نورِ سحر و حسنِ گل و لطف ہوا دیکھ
مصطفٰی خان شیفتہ
اٹھ صبح ہوئی مرغِ چمن نغمۂِ سرا دیکھ
نورِ سحر و حسنِ گل و لطف ہوا دیکھ
دو چار فرشتوں پہ بلا آئے گی نا حق
اے غیرت ناہید نہ ہو نغمہ سرا دیکھ
منت سے مناتے ہیں مجھے میں نہیں منتا
اوضاع ملک دیکھ اور اطوار گدا دیکھ
گر بو الہوسی یوں تجھے باور نہیں آتی
اک مرتبہ اغیار کے قابو میں تو آ دیکھ
اتنی نہ بڑھا پاکی داماں کی حکایت
دامن کو ذرا دیکھ ذرا بندِ قبا دیکھ
اک دم کے نہ ملنے پہ نہیں ملتے ہیں مجھ سے
اے شیفتہؔ مایوسی امید فضا دیکھ
مفعول مفاعیل مفاعیل فَعُولن
ہزج مثمن اخرب مکفوف محذوف