مرزا غالب

عرض کیجیے جوہرِ اندیشہ کی گرمی کہاں؟
کچھ خیال آیا تھا وحشت کا، کہ صحرا جل گیا
لختِ جگر سے ہے رگِ ہر خار شاخِ گل
تا چند باغبانی صحرا کرے کوئی
سر پر ہجومِ دردِ غریبی سے ڈالیے
وہ ایک مشتِ خاک کہ صحرا کہیں جسے

حیدر علی آتش

گوہر آبلہ ہوئے تو چلے
لیں گے دیوانو خار صحرا لوٹ
بزمِ عالم ہے توجہ سے اسی کے آباد
شہر ویراں ہے اگر جانب صحرا ہے وہ رخ

مصحفی غلام ہمدانی

مصحفیؔ کر کے چاکِ گریباں چل جنگل کو اے دیوانے
دیکھ تو کیا پھولا ہے لالہ سرخ ہے کیسا دامنِ صحرا
قیس ملے تو اس سے پوچھوں کیا ترے جی میں آئی دوانے
شہر کو تو نے کس لیے چھوڑا کیوں کے خوش آیا تجھ کو صحرا
قیس و فرہاد کو جاگیر یہی عشق نے دی
ایک کو کوہ ملا ایک کو صحرا بھیجا

مصطفٰی خان شیفتہ

گاؤں بھی ہم کو غنیمت ہے کہ آبادی تو ہے
آئے ہیں ہم سخت پر آشوب صحرا دیکھ کر

باقی صدیقی

جلوہ لالہ و گل ہے دیوار
کبھی ملتے سرِ صحرا ہم کو
اتنا آباد کہ ہم شور میں گم
اتنا سنسان کہ صحرا کہیے
کبھی اک ذرے میں گم ہو جائیں
کبھی ہم وسعتِ صحرا مانگیں
گلشن میں بہاروں کی نہیں کوئی کمی
ہاں ہاتھ نہ کچھ آئے تو صحرا کہہ دے
جوش جنوں سے ربط وہ باقیؔ نہیں مگر
کیا دل کا اعتبار کہ صحرا ہے سامنے

جون ایلیا

مرشد کے جھوٹ کی تو سزا بے حساب ہے
تم چھوڑیو نہ شہر کو صحرا کیے بغیر

شکیب جلالی

جو بھی ہے طالبِ یک ذرہ‘ اسے صحرا دے
مجھ پہ مائل بہ کرم ہے ‘ تو دلِ دریا دے
جہاں تلک بھی یہ صحرا دکھائی دیتا ہے
مری طرح سے اکیلا دکھائی دیتا ہے

عرفان صدیقی

باندھ کر جانے کہاں لے گئی قسمت کی کمند
وہ چلا تھا کہ ذرا وسعتِ صحرا دیکھے

مصطفی زیدی

قدموں کو شوق آبلہ پائی تو مل گیا
لیکن بہ ظرف وسعتِ صحرا نہیں ملا

جمال احسانی

گر بہا آتے نہ دریاؤں میں ہم
آج ان آنکھوں سے صحرا دیکھتے

رئیس فروغؔ

کہہ رہے تھے لوگ صحرا جل گیا
پھر خبر آئی کہ دریا جل گیا
پیاسے آئے صحرا سے
پانی لاؤں دریا سے
مرا آنگن جس کے خواب سجے
کوئی ایسی لہر ہے صحرا میں
کوئی دریا ہے نہ صحرا اپنا
اپنے گھر میں ہے تماشا اپنا
ہوس کا رنگ زیادہ نہیں تمنا میں
ابھی یہ موج ہے بیگانگی کے صحرا میں

احسان دانش

اے کم نگاہ دیدۂ دل سے نگاہ کر
ہر ذرہ ہے حقیقت صحرا لیے ہوئے

زہرا نگاہ

وحشت میں بھی منت کش صحرا نہیں ہوتے
کچھ لوگ بکھر کر بھی تماشا نہیں ہوتے

ظہیر کاشمیری

عشق اک حکایت ہے سرفروش دنیا کی
ہجر اک مسافت ہے بے نگار صحرا کی
میں ہوں وحشت میں گم میں تیری دنیا میں نہیں رہتا
بگولا رقص میں رہتا ہے صحرا میں نہیں رہتا
ظہیرؔ اک رشتۂ وحشت لیے پھرتا ہے مجنوں کو
وگرنہ کوئی اپنے آپ صحرا میں نہیں رہتا
طلب آسودگی کی عرصۂ دنیا میں رکھتے ہیں
امید فصلِ گل ہے اور قدم صحرا میں رکھتے ہیں
ظہیرؔ ان دل زدوں کی عظمتیں دیکھو یہ پروانے
چراغ عشق روشن وادی و صحرا میں رکھتے ہیں

عالم تاب تشنہ

دل میں اٹھتے رہے یادوں کے بگولے تشنہؔ
مجھ میں سمٹا ہوا اک درد کا صحرا نکلا

احمد راہی

روٹھ کر بیٹھ گئی ہمت دشوار پسند
راہ میں اب کوئی جلتا ہوا صحرا بھی نہیں

اختر امام رضوی

ایک احساس ندامت سے لرز اٹھتا ہوں
جب رم موج مری وسعت صحرا دیکھے

تلوک چند محروم

پہلو میں دل ہے درد کی دنیا کہیں جسے
پر اس قدر اجاڑ کہ صحرا کہیں جسے

جوش ملیح آبادی

آ فصل گل ہے غرق تمنا ترے لیے
ڈوبا ہوا ہے رنگ میں صحرا ترے لیے

حفیظ جالندھری

دور سے آنکھیں دکھاتی ہے نئی دنیا مجھے
گلشنِ ہستی نظر آتا ہے اک صحرا مجھے

سیماب اکبر آبادی

خوش ہوں کہ جیسے گود میں ہے لعلِ شبِ چراغ
دامن میں اپنے لالۂ صحرا لیے ہوئے
جوش جنوں میں عالم وارفتگی نہ پوچھ
صحرا سے ہم گزر گئے صحرا لیے ہوئے
آشیاں بننے نہ پایا تھا کہ بجلی گر پڑی
باغ ابھی بسنے نہ پایا تھا کہ صحرا ہو گیا

شان الحق حقی

اے دل ترے خیال کی دنیا کہاں سے لائیں
ان وحشتوں کے واسطے صحرا کہاں سے لائیں
بساط آرزو تصویر صحرا ہو گئی آخر
وہ ہنگاموں کی بستی ہو کی دنیا ہو گئی آخر

شبلی نعمانی

جوشِ وحشت میں ہو کیا ہم کو بھلا شکر لباس
بس کفایت ہے جنوں دامنِ صحرا ہم کو

شکیل بدایونی

ملتی نہیں ہے راہ سکوں خوف و یاس میں
گلشن کی جستجو ہے تو صحرا سے بچ کے چل

عزیز حامد مدنی

پہلے مری وحشت کے یہ انداز بھی کم تھے
پہلے مجھے اندازۂ صحرا بھی نہیں تھا

فانی بدایونی

دل کی رت ایسی تو یاد یار نے بدلی نہ تھی
یہ چمن اجڑا ہی اس ڈھب سے کہ صحرا بن گیا
ظرف ویرانہ بہ قدر ہمت وحشت نہیں
لاؤ ہر ذرہ میں پیدا وسعتِ صحرا کریں
اللہ رے چشم ہوش کی کثرت پرستیاں
ذرے ہی رہ گئے کوئی صحرا نہیں رہا
ناصحا وسعت کاشانہ جنوں خیز نہیں
ورنہ کیا فرض ہے آوارۂ صحرا ہونا

اختر ہوشیارپوری

اپنے ہاتھوں اپنی آنکھیں بند کرنی پڑ گئیں
نگہت گل کے جلو میں گرد صحرا دیکھ کر
درد کا چڑھتا سمندر جسم کا کچا مکاں
اور ان کے درمیاں آواز کا صحرا بھی ہے

احمد فراز

چڑھتے دریاؤں میں طوفان اٹھانے والے
چند بوندیں ہی سر دامنِ صحرا برسا
مجھ کو اس ابرِ بہاری سے ہے کب کی نسبت
پر مقدر میں وہی پیاس کے صحرا میرے
ہر کوئی دل کی ہتھیلی پہ ہے صحرا رکھے
کس کو سیراب کرے وہ کسے پیاسا رکھے

شاذ تمکنت

نہ رو یوں شاذؔ آنکھیں جو دکھائیں دیکھتے جاؤٔ
نہ اتنا غم کرو یہ دل ہے صحرا ہو ہی جاتا ہے

فراق گورکھپوری

بات یہ ہے کہ سکون دلِ وحشی کا مقام
کنجِ زنداں بھی نہیں وسعتِ صحرا بھی نہیں
کہیں ہوں تیرے دیوانے ٹھہر جائیں تو زنداں ہے
جدھر کو منہ اٹھا کر چل پڑے صحرا سمجھتے ہیں
یہ کہہ کر آبلہ پا روندتے جاتے ہیں کانٹوں کو
جسے تلووں میں کر لیں جذب اسے صحرا سمجھتے ہیں

محسن احسان

میری سیرابی بھی میری تشنگی سے کم نہ تھی
میں مثالِ ابر آیا صورت صحرا گیا
جو لب کشا ہوں تو ہنگامۂ بہار ہوں میں
اگر خموش رہوں تو سکوت صحرا ہوں
تماشا اس برس ایسا ہوا ہے
سمندر سوکھ کر صحرا ہوا ہے
بگولے بام و در سے پوچھتے ہیں
ہمارے رقص کا صحرا کہاں ہے