مرزا غالب

نشۂِ رنگ سے ہے واشدِ گل
مست کب بندِ قبا باندھتے ہیں

انشاء اللہ خان انشا

عاشق کو بوغ بند میں باندھا ہے اس نے یوں
تا ہو کے دست بقچہ میں جیسے قبا بندھے

حیدر علی آتش

جامہ سے باہر اپنے جو ہوں میں عجب نہیں
کھولے ہیں کس کے بندِ قبا کچھ نہ پوچھئے
باغباں گلشن کے دروازے کو کیا رکھتا ہے بند
کون غنچہ کی کلہ گل کی قبا لے جائے گا

مصطفٰی خان شیفتہ

کیا کرتے ہیں، کیا سنتے ہیں، کیا دیکھتے ہیں، ہائے
اس شوخ کے جب کھولتے ہیں بندِ قبا ہم
ہے جامہ پارہ پارہ، دل و سینہ چاک چاک
دیوانہ ہو گئے گلِ جیبِ قبا سے ہم
گلشن میں چل کے بندِ قبا تیرے وا کروں
جی چاہتا ہے جامۂِ گل کو قبا کروں
یہ ناخن و خراش میں بگڑی کہ کیا کہوں
اک دم ہوا جو عقدہ بندِ قبا سے ربط
اتنی نہ بڑھا پاکی داماں کی حکایت
دامن کو ذرا دیکھ ذرا بندِ قبا دیکھ

مومن خان مومن

آتی ہے بوئے داغ شبِ تار ہجر میں
سینہ بھی چاک ہو نہ گیا ہو قبا کے ساتھ
دستِ جنوں نے میرا گریباں سمجھ لیا
الجھا ہے ان سے شوخ کے بندِ قبا کے ساتھ
کشاد دل پہ باندھی ہے کمر آج
نہیں ہے خیریت بندِ قبا کی

فیض احمد فیض

ان کی نظر میں، کیا کریں پھیکا ہے اب بھی رنگ
جتنا لہو تھا صرفِ قبا کر چکے ہیں ہم
یاد کا پھر کوئی دروازہ کھلا آخرِ شب
دل میں بکھری کوئی خوشبوئے قبا آخرِ شب

جون ایلیا

آج ہم کیا گلہ کریں اس سے
گلۂ تنگی قبا کیجے
شفق شامِ ہجر کے ہاتھوں
اپنی اتری ہوئی قبا بھیجو

عرفان صدیقی

کم نظرانِ شہر کو وحشتِ جاں نظر تو آئے
چاکِ جگر بہت ہوا، چاکِ قبا بھی چاہیے
نسلِ تازہ، میں تجھے کیا تجربے اپنے بتاؤں
تیرے بڑھتے جسم پر میری قبا کب آئے گی
ابھی کھلنے کے لیے بندِ قبا رکھا ہے
ہم نے ہر فکر کو فردا پہ اٹھا رکھا ہے
کیا شان دار لوگ ہیں دامن دریدہ لوگ
دل دیکھئے حضور، قبا پر نہ جائیے

احسان دانش

زیست ہے اس سحر و شام سے بیزار و زبوں
لالہ و گل کی طرح رنگ قبا دو ہم کو
روح بہار خونِ شہیداں کا رنگ دیکھ
خاکِ چمن کو لالہ قبا کر دیا گیا

بیان میرٹھی

صبح قیامت آئے گی کوئی نہ کہہ سکا کہ یوں
آئے وہ در سے ناگہاں کھولے ہوئے قبا کہ یوں
شب کو نموئے رنگ سے خندۂ گل کا ذکر تھا
نشو و نمائے حسن سے ٹکڑے ہوئی قبا کہ یوں

ضیا جالندھری

آنکھوں کے ماورا جھلک اٹھتا ہے گاہ گاہ
وہ شوخ جس کی سادہ قبا میرا جسم ہے

ثروت حسین

میں آگ دیکھتا تھا آگ سے جدا کر کے
بلا کا رنگ تھا رنگینیٔ قبا سے ادھر

جوش ملیح آبادی

پشمینہ پوش راہ نشینوں کی التجا
شاید کبھی وہ شاہد اطلس قبا سنے

حسرت موہانی

جنت کی ہوس ہو تو میں کافر، کہ پریشاں
اس شوخ کی خوشبوئے قبا میرے لیے ہے

شاد عظیم آبادی

چست کمر کا کیا سبب تنگ قبا کی وجہ کیا
ہم تو ہیں آپ سر بکف ہم سے ادا کی وجہ کیا

احمد فراز

مگر یہ اہل ریا کس قدر برہنہ ہیں
گلیم و دلق و عبا و قبا کے ہوتے ہوئے
جب سارا شہرِ برف کے پیراہنوں میں تھا
ان موسموں میں لوگ تھے شعلہ قبا کہ میں
اب کے گر تو ملے تو ہم تجھ سے
ایسے لپٹیں تری قبا ہو جائیں
جو طعنہ زن تھا مری پوششِ دریدہ پر
اسی کے دوش پہ رکھی ہوئی قبا تھی مری
لباسِ غم میں تو وہ اور بن گیا قاتل
سجی ہے کیسی، کسی پر قبا اداسی کی
چاک پیراہنی گل کو صبا جانتی ہے
مستی شوق کہاں بندِ قبا جانتی ہے

اقبال ساجد

فکر معیار سخن باعث آزار ہوئی
تنگ رکھا تو ہمیں اپنی قبا نے رکھا

شاذ تمکنت

کھلے تو کیسے کھلے راز عنفوان شباب
حیا نے کیا ترے بندِ قبا سے کچھ نہ کہا

فراق گورکھپوری

فتنے برپا ہوئے ہر غنچۂ سربستہ سے
کھل گیا راز چمن چاکِ قبا سے پہلے

مجروح سلطان پوری

پڑے جو سنگ تو کہیے اسے نوالۂ زر
لگے جو زخمِ بدن پر اسے قبا کہیے