مرزا غالب

حسن غمزے کی کشاکش سے چھٹا میرے بعد
بارے آرام سے ہیں اہلِ جفا میرے بعد
کی وفا ہم سے تو غیر اس کو جفا کہتے ہیں
ہوتی آئی ہے کہ اچھوں کو برا کہتے ہیں
میں ہوں مشتاقِ جفا، مجھ پہ جفا اور سہی
تم ہو بیداد سے خوش، اس سے سوا اور سہی
گو سمجھتا نہیں پر حسنِ تلافی دیکھو
شکوۂِ جور سے سر گرمِ جفا ہوتا ہے

بہادر شاہ ظفر

کرتے ہیں وہ اس طرح ظفرؔ دل پہ جفائیں
ظاہر میں یہ جانو کہ جفا کچھ نہیں کرتے

داغ دہلوی

منہ لگاتے ہی داغؔ اترایا
لطف ہے پھر جفا کرے کوئی
اس ادا سے وہ جفا کرتے ہیں
کوئی جانے کہ وفا کرتے ہیں

مصحفی غلام ہمدانی

کیجیے ظلم سزا وار جفا ہم ہی ہیں
کھینچیے تیغ کہ مدت سے فدا ہم ہی ہیں

مصطفٰی خان شیفتہ

مطبوع یار کو ہے جفا اور جفا کو ہم
کہتی ہے بد عدو کو وفا اور وفا کو ہم
موجود ہے جو لاؤ جو مطلوب ہے وہ لو
مشتاقِ وفا تم ہو طلب گارِ جفا ہم
گر غیر بھی ہو وقفِ ستم تو ہے مسلم
کچھ تم سے بجز جور و جفا ہو نہیں سکتا
دو دن میں تنگ ہو گئے جورِ سپہر سے
اس حوصلے پہ کرتے تھے اس کی جفا سے ربط

مومن خان مومن

الٹے وہ شکوے کرتے ہیں اور کس ادا کے ساتھ
بے طاقتی کے طعنے ہیں عذر جفا کے ساتھ
اگر غفلت سے باز آیا جفا کی
تلافی کی بھی ظالم نے تو کیا کی
مرے آغاز الفت میں ہم افسوس
اسے بھی رہ گئی حسرت جفا کی
امتحاں کے لیے جفا کب تک
التفات ستم نما کب تک

میر مہدی مجروح

ہم غنیمت اسی کو سمجھیں گے
لو وفا وعدۂِ جفا کیجے

فیض احمد فیض

کچھ امتحانِ دستِ جفا کر چکے ہیں ہم
کچھ ان کی دسترس کا پتا کر چکے ہیں ہم

عرفان صدیقی

گھلا تصویر میں رنگِ حنا آہستہ آہستہ
بڑھی سر کی طرف تیغِ جفا آہستہ آہستہ
بہت کچھ دوستو‘ بسمل کے چپ رہنے سے ہوتا ہے
فقط اس خنجرِ دستِ جفا سے کچھ نہیں ہوتا
اک سیلِ خوں تھا اور خدا کی زمین پر
کوئی گواہ تیغِ جفا کے سوا نہ تھا
لوگ خود جان گنوا دینے پہ آمادہ تھے
اس میں تیرا ہنر اے دستِ جفا کچھ بھی نہ تھا
برگِ گل سے کون سا خطرہ کماں داروں کو تھا
پھول کی گردن میں کیوں تیرِ جفا مارا گیا
میں اپنے سینے سے شرمندہ ہونے والا تھا
کہ آ گیا کوئی تیرِ جفا نشانے پر
فرض سے کوئی سبک دوش نہیں ہو پاتا
سرِ تسلیم بھی چپ، تیغِ جفا بھی خاموش
سورج کا خون بہنے لگا پھر ترائی میں
پھر دستِ شب میں تیغِ جفا ہو گئی ہے شام
میں چاہتا تھا کہ کچھ سرکشی کی داد ملے
تو اب کے شہر میں تیغِ جفا چلی ہی نہیں
نہ موجِ خوں پہ، نہ تیغِ جفا پہ لکھیں گے
اب اک سخن ترے رنگِ حنا پہ لکھیں گے
ہمیں سرکشی کا سلیقہ عطا کر
مقدر میں تیغِ جفا لکھنے والے

الطاف حسین حالی

ایک عالم سے وفا کی تو نے اے حالیؔ مگر
نفس سے اپنے سدا ظالم جفا کرتا رہا

اسرار الحق مجاز

کہاں کا کرم اور کیسی عنایت
مجازؔ اب جفا ہی جفا چاہتا ہوں

بیخود بدایونی

کیوں میں اب قابل جفا نہ رہا
کیا ہوا کہیے مجھ میں کیا نہ رہا

حسرت موہانی

آپ کو اب ہوئی ہے قدرِ وفا
جب کہ میں لائق جفا نہ رہا
ان سے عرض کرم تو کیا کرتے
ہم سے خود شکوۂ جفا نہ ہوا
شرم کر شرم کہ اے جذبۂ تاثیر وفا
تیرے ہاتھوں وہ پشیمان جفا ہوتے ہیں
جفاکاری ہے تسلیم ستم بھی
نہ ہو گا تابع جور و جفا دل
ہاں یہی میری وفائے بے اثر کی ہے سزا
آپ کچھ اس سے بھی بڑھ کر پر جفا ہو جائیے
مرضی یار کے خلاف نہ ہو
کون کہتا ہے وہ جفا نہ کریں

شاد عظیم آبادی

اک پھر کے دیکھنے میں گئی سیکڑوں کی جاں
تیری ہر اک ادا میں بھری ہے جفا غرض
خاک میں جو ملا ہو خود اس پہ ستم سے کیا حصول
حسن کی یہ سرشت ہے ورنہ جفا کی وجہ کیا

شکیل بدایونی

تہمید ستم اور ہے تکمیل جفا اور
چکھنے کا مزا اور ہے پینے کا مزا اور

فانی بدایونی

کی وفا یار سے ایک ایک جفا کے بدلے
ہم نے گن گن کے لیے خونِ وفا کے بدلے

اختر ہوشیارپوری

دل میں اک جذبۂ بیداد و جفا ہی ہوگا
وہ خدا وند بھی ہوگا تو خدا ہی ہوگا

احمد فراز

خاموش ہو کیوں داد جفا کیوں نہیں دیتے
بسمل ہو تو قاتل کو دعا کیوں نہیں دیتے
تیرے چرچے ہیں جفا سے تیری
لوگ مر جائیں بلا سے تیری

امیر مینائی

جب یار ہوا جفا کے قابل
تب ہم نہ رہے وفا کے قابل

شاذ تمکنت

جفا جفا ہی اگر ہے تو رنج کیا ہو شاذؔ
وفا کی پشت پناہی بھی ہو جفا کے لیے
وفا کا ذکر ہی کیا ہے جفا بھی راس آئے
وہ مسکرائے تو جرم خطا بھی راس آئے

قیوم نظر

وہ کہاں مجھ پہ جفا کرتا تھا
جو مقدر تھا ملا کرتا تھا