مرزا غالب

دل میں آ جائے ہے ، ہوتی ہے جو فرصت غش سے
اور پھر کون سے نالے کو رسا کہتے ہیں
غلطی ہائے مضامیں مت پوچھ
لوگ نالے کو رسا باندھتے ہیں
نالہ جاتا تھا پرے عرش سے میرا اور اب
لب تک آتا ہے جو ایسا ہی رسا ہوتا ہے

امام بخش ناسخ

چوٹ دل کو جو لگے آہ رسا پیدا ہو
صدمہ شیشہ کو جو پہنچے تو صدا پیدا ہو

حیدر علی آتش

الجھ کے شانے سے کھاتا ہے سیکڑوں جھٹکے
قصور سے یہ ترے گیسوئے رسا کی طرف
کوتاہ خال روئے منور ہے کس قدر
کتنی ہے زلفِ یار رسا کچھ نہ پوچھئے

مصحفی غلام ہمدانی

کہیں مغز اس کے میں صبح دم تری بوئے زلف رسا گئی
ترے کوچے سے جو چمن تلک گل اڑاتی خاک صبا گئی
آہ میری ہے اثر سے ہم دوش
طالع زلف رسا رکھتی ہے

مومن خان مومن

دامن اس کا جو ہے دراز تو ہو
دست عاشق رسا نہیں ہوتا

یگانہ چنگیزی

وہ کیوں سر کھپائے تری جستجو میں
جو انجام فکرِ رسا جانتا ہے

جون ایلیا

وہ کاہشیں ہیں کہ عیش جنوں تو کیا یعنی
غرور ذہنِ رسا بھی نہیں رہا اب تو

عرفان صدیقی

سہل نہیں کہ ہاتھ آئے اس کے وصال کا گلاب
دستِ ہوس بھی چاہیے ، بختِ رسا بھی چاہیے
حر آ رہے ہیں شمر سے شبیر کی طرف
اس معرکے میں بختِ رسا ان کے ساتھ ہے

الطاف حسین حالی

تھی محبت میں ننگ منت غیر
جذبِ دل کو رسا کیا تو نے

عبید اللہ علیم

جاننے والے تو سب جان گئے ہوں گے علیمؔ
ایک مدت سے ترا ذہنِ رسا کیوں چپ ہے

شکیل بدایونی

جذب و اثر سے بن گیا اور بھی دشمن آسماں
کر دیا رازِ دل عیاں آہ رسا کو کیا ہوا

امیر مینائی

لٹکاؤ نہ گیسوئے رسا کو
پیچھے نہ لگاؤ اس بلا کو

کلیم عاجز

کس دھوم سے بڑھتی ہوئی پہنچی ہے کہاں تک
دنیا کو تری زلف رسا یاد رہے گی