مرزا غالب

گلہ ہے شوقِ کو دل میں بھی تنگی جا کا
گہر میں محو ہوا اضطراب دریا کا
غمِ فراق میں تکلیف سیر باغ نہ دو
مجھے دماغ نہیں خندہ ہائے بے جا کا
داد دیتا ہے مرے زخمِ جگر کی ، واہ واہ !
یاد کرتا ہے مجھے ، دیکھے ہے وہ جس جا نمک
افسردگی نہیں طرب انشائے التفات
ہاں درد بن کے دل میں مگر جا کرے کوئی
چال جیسے کڑی کمان کا تیر
دل میں ایسے کے جا کرے کوئی
فشار تنگی خلوت سے بنتی ہے شبنم
صبا جو غنچے کے پردے میں جا نکلتی ہے
لاغر اتنا ہوں کہ گر تو بزم میں جا دے مجھے
میرا ذمہ، دیکھ کر گر کوئی بتلا دے مجھے

انشاء اللہ خان انشا

دم ذرا سادھ کے لیتے ہیں پھریری تو ابھی
سون کھینچی ہوئی لاہوت کو جا سکتے ہیں

حیدر علی آتش

مرے آگے اس کو فروغ ہو یہ مجال کیا ہے رقیب کی
یہ ہجوم جلوۂِ یار ہے کہ چراغ خانہ کو جا نہیں
ثابت دہنِ یار دلیلوں سے کر آتشؔ
حجت کی جو شاعر کے لیے جا ہے تو یہ ہے
کعبے سے دیر دیر سے کعبے کو جا چکے
کیا کیا نہ اس دوراہے میں ہم پھیر کھا چکے
مجبور کر دیا ہے محبت نے یار کی
باہر ہم اختیار سے ہیں اپنے جا چکے

داغ دہلوی

ان کے گھر داغؔ جا کے دیکھ لیا
دل کے کہنے میں آ کے دیکھ لیا

شیخ ابراہیم ذوق

کیا تڑپنا دل بسمل کا بھلا لگتا ہے
کہ جب اچھلے ہے ترے سینے سے جا لگتا ہے
قد مجنوں کوئی پہلے سے چھڑی بید کی ہے
جب ذرا جھکتا ہے قد پاؤں سے جا لگتا ہے
طائر قبلہ نما بن کے کہا دل نے مجھے
کہ تڑپ کر یوں ہی مر جائے گا جا یاد رہے

مصحفی غلام ہمدانی

مصحفیؔ اس دلچسپ زمیں میں طبع کرے گر تیری رسائی
خامہ ترا کچھ کند نہیں ہے ایک غزل تو اور بھی لکھ جا
نہ نسیم باغ و بہار ہوں نہ فدائے روئے نگار ہوں
میں غریبِ شہر و دیار ہوں مری دیر و کعبہ میں جا نہیں
صفائے سینہ سے پھسلا نہ کب دلِ عاشق
کہ چاہ ناف میں وہ خوں گرفتہ جا نہ رہا
ہم تو اس کوچے میں گھبرا کے چلے آتے ہیں
دو قدم جاتے ہیں پھر جا کے چلے آتے ہیں

مصطفٰی خان شیفتہ

ترے فسوں کی نہیں میرے دل میں جا واعظ
صنم پرست نہ ہو بندہ ریا واعظ

مومن خان مومن

جائے تھی تیری مرے دل میں سو ہے
غیر سے کیوں شکوۂِ بے جا کیا
میں بولوں تو چپ ہوتے ہیں اب آپ جبھی تک
یہ رنجشِ بے جا ہے کہ میں کچھ نہیں کہتا
اس کو میں ٹھہرنے نہ دیا جوش قلق نے
اغیار سے ہم شکوۂِ بے جا نہ کریں گے

میر مہدی مجروح

اپنا کینہ بنوں کہ یاد رقیب
کس طرح اس کے دل میں جا کیجے

جون ایلیا

وفا کی یادگاریں تک نہ ہوں گی
مری جاں بس کوئی دن جا رہے ہیں
ہر طرف ایک حشر برپا ہے
جونؔ خود سے نکل کے جا ہی نہیں
ہے کون جو تیرا دھیان رکھے
باہر مرے بس کہیں نہ جا تو
تم سے بھی اب تو جا چکا ہوں میں
دور ہا دور آ چکا ہوں میں
در مطلب ہے کیا طلب انگیز
کچھ نہیں واں سو کچھ بھی جا مانگو

جگر مراد آبادی

محبت میں یہ کیا مقام آ رہے ہیں
کہ منزل پہ ہیں اور چلے جا رہے ہیں
وہ از خود ہی نادم ہوئے جا رہے ہیں
خدا جانے کیا کیا خیال آ رہے ہیں
وہ عالم ہے اب یارو اغیار کیسے
ہمیں اپنے دشمن ہوئے جا رہے ہیں

خواجہ میر درد

یارب یہ کیا طلسم ہے ادراک و فہم یاں
دوڑے ہزار آپ سے باہر نہ جا سکے

عبدالحمید عدم

وہ سورج اتنا نزدیک آ رہا ہے
مری ہستی کا سایہ جا رہا ہے
کچھ ایسے آئی ہے بادِ موافق
کنارا دور ہٹتا جا رہا ہے
ضرورت ہے کہ بڑھتی جا رہی ہے
زمانہ ہے کہ گھٹتا جا رہا ہے
نہ جاتے آپ تو آغوش کیوں تہی ہوتی
گئے تو آپ نے پہلو سے جا کے مار دیا
جس سے چھپنا چاہتا ہوں میں عدمؔ
وہ ستم گر جا بہ جا موجود ہے
چبھتی ہے قلب و جاں میں ستاروں کی روشنی
اے چاند ڈوب جا کہ طبیعت اداس ہے
میں نے کبھی یہ ضد تو نہیں کی پر آج شب
اے مہ جبیں نہ جا کہ طبیعت اداس ہے
یوں ہی درست ہو گی طبیعت تری عدمؔ
کمبخت بھول جا کہ طبیعت اداس ہے

شکیب جلالی

رختِ جاں کوئی لٹانے ادھر آبھی نہ سکے
ایسے مشکل تو نہیں دشتِ وفا کے جادے

عرفان صدیقی

خیر، دلی میں تو اوراقِ مصور تھے بہت
لاؤ، اس شہر کی گلیوں میں بھی جا کر دیکھیں

مجید امجد

دلوں پہ ظالم یکساں سچ کا پہرا ہے
کوئی تو جھوٹی ریت نبھا جا دنیا کی

احسان دانش

جو روکنا ہو تو آ بڑھ کے روک لے ورنہ
ترے حدود تغافل سے جا رہا ہے کوئی

اختر شیرانی

غم عاقبت ہے نہ فکر زمانہ
پئے جا رہے ہیں جیے جا رہے ہیں
وہ رشک بہار آنے والا ہے اخترؔ
کنول حسرتوں کے کھلے جا رہے ہیں

زہرا نگاہ

ہر آستاں پہ لکھا ہے اب نام شہر یار
وابستگان دل کے لیے کوئی جا نہیں

ضیا جالندھری

کشکول ہے تو لا ادھر آ کر لگا صدا
میں پیاس بانٹتا ہوں ضرورت نہیں تو جا

ظہیر کاشمیری

بیان دوست ناصح کی زباں سے
طبیعت اور مچلی جا رہی ہے

ماجد صدیقی

ہاں ہاں مجھے ضیائے تخیل عطا ہوئی
ایسا کوئی ملے بھی تو اس دل میں جا کرے

تلوک چند محروم

سب آپ کے تغافل و جور و جفا بجا
ہے ایک اپنا شکوہ کہ بے جا کہیں جسے
خاطر سے میری آپ اٹھائیں نہ غیر کو
محفل میں جا ملے نہ ملے دل میں جا ملے

جلیل مانک پوری

جلیلؔ یار کے در تک گزر نہیں نہ سہی
ہزار شکر کہ ہے اس کے دل میں جا تیری

ثروت حسین

شجر ہیں اور اس مٹی سے پیوستہ رہیں گے
جو ہم میں سے نہیں آسائشوں سے جا ملے گا

حسرت موہانی

ہم رہے یاں تک تری خدمت میں سرگرم نیاز
تجھ کو آخر آشنائے ناز بے جا کر دیا
ہم غرض مند کہاں مرتبۂ عشق کہاں
ہم کو سمجھیں وہ ہوس کار تو بے جا کیا ہو
تمہاری فتنہ پردازی کا شکوا
جو ہم کرتے تو کچھ بے جا نہ کرتے

حفیظ جالندھری

زہے وہ گوشۂ راحت کہ جس میں
ہجوم رنج لے کر جا رہا ہوں
نہیں کانٹے بھی کیا اجڑے چمن میں
کوئی روکے مجھے میں جا رہا ہوں
اک بار پھر وطن میں گیا جا کے آ گیا
لختِ جگر کو خاک میں دفنا کے آ گیا
کیوں ارضِ وطن تنگ ہے یہ بات ہی کیا ہے
اب تو فقط اک قبر کی جا دیکھ رہا ہوں

سیماب اکبر آبادی

جب دور تک نہ کوئی فقیر آشنا ملا
تیرا نیاز مند ترے در سے جا ملا
بھلا رہا ہے کسی کو تو بر بنائے مآل
یہ غور کر کہ بھلایا بھی جا رہا ہے کوئی

شاد عظیم آبادی

دلا بہت نہ الجھ نامہ بر کو کیا میں نے
سکھا دیا تھا کہ جانا تو جا کے رہ جانا
کسی طرح تو یہ جسم کثیف پاک ہو شاد
گلی میں یار کی جانا تو جا کے رہ جانا

شکیل بدایونی

خبر کی تھی گلستان محبت میں بھی خطرے ہیں
جہاں گرتی ہے بجلی ہم اسی ڈالی پہ جا بیٹھے
مچل مچل کے میں کہتا ہوں بیٹھیے تو سہی
سنبھل سنبھل کے وہ کہتے ہیں جا رہا ہوں میں
بے قید و رسوم آئی ہیں گلشن میں بہاریں
اب ہاتھ گریباں کی طرف جا نہیں سکتے
تفسیر دو‌ عالم ہے شکیلؔ اپنا تغزل
میدان غزل چھوڑ کے ہم جا نہیں سکتے
کتنی حسیں ہیں ان کے ستم کی مسرتیں
شکر کرم کی زحمت بے جا سے بچ کے چل

فانی بدایونی

ہر سانس کے ساتھ جا رہا ہوں
میں تیرے قریب آ رہا ہوں
ضد اور یہ ضد اے دل اچھا تو خدا حافظ
قربان ہی اس بت پر ہوتا ہے تو جا ہو جا

احمد فراز

تپتے صحراؤں پہ گرجا، سرِ دریا برسا
تھی طلب کس کو مگر ابر کہاں جا برسا
دیدہ و دل تو ترے ساتھ ہیں اے جانِ فراز
اپنے ہمراہ مگر خواب نہ لے جا میرے
نہ دل سے آہ نہ لب سے صدا نکلتی ہے
مگر یہ بات بڑی دور جا نکلتی ہے
وصال و ہجر کی حسرت میں جوئے کم مایہ
کبھی کبھی کسی صحرا میں جا نکلتی ہے
اک مہرباں بزرگ نے یہ مشورہ دیا
دکھ کا کوئی علاج نہیں جا شراب پی

امیر مینائی

فنا کیسی بقا کیسی جب اس کے آشنا ٹھہرے
کبھی اس گھر میں آ نکلے کبھی اس گھر میں جا ٹھہرے

شاذ تمکنت

جب کوئی پاسِ مروت سے کرم کرتا ہے
یاد آتی ہے بہت رنجشِ بے جا تیری

فراق گورکھپوری

مہربانی کو محبت نہیں کہتے اے دوست
آہ اب مجھ سے تری رنجشِ بے جا بھی نہیں
ستاروں سے الجھتا جا رہا ہوں
شبِ فرقت بہت گھبرا رہا ہوں
ترے غم کو بھی کچھ بہلا رہا ہوں
جہاں کو بھی سمجھتا جا رہا ہوں
خبر ہے تجھ کو اے ضبط محبت
ترے ہاتھوں میں لٹتا جا رہا ہوں
اثر بھی لے رہا ہوں تیری چپ کا
تجھے قائل بھی کرتا جا رہا ہوں
ترے پہلو میں کیوں ہوتا ہے محسوس
کہ تجھ سے دور ہوتا جا رہا ہوں
محبت اب محبت ہو چلی ہے
تجھے کچھ بھولتا سا جا رہا ہوں
اب میں ہوں اور لطف و کرم کے تکلفات
یہ کیوں حجاب رنجشِ بے جا بنا دیا
نگاہِ مہر میں جس کی ہیں صد پیام فنا
اسی کا عالمِ ایجاد و ناز بے جا تھا
پردۂ آزردگی میں تھی وہ جان التفات
جس ادا کو رنجشِ بے جا سمجھ بیٹھے تھے ہم

قتیل شفائی

دریائے فرات ہے یہ دنیا
پیاسا ہی پلٹ کے جا رہا ہوں
خیال آتا ہے بازاروں کی رونق دیکھ کر مجھ کو
بھرے دریا میں تنکا بن کے بہتا جا رہا ہوں میں
تری آغوش چھوٹی تو ملی وہ بد دعا مجھ کو
کہ اب اپنی ہی بانہوں میں سمٹتا جا رہا ہوں میں
ہمیں پتوار اپنے ہاتھ میں لینے پڑیں شاید
یہ کیسے ناخدا ہیں جو بھنور تک جا نہیں سکتے

کیفی اعظمی

بن جائیں گے زہر پیتے پیتے
یہ اشک جو پیتے جا رہے ہو
جن زخموں کو وقت بھر چلا ہے
تم کیوں انہیں چھیڑے جا رہے ہو

ناصر کاظمی

کرم اے صرصرِ آلامِ دوراں
دلوں کی آگ بجھتی جا رہی ہے
کیوں چمن چھوڑ دیا خوشبو نے
پھول کے پاس تو جا کر دیکھو
عجیب خواب دکھاتے ہیں ناخدا ہم کو
غرض یہ ہے کہ سفینہ کنارے جا نہ لگے
کسے ڈھونڈو گے ان گلیوں میں ناصر
چلو اب گھر چلیں دن جا رہا ہے
باغ ترا باغباں، تو ہے عبث بدگماں
مجھ کو تو اے مہرباں، تھوڑی سی جا چاہیے
بنے بنائے ہوئے راستوں پہ جا نکلے
یہ ہم سفر مرے کتنے گریز پا نکلے

نوح ناروی

وقت پر کام نہ آیا دلِ ناشاد کبھی
ٹوٹ کر یہ بھی اسی شوخ سے جا ملتا ہے