مرزا غالب

تجھ سے ، قسمت میں مری، صورت قفل ابجد
تھا لکھا بات کے بنتے ہی جدا ہو جانا
دل سے مٹنا تری انگشتِ حنائی کا خیال
ہو گیا گوشت سے ناخن کا جدا ہو جانا
ہے ایک تیر جس میں دونوں چھدے پڑے ہیں
وہ دن گئے کہ اپنا دل سے جگر جدا تھا
ہے جنوں اہلِ جنوں کے لیے آغوش وداع
چاک ہوتا ہے گریباں سے جدا میرے بعد
اے وہم طرازانِ مجازی و حقیقی
عشاق فریبِ حق و باطل سے جدا ہیں

امام بخش ناسخ

امیدِ وصال اب کہاں ہے
اس گل سے برنگ بو جدا ہوں
کشتۂِ تیغ جدائی ہوں یقیں ہے مجھ کو
عضو سے عضو قیامت میں جدا پیدا ہو

انشاء اللہ خان انشا

وہ دشت محبت میں رکھے قدم اے انشاؔ
سر اپنے کو آگے ہی جو تن سے جدا سمجھے

داغ دہلوی

مجھ کو کہیے برا نہ غیر کے ساتھ
جو ہو کہنا جدا جدا کہیے
نہیں ملتا کسی مضمون سے ہمارا مضمون
طرز اپنی ہے جدا سب سے جدا کہتے ہیں
ہائے دو دل جو کبھی مل کے جدا ہوتے ہیں
نہیں‌معلوم وہ کیا کرتے ہیں‌ کیا ہوتے ہیں
جی میں آئے تو کبھی فاتحہ دلوا دینا
آخری وقت ہے ہم تم سے جدا ہوتے ہیں

شیخ ابراہیم ذوق

افسوس ہے کہ سایہ مرغ ہوا کی طرح
ہم جس کے ساتھ ساتھ چلیں وہ جدا چلے

مصحفی غلام ہمدانی

ہستی کو مری ہستی عالم نہ سمجھنا
ہوں ہست تو پر ہستی عالم سے جدا ہوں
یہ کس کے چاہ زنخداں کی فکر میں ڈوبا
تمام رات جو زانو سے سر جدا نہ رہا
کیا ہے تقصیر جو ہم کو تجھ سے
گردش چرخ جدا رکھتی ہے
شرم تا چند حیا بھی کب تک
منہ سے برقعے کو جدا کیجیے بس

مصطفٰی خان شیفتہ

اس جنبشِ ابرو کا گلہ ہو نہیں سکتا
دل گوشت ہے ناخن سے جدا ہو نہیں سکتا

مومن خان مومن

حالِ دلِ یار کو لکھوں کیوں کر
ہاتھ دل سے جدا نہیں ہوتا

میر مہدی مجروح

خانماں سوز ماسوا ہوں میں
اپنے سائے سے بھی جدا ہوں میں
سر کو تن سے مرے جدا کیجے
یہ بھی جھگڑا ہے فیصلہ کیجے

فیض احمد فیض

اب اپنا اختیار ہے چاہیں جہاں چلیں
رہبر سے اپنی راہ جدا کر چکے ہیں ہم

مرزا رفیع سودا

صبر و آرام کہوں یا کہ میں اب ہوش و حواس
ہو گیا اس کی جدائی میں جدا کیا کیا کچھ

باقی صدیقی

موج ساحل سے جب جدا ہو گی
ایک طوفاں کی ابتدا ہو گی
موج ساحل سے جب جدا ہو جائے
ایک طفاں کی ابتدا ہو جائے
تری نگاہ کا انداز کیا نظر آیا
درخت سے ہمیں سایہ جدا نظر آیا
ایک مدت تری محبت
اپنے دل سے جدا رہا ہوں
کسی در پر جھکے نہ ہم باقیؔ
اپنا رستہ جدا تھا پہلے بھی

جگر مراد آبادی

میں کہ بے زار عمر بھر کے لیے
دل کہ دم بھر جدا نہیں ہوتا
اس سے بڑھ کر دوست کوئی دوسرا ہوتا نہیں
سب جدا ہو جائیں لیکن غم جدا ہوتا نہیں
اللٰہ اللٰہ یہ کمال اور ارتباط حسن و عشق
فاصلے ہوں لاکھ دل سے دل جدا ہوتا نہیں

سراج الدین ظفر

دنیا سے اہلِ عشق کو کوئی نہیں ہے واسطہ
سب سے ہوں میں الگ تھلگ سب سے مجھے جدا سمجھ

عبدالحمید عدم

یہ انتہا ہے میرے ادب کی کہ اے عدمؔ
اس کا وجود ہو کے بھی اس سے جدا ہوں میں

عرفان صدیقی

دیکھنے والو! مجھے اس سے الگ مت جانو
یوں تو ہر سایہ ہی پیکر سے جدا لگتا ہے
روشنی کے ایک ربطِ رائیگاں کے باوجود
اک خلا آنکھوں سے منظر کو جدا کرتا تھا رات
میرے لبوں سے مل کے الگ کیا ہوئی وہ زلف
جلتی دوپہریوں سے جدا ہو گئی ہے شام
ان راستوں میں دل کی رفاقت ہے اصل چیز
جو صرف ہم سفر ہیں جدا ہونے والے ہیں
ڈار سے اس کی نہ عرفانؔ جدا کر اس کو
کھول یہ بندِ وفا اور رہا کر اس کو
کام اس شکوۂ تنہائی سے کیا چلتا ہے
تو اکیلا ہے کہ دنیا سے جدا چلتا ہے
شاخ کے بعد زمیں سے بھی جدا ہونا ہے
برگ افتادہ! ابھی رقصِ ہوا ہونا ہے
کیسی مٹی ہے کہ دامن سے لپٹتی ہی نہیں
کیسی ماں ہے کہ جو بچوں کو جدا کرتی ہے