مرزا غالب

شبنم بہ گلِ لالہ نہ خالی ز ادا ہے
داغِ دل بے درد، نظر گاہِ حیا ہے
کرتا ہے بسکہ باغ میں تو بے حجابیاں
آنے لگی ہے نکہتِ گل سے حیا مجھے
اس بزم میں مجھے نہیں بنتی حیا کیے
بیٹھا رہا اگرچہ اشارے ہوا کیے

بہادر شاہ ظفر

کئی روز میں آج وہ مہرِ لقا ہوا میرے جو سامنے جلوہ نما
مجھے صبر و قرار ذرا نہ رہا اسے پاس حجاب و حیا نہ رہا
معلوم نہیں ہم سے حجاب ان کو ہے کیسا
اوروں سے تو وہ شرم و حیا کچھ نہیں کرتے

حیدر علی آتش

آئینہ لے کے کیجیے اتنا مشاہدہ
ہم سے سلوک شرم و حیا کچھ نہ پوچھئے

داغ دہلوی

جھانک کر روزنِ در سے مجھ کو
کیا وہ شوخی سے حیا کرتے ہیں
تم نہ پاؤ گے سادہ دل مجھ سا
جو تغافل کو بھی حیا جانے
ناچار اختیار کیا شیوۂِ رقیب
کچھ بے حیائی خوب ہیں گزرے حیا سے ہم

مصحفی غلام ہمدانی

میں ہوا بہ خاک سیہ فرو ترے کوچے میں بہ صد آرزو
رہا شرمگیں ہی ہمیشہ تو تری اب تلک نہ حیا گئی
آرسی ہوتی ہے سنمکھ تیرے
کچھ بھی آنکھوں میں حیا رکھتی ہے
شوخ مضموں سے حذر کرتے ہیں
شعر میں جن کے حیا بندی ہے
منہ چھپاتا ہے تو آئینے سے
کس قدر شرم و حیا تجھ میں ہے

مصطفٰی خان شیفتہ

کبھی محفل میں وہ بے باکیاں کیوں
کبھی خلوت میں یہ شرم و حیا کیا
پھر کیوں نہ دیکھنے سے عدو کے ہو منفعل
پھر اس کو دوکھتی ہے حیا اور حیا کو ہم
کم التفات ہم سے سمجھتے ہیں اہلِ بزم
شرمندہ ہو گئے تری شرم و حیا سے ہم
کہاں ہے غیرتِ شوخی کہ جائے غیرت ہے
نگاہِ یار سے ہر وقت ہے حیا گستاخ

مومن خان مومن

بے پردہ غیر پاس اسے بیٹھا نہ دیکھتے
اٹھ جاتے کاش ہم بھی جہاں سے حیا کے ساتھ
ہر دم عرق عرق نگہ بے حجاب ہے
کس نے نگاہِ گرم سے دیکھا حیا کے ساتھ
شوخ کہتا ہے بے حیا جانا
دیکھو دشمن نے تم کو کیا جانا

مرزا رفیع سودا

اس دور میں گئی ہے مروت کی آنکھ پھوٹ
معدوم ہے جہان سے چشم حیا پرست

شکیب جلالی

چھپ چھپ کے سدا جھانکتی ہیں خلوتِ گل میں
مہتاب کی کرنوں کو حیا تک نہیں آتی

اختر شیرانی

بہار آئی ہے مستانہ گھٹا کچھ اور کہتی ہے
مگر ان شوخ نظروں کی حیا کچھ اور کہتی ہے
ان رس بھری آنکھوں میں حیا کھیل رہی ہے
دو زہر کے پیالوں پہ قضا کھیل رہی ہے
بد مستی میں تم نے انہیں کیا کہہ دیا اخترؔ
کیوں شوخ نگاہوں میں حیا کھیل رہی ہے

بشیر بدر

وہ سادگی نہ کرے کچھ بھی تو ادا ہی لگے
وہ بھول پن ہے کہ بے باکی بھی حیا ہی لگے

بیان میرٹھی

کیوں کہ جھکے نسیم سے سوچے تھی نرگس چمن
دیکھ کے چشم ناز کو آنے لگی حیا کہ یوں

بیخود بدایونی

ہیں وصل میں شوخی سے پابند حیا آنکھیں
اللہ رے ظالم کی مظلوم نما آنکھیں

ظہیر کاشمیری

عارضوں پر وہ ترے تابش پیمانِ وفا
چاندنی رات کے چہرے پہ حیا ہو جیسے
حجابِ حسن سے بڑھتی ہے وار عریانی
یہی سبب ہے میں آزردۂ‌ حیا نہ ہوا

عبید اللہ علیم

وہ نور نور دمکتا ہوا سا اک چہرا
وہ آئینوں میں حیا ہی حیا ہمارے لیے

حسرت موہانی

مجھ سے تنہائی میں گر ملیے تو دیجے گالیاں
اور بزمِ غیر میں جانِ حیا ہو جائیے

شاد عظیم آبادی

آج کیے ہزار قتل کل کیے اور بھی سوا
شغل یہ جس نگہ کا ہو اس کو حیا کی وجہ کیا

فانی بدایونی

پھر دل سے فانیؔ سارے کے سارے نقش جفا مٹ جاتے ہیں
جس وقت وہ ظالم سامنے آ کر جانِ حیا ہو جاتا ہے

افضل منہاس

کانچ کی زنجیر ٹوٹی تو صدا بھی آئے گی
اور بھرے بازار میں تجھ کو حیا بھی آئے گی
مجھے خبر ہے جھکے گی تری نظر نہ کبھی
بنی ہے یہ تو صفت چشم با حیا کے لیے

احمد فراز

دعوائے وفا پر بھی طلب دادِ وفا کی
اے کشتۂ غم تجھ کو حیا تک نہیں آئی

امیر مینائی

گھورتے دیکھا جو ہم چشموں کو جھنجھلا کر کہا
کیا لحاظ آنکھوں کا بھی او بے حیا جاتا رہا
کہتی ہے امیر اس سے شوخی
اب منہ نہ دکھائیے حیا کو
زہے قسمت حسینوں کی برائی بھی بھلائی ہے
کریں یہ چشم پوشی بھی تو نظروں میں حیا ٹھہرے

فراق گورکھپوری

عشق بے باک کو دعوے تھے بہت خلوت میں
کھو دیا سارا بھرم شرم و حیا سے پہلے
پردۂ شرم میں صد برق تبسم کے نثار
ہوش جاتے رہے نیرنگ حیا سے پہلے

قیوم نظر

آج شرماتا ہے سورج اس سے
وہ جو تاروں سے حیا کرتا تھا

محبوب خزاں

کیا حسن تھا کہ آنکھ لگی سایہ ہو گیا
وہ سادگی کی مار، حیا کم بہت ہی کم

ناصر کاظمی

مانو مری کاظمی تم ہو بھلے آدمی
پھر وہی آوارگی کچھ تو حیا چاہیے
جبیں پہ دھوپ سی آنکھوں میں کچھ حیا سی ہے
تو اجنبی ہے مگر شکل آشنا سی ہے
کتنی مردم شناس ہے دنیا
منحرف بے حیا ہمیں سے ہوئی