ترے عاشق نے بھی پایا ہے کیا دل
حسرت موہانی
قوی دل شادماں دل پارسا دل
ترے عاشق نے بھی پایا ہے کیا دل
لگا دو آگ عذر مصلحت کو
کہ ہے بے زار اس شے سے مرا دل
جفاکاری ہے تسلیم ستم بھی
نہ ہو گا تابع جور و جفا دل
لگا کر آنکھ اس جانِ جہاں سے
نہ ہو گا اب کسی سے آشنا دل
مٹے افکار گوناگوں کے جھگڑے
ترے غم کو نہ دے کیونکر دعا دل
نہ پہنچے گی کبھی کیا گوشِ گل تک
قفس سے اڑ کے فریاد عنا دل
تو انائے صداقت ہے تو ہرگز
نہ ہو گا پیرو باطل مرا دل
بڑی درگاہ کا سائل ہوں حسرتؔ
بڑی امید ہے میری بڑا دل
مفاعیلن مفاعیلن فَعُولن
ہزج مسدس محذوف