مجھ پہ مائل بہ کرم ہے ‘ تو دلِ دریا دے
شکیب جلالی
جو بھی ہے طالبِ یک ذرہ‘ اسے صحرا دے
مجھ پہ مائل بہ کرم ہے ‘ تو دلِ دریا دے
کب سے ہوں حسرتیِ یک نگہِ گرم‘ کہ جو
محفلِ شوق کے آداب مجھے سمجھا دے
خلشِ غم سے مری جاں پہ بنی ہے ‘ جیسے
ریشمی شال کو کانٹوں پہ کوئی پھیلا دے
رختِ جاں کوئی لٹانے ادھر آبھی نہ سکے
ایسے مشکل تو نہیں دشتِ وفا کے جادے
بیتی یادوں کا تقاضا تو بجا ہے ‘ لیکن
گردشِ شام و سحر کیسے کوئی ٹہرا دے
مجھ کو زنداں میں بھی مل جائے گا عنوانِ جنوں
نکہتِ گل کو کریں قید خیاباں زادے
فاعِلاتن فَعِلاتن فَعِلاتن فِعْلن
رمل مثمن مخبون محذوف مقطوع