مرزا غالب

گر تجھ کو ہے یقینِ اجابت ، دعا نہ مانگ
یعنی، بغیر یک دلِ بے مدعا نہ مانگ

امام بخش ناسخ

گل تجھے دیکھ کے گلشن میں کہیں عمرِ دراز
شاخ کے بدلے وہیں دستِ دعا پیدا ہو
نہ ہو کچھ آرزو مجھ کو خدایا
یہی ہر دم دعا ہے اور میں ہوں

حیدر علی آتش

مرے دل کو شوق فغاں نہیں مرے لب تک آتی دعا نہیں
وہ دہن ہوں جس میں زباں نہیں وہ جرس ہوں جس میں صدا نہیں

داغ دہلوی

کوستے ہیں جلے ہوئے کیا کیا
اپنے حق میں دعا کرے کوئی
تیر آخر بدل کافر ہے
ہم اخیر آج دعا کرتے ہیں

شیخ ابراہیم ذوق

مرض عشق جسے ہو اسے کیا یاد رہے
نہ دوا یاد رہے اور نہ دعا یاد رہے
دعائیں دیتے ہیں ہم دل سے تیغِ قاتل کو
لب جراحتِ دل کو لب دعا سمجھو

مصحفی غلام ہمدانی

تم میاں مصحفیؔ رخصت تو ہوئے
اب کھڑے کیوں ہو دعا کیجیے بس
نہ بولیں گے پیارے تری ہی سنیں گے
تو دشنام دے اب دعا کر چکے ہم
نہیں موقوف دعا اپنی تو کچھ بعد نماز
بیٹھتے اٹھتے جو مانگیں ہیں دعا ہم ہی ہیں
مصحفیؔ سے تو ملا دے اس کو
یہ اثر دستِ دعا تجھ میں ہے

مصطفٰی خان شیفتہ

دشنام بھی سنی نہ تمہاری زبان سے
ہے کوستی اثر کو دعا اور دعا کو ہم
آتا ہوں پیرِ دیر کی خدمت سے مست میں
ہاں زاہدو تمہارے لیے کیا دعا کروں

مومن خان مومن

مانگا کریں گے اب سے دعا ہجرِ یار کی
آخر تو دشمنی ہے اثر کو دعا کے ساتھ
ایک دشمن کہ چرخ ہے نہ رہے
تجھ سے یہ اے دعا نہیں ہوتا

فیض احمد فیض

جو نفس تھا خارِ گلو بنا، جو اٹھے تھے ہاتھ لہو ہوئے
وہ نشاطِ آہِ سحر گئی، وہ وقار دستِ دعا گیا
لمسِ جانانہ لیے ، مستیِ پیمانہ لیے
حمدِ باری کو اٹھے دستِ دعا آخرِ شب

یگانہ چنگیزی

رہے دنیا میں محکوم دلِ بے مدعا ہو کر
خوشا انجام اٹھے بھی تو محروم دعا ہو کر
دامن قاتل جو اڑ اڑ کر ہوا دینے لگے
کیا بتاؤں زخمِ دل کیا کیا دعا دینے لگے

باقی صدیقی

طوف کعبہ کو گئے تو باقیؔ
میرے حق میں بھی دعا کیجے گا

جون ایلیا

آپ تھے جس کے چارہ گر وہ جواں
سخت بیمار ہے دعا کیجے
کچھ تو رشتہ ہے تم سے کم بختوں
کچھ نہیں کوئی بد دعا بھیجو
لاکھ جنجال مانگنے میں ہیں
کچھ نہ مانگو فقط دعا مانگو

عبدالحمید عدم

کاش مجھ کو کوئی بتائے عدمؔ
کس پری وش کی بد دعا ہوں میں

قمر جلالوی

تیرے بیمار کی حالت نہیں دیکھی جاتی
اب تو احباب بھی مرنے کی دعا کرتے ہیں
تجھے خود خبر ہے ظالم کہ جہانِ رنگ و بو میں
ترے حسن کے ہیں چرچے مرے عشق کو دعا دے
مجھ پہ احسان نہ رکھو جان بچا لینے کا
مرنے دیتے مجھے کاہے کو دعا دی تو نے

عرفان صدیقی

وہ کوئی اور ہے جو پیاس بجھاتا ہے مری
ابر پھیلا ہوا دامان دعا لگتا ہے
نخلِ مراد کے لیے فصلِ دعا بھی چاہیے
تابِ نمو تو ہم میں ہے ، آب و ہوا بھی چاہیے
چلو‘ اب آسماں سے اور کوئی رابطہ سوچیں
بہت دن ہو گئے حرفِ دعا سے کچھ نہیں ہوتا
دو لرزتے ہاتھ جیسے سایہ پھیلائے شجر
کانپتے ہونٹوں پہ اک حرفِ دعا، جیسے ہوا
اور کیا مجھ کو مرے دیس کی دھرتی دیتی
ماں کا سرمایہ بجز حرفِ دعا کچھ بھی نہ تھا
چھٹ گیا آشفتگاں کے ہاتھ سے دامانِ صبر
سینۂ صد چاک پر دستِ دعا مارا گیا
خدا سے آخری رشتہ بھی کٹ نہ جائے کہیں
کہ اب کے ہے مرا دستِ دعا نشانے پر
بے چارے چارہ سازی آزار کیا کریں
دو ہاتھ ہیں سو محوِ دعا ہونے والے ہیں
دل و زباں میں کبھی جیسے رابطہ ہی نہ تھا
اٹھے بھی ہاتھ تو رسمِ دعا چلی ہی نہیں
ہم کون شناور تھے کہ یوں پار اترتے
سوکھے ہوئے ہونٹوں کی دعا لے گئی ہم کو
ننھے ہونٹوں پر کھلیں معصوم لفظوں کے گلاب
اور ماتھے پر کوئی حرفِ دعا روشن کرے
بہت بے اماں پھر رہے ہیں مسافر
کہاں ہیں خطوں میں دعا لکھنے والے
اب نمودار ہو اس گرد سے اے ناقہ سوار
کب سے بستی ترے ملنے کی دعا کرتی ہے
کیسے آشوب میں زندہ ہے مرادوں کی طرح
جانے بھاگوں بھری بستی پہ دعا کس کی ہے
بند ہیں اس شہرِ ناپرساں کے دروازے تمام
اب مرے گھر اے مری ماں کی دعا لے چل مجھے
یہ کس نے دستِ بریدہ کی فصل بوئی تھی
تمام شہر میں نخلِ دعا نکل آئے
یہ سفر کتنا اکیلا ہے کہ عادت تو نہ تھی
دور تک ساتھ کوئی حرفِ دعا بھی آئے