مرزا غالب

گلہ ہے شوقِ کو دل میں بھی تنگی جا کا
گہر میں محو ہوا اضطراب دریا کا
نہ کہہ کہ گریہ بہ مقدار حسرتِ دل ہے
مری نگاہ میں ہے جمع و خرچ دریا کا
شوق ہے ’’ساماں طراز نازش ارباب عجز‘‘
ذرہ صحرا دست گاہ و قطرہ دریا آشنا
سینے کا داغ ہے وہ نالہ کہ لب تک نہ گیا
خاک کا رزق ہے وہ قطرہ کہ دریا نہ ہوا
شور جولاں تھا کنارِ بحر پر کس کا کہ آج
گردِ ساحل ہے بہ زخمِ موجۂِ دریا نمک
بہ قدر حسرتِ دل چاہیے ذوقِ معاصی بھی
بھروں یک گوشۂِ دامن گر آب ہفت دریا ہو
ہے چشمِ تر میں حسرتِ دیدار سے نہاں
شوقِ عناں گسیختہ، دریا کہیں جسے
ہوتا ہے نہاں گرد میں صحرا مرے ہوتے
گھستا ہے جبیں خاک پہ دریا مرے آگے

حیدر علی آتش

نور جو اس میں ہے خورشید میں وہ نور کہاں
یہ اگر حسن کا چشمہ ہے تو دریا ہے وہ رخ

مصحفی غلام ہمدانی

دیکھ تجلی حسن کی تیرے کوہ بہے جب ہو کر پانی
دیوانا سا بھاگا ووہیں چاکِ گریباں کر کے دریا
رو کے ان آنکھوں نے دریا کر دیا
ابر کو پانی سے پتلا کر دیا
رات دن تو ہے مری آغوش میں
میں ترا ساحل مرا دریا ہے تو

مصطفٰی خان شیفتہ

ناگہاں بادِ موافق شیفتہ چلنے لگی
جان پر کل بن رہی تھی شورِ دریا دیکھ کر

مومن خان مومن

دمِ بسمل یہ کس کے خوف سے ہم پی گئے آنسو
کہ ہر زخمِ بدن سے خون کا دریا نکل آیا

مرزا رفیع سودا

بہار باغ ہو مینا ہو جام صہبا ہو
ہوا ہو ابر ہو ساقی ہو اور دریا ہو
بھرا ہے اس قدر اے ابر دل ہمارا بھی
کہ ایک لہر میں روئے زمین دریا ہو

باقی صدیقی

کشتیاں ٹوٹ گئی ہیں ساری
اب لیے پھرتا ہے دریا ہم کو
موج ہاتھ آئے تو دریا مانگیں
دردِ دل مانگ کے پھر کیا مانگیں
رنگ ساحل کا نکھر آئے گا
دو گھڑی جانبِ دریا دیکھو
اب کناروں سے لگے رہتے ہیں
رخ بدلتے تھے یہ دریا پہلے
کہہ نہیں سکتے محبت میں سراب
دیر سے ہے ایک دریا سامنے
قطرہ ہے سامنے کہیں دریا ہے سامنے
دنیا بقدر خونِ تمنا ہے سامنے

جون ایلیا

سارے رشتے تشنہ ہیں
کیا میں دریا لگتا ہوں

جگر مراد آبادی

جب دیکھ نہ سکتے تھے تو دریا بھی تھا قطرہ
جب آنکھ کھلی قطرہ بھی دریا نظر آیا
دل آگاہ میں کیا کہیے جگرؔ کیا دیکھا
لہریں لیتا ہوا اک قطرے میں دریا دیکھا

قمر جلالوی

پیشِ ساحل اک ہجوم موجِ دریا ہو گیا
وہ نہانے کیا چلے آئے تماشا ہو گیا
اپنے سر پر موجِ طوفاں بڑھا کہ لیتی ہے قدم
میرا بیڑا قابلِ تعظیمِ دریا ہو گیا

شکیب جلالی

غمِ دل حیطہِ تحریر میں آتا ہی نہیں
جو کناروں میں سمٹ جائے وہ دریا ہی نہیں
جو بھی ہے طالبِ یک ذرہ‘ اسے صحرا دے
مجھ پہ مائل بہ کرم ہے ‘ تو دلِ دریا دے

عرفان صدیقی

خدا رکھے تری کھیتی ہری بھری، لیکن
تو اس پہ اتنا بھروسا نہ کر، یہ دریا ہے
منظر وہی، پیکر وہی، دیکھیں کوئی پیاسا بھی ہے
لشکر بھی ہے ، خنجر بھی ہے ، پہرا بھی ہے ، دریا بھی ہے
میں اب ان چھوٹی سی خوشیوں کے سوا کیا چاہوں
پیاس بوندوں سے نہ بجھ پائے تو دریا دیکھے
اپنے لہو میں مست ہیں تشنہ لبانِ عشق
صحرا میں چھوڑ آئے ہیں دریا پڑا ہوا
ریت اڑتی ہے بہت ساحل احساس کے پاس
سوکھتا جاتا ہے شاید کوئی دریا مجھ میں
سر کر چکے ہیں معرکۂ جوئے خوں سو آج
’’روئے زمیں پہ جتنے ہیں دریا ہمارے ہیں‘‘
مصافِ دشت تماشا نہیں ٹھہر جاؤ
اور اس کے آگے بھی دریا نہیں ٹھہر جاؤ

مجید امجد

صبح کی دھوپ ہے کہ رستوں پر
منجمد بجلیوں کا اک دریا
امجد، ان آنسوؤں کو آگ لگے
کتنا نرم اور گراں ہے یہ دریا

مصطفی زیدی

ریت پر پھینک گئی عقل کی گستاخ لبی
پھر کبھی کشف و کرامات کا دریا نہ کھلا

الطاف حسین حالی

دم گریہ کس کا تصور ہے دل میں
کہ اشک اشک دریا ہوا چاہتا ہے

رئیس فروغؔ

کہہ رہے تھے لوگ صحرا جل گیا
پھر خبر آئی کہ دریا جل گیا
پیاسے آئے صحرا سے
پانی لاؤں دریا سے
مجھے پیارا کھیل سرابوں کا
مرا شہر بسا ہے دریا میں
فریب تھا جو مجھے زعم بے کرانی تھا
اداس ہیں مرے ساحل فراق دریا میں
آگ میں اک شعلۂ بے تاب تھا
عمر بھر کہتا رہا دریا میں ہوں
بجھ گیا جل جل کے دریا دھوپ میں
کیا بجاتے ہو کٹورا دھوپ میں

احسان دانش

کچھ سفینے ہیں کہ طوفاں سے ہے جن کا ساز باز
دیکھنے والوں میں اک بیرون دریا ہم بھی ہیں
جا بہ جا بکھرے نظر آتے ہیں آثار قدیم
پی گئیں جس کو گزر گاہیں وہ دریا ہم بھی ہیں

بشیر بدر

بڑے لوگوں سے ملنے میں ہمیشہ فاصلہ رکھنا
جہاں دریا سمندر سے ملا دریا نہیں رہتا

زہرا نگاہ

ہم خاک تھے پر جب اسے دیکھا تو بہت روئے
سنتے تھے کہ صحراؤں میں دریا نہیں ہوتے

ظہیر کاشمیری

ہم کو سہل انگاری غرق کر چکی ہوتی
ہمت آفریں نکلی لہر لہر دریا کی
یہ پانی ہے مگر مژگاں کی شاخوں پر سلگتا ہے
یہ موتی ہے مگر دامان دریا میں نہیں رہتا
ہوئے ہیں اس قدر مانوس ہم پیمان فردا سے
کہ اب دل کا سفینہ ہجر کے دریا میں رکھتے ہیں

عالم تاب تشنہ

کشتی کے ڈوبنے کا مجھے غم نہیں مگر
موجوں کی ساز باز میں دریا شریک تھا

غلام محمد قاصر

کشتی بھی نہیں بدلی دریا بھی نہیں بدلا
اور ڈوبنے والوں کا جذبہ بھی نہیں بدلا

اختر امام رضوی

دل وہ پیاسا ہے کہ دریا کا تماشا دیکھے
اور پھر لہر نہ دیکھے کف دریا دیکھے

جلیل مانک پوری

مجھ کو شکوہ ہے کہ دل کا خون قاتل نے کیا
دل یہ کہتا ہے مجھے قطرے سے دریا کر دیا

ثروت حسین

بازو ہیں یا دو پتواریں ناؤ پہ رکھی ہیں
لہریں لیتا دریا دیکھو اور مجھے دیکھو
یہ جو پھوٹ بہا ہے دریا پھر نہیں ہوگا
روئے زمیں پر منظر ایسا پھر نہیں ہوگا
اسی کی وادیوں میں طائران رزق جو کو
نشیمن اور اجلی نیند کا دریا ملے گا

جوش ملیح آبادی

ساحل پہ سرو ناز کو دے زحمت خرام
بل کھا رہا ہے خاک پہ دریا ترے لیے
پیمانے سے جس وقت چھلک جاتی ہے صہبا
لہراتا ہے اک حسن کا دریا مرے آگے

حسرت موہانی

عشق سے تیرے بڑھے کیا کیا دلوں کے مرتبے
مہر ذروں کو کیا قطروں کو دریا کر دیا

حفیظ جالندھری

میری بساط کیا تھی حضور رضائے دوست
تنکا سا ایک سامنے دریا کے آ گیا

شاد عظیم آبادی

مٹ گئی شورش طوفانِ حوادث اے موج
اب وہی تو وہی بہتا ہوا دریا تیرا
یوں حبابوں کا نہ دل توڑ خدارا اے موج
انہیں قطروں کے تو ملنے سے ہے دریا تیرا

شان الحق حقی

دامن باد کو ہے دولت شبنم کافی
روح کو ذکر تنک بخشی دریا نہ سنا
کبھی یہ لرزشیں ساز آشنا ہوں گی تو دیکھو گے
دلوں کی بے کلی آشوب دریا ہو گئی آخر

شکیل بدایونی

دل ہے تجلی رخِ زیبا لیے ہوئے
آغوش میں ہے چاند کو دریا لیے ہوئے
ضبطِ غم ہاں وہی اشکوں کا تلاطم اک بار
اب تو سوکھا ہوا دریا نہیں دیکھا جاتا
باقی ہے میرے دل میں ابھی عظمت وجود
قطرے سے کہہ رہا ہوں کہ دریا سے بچ کے چل

فانی بدایونی

بچ رہا تھا ایک آنسودار و گیر ضبط سے
جوشش غم نے پھر اس قطرے کو دریا کر دیا
دل کی کایا غم نے وہ پلٹی کہ تجھ سا بن گیا
درد میں دل ڈوب کر قطرے سے دریا بن گیا
دل رہے آلودہ دامن اور ہم دیکھا کریں
آج اے اشکِ ندامت آ تجھے دریا کریں
بس اب اے ضبط زیادہ مجھے محجوب نہ کر
ہے مری آنکھ کی تقدیر میں دریا ہونا

اختر ہوشیارپوری

عمر بھر منظر نگاری خون میں اتری رہی
پھر بھی آنکھوں کے مقابل ایک دریا رہ گیا
ریت کی دیوار میں شامل ہے خون زیست بھی
اے ہواؤ سوچ کر اے موج دریا دیکھ کر
قریۂ جاں سے گزر کر ہم نے یہ دیکھا بھی ہے
جس جگہ اونچی چٹانیں ہیں وہاں دریا بھی ہے

اکبر حمیدی

اک لمحے نے جیون دھارا روک لیا
جیسے کسی قطرے نے دریا روک لیا
ایک سی ساری صبحیں ایک سی شامیں ہیں
کس نے اکبرؔ بہتا دریا روک لیا

احمد فراز

تپتے صحراؤں پہ گرجا، سرِ دریا برسا
تھی طلب کس کو مگر ابر کہاں جا برسا
کتنے طوفانوں کی حامل تھی لہو کی اک بوند
دل میں اک لہر اٹھی، آنکھ سے دریا برسا
میں تہِ کاسہ و لب تشنہ رہوں گا کب تک
تیرے ہوتے ہوئے ، اے صاحبِ دریا میرے
اک درد کا پھیلا ہوا صحرا ہے کہ میں ہوں
اک موج میں آیا ہوا دریا ہے کہ تم ہو
کل ہم نے بزمِ یار میں کیا کیا شراب پی
صحرا کی تشنگی تھی سو دریا شراب پی

شاذ تمکنت

اب کہیں تو ہی ڈبووے ہمیں اے موجِ سراب
ورنہ پھر شکوۂ پایابی دریا ہو گا
پیاسا ہوں ریگ زار میں دریا دکھائی دے
جو حال پوچھ لے وہ مسیحا دکھائی دے

فراق گورکھپوری

یہ ہستی نیستی سب موج خیزی ہے محبت کی
نہ ہم قطرہ سمجھتے ہیں نہ ہم دریا سمجھتے ہیں
یہی گر آنکھ میں رہ جائے تو ہے چنگاری
قطرۂ اشک جو بہہ جائے تو اک دریا ہے
معلوم کچھ مجھی کو ہیں ان کی روانیاں
جن قطرہ ہائے اشک کو دریا بنا دیا

محسن احسان

اب کناروں سے نہ مانگے قطرے قطرے کا حساب
کیوں سمندر کی طرف بہتا ہوا دریا گیا
میں ایک عمر کے بعد آج خود کو سمجھا ہوں
اگر رکوں تو کنارا چلوں تو دریا ہوں
بہا کر لے گئی اک موجِ دریا
بہت تھے محو دریا دیکھنے میں
وہیں اکثر شناور ڈوبتے ہیں
جو ہیں پایاب دریا دیکھنے میں
سب اپنے بحرِ غم میں غوطہ زن ہیں
نشاطِ درد کا دریا کہاں ہے

ناصر کاظمی

میں اس جانب تو اس جانب
بیچ میں پتھر کا دریا تھا

نوح ناروی

خونِ جگر سے قول رہا یہ میرے اشک چشمِ تر کا
چڑھتا دریا بہتا دریا میں ہی میں ہوں تو ہی تو ہے