مرزا غالب

ناکردہ گناہوں کی بھی حسرت کی ملے داد
یا رب اگران کردہ گناہوں کی سزا ہے
جو مدعی بنے اس کے نہ مدعی بنیے
جو نا سزا کہے اس کو نہ نا سزا کہیے

حیدر علی آتش

آتشؔ گناہ عشق کی تعزیر کیا کہوں
مشفق جو کچھ ہے اس کی سزا کچھ نہ پوچھئے

باقی صدیقی

زندگی جرم بنی جاتی ہے
جرم کی کوئی سزا ہے کہ نہیں
آرزو کی ہے اس ادا کے ساتھ
حوصلہ بڑھ گیا سزا کے ساتھ

عبدالحمید عدم

جرم تو کوئی نہیں سرزد ہوا مجھ سے حضور
باوجود اس کے سزا تسلیم کر لیتا ہوں میں

قمر جلالوی

اجازت ہو تو کہہ دوں قصۂ الفت سرِ محفل
مگر پہلے خطا پر غور کر لو پھر سزا دینا

عرفان صدیقی

بانہوں پہ نگاہوں کے بندھے رہتے تھے تعویذ
گھیروں سے سویروں کو نکلنے پہ سزا تھی
تمام فیصلے بس ایک شخص کرتا تھا
وہاں یہ بحثِ خطا و سزا چلی ہی نہیں
آخر تو فیصلہ سرِ مقتل اسی کا ہے
اس انتظام جرم و سزا پر نہ جائیے

مجید امجد

نئی صبحوں کی سیر کا یہ خیال
اپنے طغیان کی سزا یہ خیال

احسان دانش

زندگی بیت رہی ہے دانشؔ
ایک بے جرم سزا ہو جیسے
جرم سقراط سے ہٹ کر نہ سزا دو ہم کو
زہر رکھا ہے تو یہ آب بقا دو ہم کو
شورش عشق میں ہے حسن برابر کا شریک
سوچ کر جرم تمنا کی سزا دو ہم کو

اسرار الحق مجاز

خطاؤں پہ جو مجھ کو مائل کرے پھر
سزا اور ایسی سزا چاہتا ہوں

آنس معین

اک کرب مسلسل کی سزا دیں تو کسے دیں
مقتل میں ہیں جینے کی دعا دیں تو کسے دیں

بشیر بدر

میں اداسیاں نہ سجا سکوں کبھی جسم و جاں کے مزار پر
نہ دیے جلیں مری آنکھ میں مجھے اتنی سخت سزا نہ دے

سدرشن فاکر

زندگی کو بھی صلہ کہتے ہیں کہنے والے
جینے والے تو گناہوں کی سزا کہتے ہیں
ہر اک موڑ پر ہم غموں کو سزا دیں
چلو زندگی کو محبت بنا دیں
یہ بھی تو سزا ہے کہ گرفتارِ وفا ہوں
کیوں لوگ محبت کی سزا ڈھونڈ رہے ہیں

ضیا جالندھری

وہ خواب کیا تھا کہ جس کی حیات ہے تعبیر
وہ جرم کیا تھا کہ جس کی سزا ہے تنہائی
میری تلاش میری طلب بے حد و حساب
میری حدود میری سزا میرا جسم ہے

عبید اللہ علیم

یہ کیسی بچھڑنے کی سزا ہے
آئینے میں چہرہ رکھ گیا ہے

علی سردار جعفری

تاکہ دنیا پہ کھلے ان کا فریب انصاف
بے خطا ہو کے خطاؤں کی سزا مانگتے ہیں

احمد راہی

یہ زندگی کہ موت بھی ہے جس پہ نوحہ خواں
کس جرم کی نہ جانے ملی ہے سزا مجھے

ماجد صدیقی

ماجدؔ کو علاوہ اس سخن کے
ہے کسب معاش کی سزا بھی
یہ ٹھان لی ہے کہ دل سے تجھے بھلا دوں گا
اب اپنے آپ کو یوں عمر بھر سزا دوں گا

اختر امام رضوی

جرم ہستی کی سزا کیوں نہیں دیتے مجھ کو
لوگ جینے کی دعا کیوں نہیں دیتے مجھ کو

ثروت حسین

خواب ہو کر رہ گیا اپنے لیے
جاگ اٹھنے کی سزا موجود ہے

حسرت موہانی

گر نگاہ شوق کو محوِ تماشا دیکھیے
قہر کی نظروں سے مصروف سزا ہو جائیے

حفیظ جالندھری

مجھ سے کیا ہو سکا وفا کے سوا
مجھ کو ملتا بھی کیا سزا کے سوا
ابھی میعاد باقی ہے ستم کی
محبت کی سزا ہے اور میں ہوں
ہمیں تو داورِ محشر کو چھوڑتے ہی بنی
خطائے عشق نہ کافی ہوئی سزا کے لیے

رسا چغتائی

لوگ کن واہموں میں رہتے ہیں
کاٹتے ہیں سزا مکانوں میں

سید ضمیر جعفری

بڑی حیرت سے ارباب وفا کو دیکھتا ہوں میں
خطا کو دیکھتا ہوں اور سزا کو دیکھتا ہوں میں

سیف الدین سیف

جب دل نے خیر و شر کی حقیقت کو پا لیا
ہر جرم تھا بلند سزا کے مقام سے

احمد فراز

منصف ہو اگر تم تو کب انصاف کرو گے
مجرم ہیں اگر ہم تو سزا کیوں نہیں دیتے
میں اس کو یاد کروں بھی تو یاد آتا نہیں
میں اس کو بھول گیا ہوں، یہی سزا تھی مری
ہوس انعام سمجھتی ہے کرم کو تیرے
اور محبت ہے کہ احساں کو سزا جانتی ہے

امیر مینائی

ظالم تجھے دل دیا، خطا کی
بس بس میں پہنچ گیا، سزا کو

شاذ تمکنت

مرا ضمیر بہت ہے مجھے سزا کے لیے
تو دوست ہے تو نصیحت نہ کر خدا کے لیے

قتیل شفائی

قتیلؔ مجھ کو یہی سکھایا مرے نبیؐ نے
کہ فتح پا کر بھی دشمنوں کو سزا نہ دینا
اس دور میں توفیق انا دی گئی مجھ کو
کس جرم کی آخر یہ سزا دی گئی مجھ کو

کیفی اعظمی

کی ہے کوئی حسین خطا ہر خطا کے ساتھ
تھوڑا سا پیار بھی مجھے دے دو سزا کے ساتھ

محسن احسان

محتسب جرم مرا دیکھ کے خاموش رہا
خود خطا کار تھا احکام سزا کیا کرتا

محسن نقوی

میں دل پہ جبر کروں گا تجھے بھلا دوں گا
مروں گا خود بھی تجھے بھی کڑی سزا دوں گا
لوگو بھلا اس شہر میں کیسے جئیں گے ہم جہاں
ہو جرم تنہا سوچنا لیکن سزا آوارگی

ناصر کاظمی

بلاؤں گا نہ ملوں گا نہ خط لکھوں گا تجھے
تری خوشی کے لیے خود کو یہ سزا دوں گا