانحہ آشنا بھی تھی

جگر مراد آبادی

یا رب نگاہ شوق کو دے اور وسعتیں
گھبرا اٹھے جمال جہت آشنا سے ہم
یہ کون چھا گیا ہے دل و دیدہ پر کہ آج
اپنی نظر میں آپ ہیں نا آشنا سے ہم
بے کراں ہوتا نہیں بے انتہا ہوتا نہیں
قطرہ جب تک بڑھ کے قلزم آشنا ہوتا نہیں
درد سے معمور ہوتی جا رہی ہے کائنات
اک دلِ انساں مگر درد آشنا ہوتا نہیں
ہر قدم کے ساتھ منزل لیکن اس کا کیا علاج
عشق ہی کم بخت منزل آشنا ہوتا نہیں
وہ کافر آشنا نا آشنا یوں بھی ہے اور یوں بھی
ہماری ابتدا تا انتہا یوں بھی ہے اور یوں بھی

شکیب جلالی

بٹا سکے ہیں پڑوسی کسی کا درد کبھی!
یہی بہت ہے کہ چہرے سے آشنا ہے کوئی

عرفان صدیقی

طاقِ تنہائی سے اٹھتا تھا چراغوں کا دھواں
اور مرے ہونے سے مجھ کو آشنا کرتا تھا رات
گزرنے والے جہازوں کو کیا خبر ہے کہ ہم
اسی جزیرۂ بے آشنا میں زندہ ہیں
سفینہ ڈوب چکے گا تو روئدادِ سفر
کسی جزیرۂ بے آشنا پہ لکھیں گے
سماعتوں میں کوئی حرف آشنا بھی نہ آئے
میں چپ رہوں تو یہ بھولی ہوئی صدا بھی نہ آئے

مصطفی زیدی

کبھی ستاروں نے بھیجا ہمیں کوئی پیغام
تو مدتوں میں کسی آشنا سے باتیں کیں

الطاف حسین حالی

ایک بیگانہ وار کر کے نگاہ
کیا کیا چشم آشنا تو نے
دل کو درد آشنا کیا تو نے
دردِ دل کو دوا کیا تو نے
قطع ہونے ہی جب لگا پیوند
غیر کو آشنا کیا تو نے

جمال احسانی

سو کس سے کیجیے ذکرِ نزاکت خد و خال
کوئی ملا ہی نہیں صورت آشنا اس کا

احسان دانش

نہ جانے کس کس سے دل لگا کر وفا سے مایوس ہو چکا ہوں
نظر پریشان شش جہت ہے کوئی بھی درد آشنا نہیں ہے

اختر شیرانی

آشنا ہو کر تغافل آشنا کیوں ہو گئے
باوفا تھے تم تو آخر بے وفا کیوں ہو گئے
تم تو کہتے تھے کہ ہم تجھ کو نہ بھولیں گے کبھی
بھول کر ہم کو تغافل آشنا کیوں ہو گئے
ہم تمہارا دردِ دل سن سن کے ہنستے تھے کبھی
آج روتے ہیں کہ یوں درد آشنا کیوں ہو گئے

اسرار الحق مجاز

روح ہوتی ہے کیف پرور بھی
اور درد آشنا بھی ہوتی ہے
کوئی دل سا درد آشنا چاہتا ہوں
رہِ عشق میں رہنما چاہتا ہوں

بیخود بدایونی

اف رے نا آشنائیاں اس کی
چار دن بھی تو آشنا نہ رہا
وہ نا آشنا بے وفا میری ضد سے
زمانے کا اب آشنا ہو رہا ہے

زہرا نگاہ

اک وسعتِ خیال کہ لفظوں میں گھر گئی
لہجہ کبھی جو ہم کو کرم آشنا ملا

ضیا جالندھری

عجب سکون تھا شب آنسوؤں کی بارش میں
وہ غم گسار وہ درد آشنا ہے تنہائی

ظہیر کاشمیری

جس سے ہجوم غیر میں ہوتی ہیں چشمکیں
اس اجنبی نگاہ سے بھی آشنا کرو
مرا ہی بن کے وہ بت مجھ سے آشنا نہ ہوا
وہ بے نیاز تھا اتنا تو کیوں خدا نہ ہوا

عالم تاب تشنہ

گزرنا ہے جسے صحرا سے ہو کر
میں اس دریا کے دکھ سے آشنا ہوں

عبید اللہ علیم

تم ہی کہو کہ ہو بھی سکے گا مرا علاج
اگلی محبتوں کے مرے زخم آشنا

احمد راہی

جیسے ہو کوئی چہرہ نیا اس کے روبرو
یوں دیکھتا رہا مرا ہر آشنا مجھے

ماجد صدیقی

جھلسے بدن کو گاہ نمو آشنا کرے
کیا کیا سلوک ہم سے چمن کی ہوا کرے
اجنبی تھا وہ مجھ سے ملا بھی نہ تھا
اس سا لیکن کوئی آشنا بھی نہ تھا

تلوک چند محروم

بے جا نہیں رکھوں جو میں محرومؔ اپنا نام
مجھ سے اگر نہ وہ بت نا آشنا ملے

جوش ملیح آبادی

یہ بھی عجب طلسم ہے اے شورش حیات
درد آشنا کی بات نہ درد آشنا سنے

حسرت موہانی

میں کبھی تجھ سے بد گماں نہ ہوا
تو کبھی مجھ سے آشنا نہ رہا
بیگانۂ ادب کیے دیتی ہے کیا کروں
اس محو ناز کی نگۂ آشنا مجھے
لگا کر آنکھ اس جانِ جہاں سے
نہ ہو گا اب کسی سے آشنا دل
توڑ کر عہد کرم نا آشنا ہو جائیے
بندہ پرور جائیے اچھا خفا ہو جائیے
میری تحریر ندامت کا نہ دیجے کچھ جواب
دیکھ لیجے اور تغافل آشنا ہو جائیے

سیماب اکبر آبادی

جب دور تک نہ کوئی فقیر آشنا ملا
تیرا نیاز مند ترے در سے جا ملا
سیمابؔ کو شگفتہ نہ دیکھا تمام عمر
کم بخت جب ملا ہمیں غم آشنا ملا
ادراک خود آشنا نہیں ہے
ورنہ انساں میں کیا نہیں ہے

شان الحق حقی

نظر چرا گئے اظہار مدعا سے مرے
تمام لفظ جو لگتے تھے آشنا سے مرے

فانی بدایونی

ظہورِ جلوہ کو ہے ایک زندگی درکار
کوئی اجل کی طرح دیر آشنا نہ ملا
عشق سے ہوئے آگاہ صبر کی بھی حد دیکھی
خاک میں ملا دوگے دیر آشنا ہو کر
غم میں لذت کہاں کہ دل نہ رہا
ہائے وہ حسرت آشنا ہی نہیں
زباں مدعا آشنا چاہتا ہوں
دل اب زندگی سے خفا چاہتا ہوں
ادا کو ادا آشنا چاہتا ہوں
تجھی پر تجھے مبتلا چاہتا ہوں
ترے دل کو درد آشنا چاہتا ہوں
بھلا چاہتا ہوں برا چاہتا ہوں

اختر ہوشیارپوری

ہمیں زمانے نے کیا کیا نہ آئنے دکھلائے
مگر وہ عکس جو آئینہ آشنا نہ ہوا
ہر چند سینے میں دل کفر آشنا نہیں
میں اس کو پوجتا ہوں جو میرا خدا نہیں
کیا کیا نہ اپنے ساتھ زمانوں کو لائی ہے
وہ اک نگاہ جس سے کوئی آشنا نہیں
جو مجھ کو دیکھ کے کل رات رو پڑا تھا بہت
وہ میرا کچھ بھی نہ تھا پھر بھی آشنا تھا بہت
شکست و ریخت بدن کی اب اپنے بس میں نہیں
اسے بتاؤں کہ وہ رمز آشنا تھا بہت

احمد فراز

تیور تھے بے رخی کے انداز دوستی کے
وہ اجنبی تھا لیکن لگتا تھا آشنا سا
وہ اجنبی تھا تو کیوں مجھ سے پھیر کر آنکھیں
گزر گیا کسی دیرینہ آشنا کی طرح
چٹخ اٹھا ہو سلگتی چٹان کی صورت
پکار اب تو مرے دیر آشنا مجھ کو
جگنو کی روشنی سے بھی کیا کیا بھڑک اٹھی
اس شہر کی فضا کہ چراغ آشنا نہ تھی
یہ قربتوں میں عجب فاصلے پڑے کہ مجھے
ہے آشنا کی طلب آشنا کے ہوتے ہوئے
خزاں میں چاکِ گریباں تھا میں بہار میں تو
مگر یہ فصل ستم آشنا کسی کی نہیں
ہر ایک شعر نہ تھا در خور قصیدۂ دوست
اور اس سے طبعِ رواں خوب آشنا تھی مری
یہی تو آشنا بنتے ہیں آخر
کوئی نا آشنا دیکھا نہ جائے

امیر مینائی

درد باقی، غم سلامت ہے ، مگر اب دل کہاں
ہائے وہ غمِ دوست، وہ درد آشنا جاتا رہا
یوں دل مرا ہے اس صنمِ دلربا کے پاس
جس طرح آشنا کسی نا آشنا کے پاس
فنا کیسی بقا کیسی جب اس کے آشنا ٹھہرے
کبھی اس گھر میں آ نکلے کبھی اس گھر میں جا ٹھہرے
امیر آیا جو وقت بد تو سب نے راہ لی اپنی
ہزاروں سیکڑوں میں درد و غم دو آشنا ٹھہرے

شاذ تمکنت

میں تیرا دوست ہوں تو مجھ سے اس طرح تو نہ مل
برت یہ رسم کسی صورت آشنا کے لیے
میں اپنی روشنی طبع سے لرزتا ہوں
مرا جنوں مجھے منزل سے آشنا نہ کرے
یہ کس سے عشق ہوا کیوں ہوا تعجب ہے
وہ خوف ہے کہ کسی آشنا سے کچھ نہ کہا

قیوم نظر

بے گانگی نے یہ راز کھولا
تو میرا ازل سے آشنا ہے
تیری نگہ سے تجھ کو خبر ہے کہ کیا ہوا
دل زندگی سے بارِ دگر آشنا ہوا
نظرؔ اس کیفیت سے کون نکلے
ہوا وہ آشنا نا آشنا کیا

محبوب خزاں

زمانہ دیر فراموش تو نہیں اتنا
یہ ٹھیک ہے کہ بہت دیر آشنا ہوں میں

محسن احسان

مری شکست میں کیا کیا تھے مضمرات نہ پوچھ
عدو کا ہاتھ تھا اور چال آشنا کی تھی
کچھ اس قدر بھی زمانے میں قحط حرف نہ تھا
وہ آشنا تھا تو آواز آشنا سنتا

ناصر کاظمی

وہ اس ادا سے جو آئے تو کیوں بھلا نہ لگے
ہزار بار ملو پھر بھی آشنا نہ لگے
جبیں پہ دھوپ سی آنکھوں میں کچھ حیا سی ہے
تو اجنبی ہے مگر شکل آشنا سی ہے
کون اٹھاتا شبِ فراق کے ناز
یہ بلا آشنا ہمیں سے ہوئی
ہر کوئی اپنے غم میں ہے مصروف
کس کو درد آشنا کہے کوئی