مرزا غالب

غیر کی منت نہ کھینچوں گا پے توفیرِ درد
زخم ، مثلِ خندۂِ قاتل ہے سر تا پا نمک
کب مجھے کوئے یار میں رہنے کی وضع یاد تھی
آئینہ دار بن گئی حیرتِ نقشِ پا کہ یوں
گر ترے دل میں ہو خیال، وصل میں شوق کا زوال
موج محیط آب میں مارے ہے دست و پا کہ یوں
ہر حال میں ہیں مرضی صیاد کے تابع
ہم طائرِ پر سوختہ رشتہ بہ پا ہیں
عشق کی راہ میں ہے چرخِ مکوکب کی وہ چال
سست رو جیسے کوئی آبلہ پا ہوتا ہے
گرچہ ہے طرزِ تغافل پردہ دارِ رازِ عشق
پر ہم ایسے کھوئے جاتے ہیں کہ وہ پا جائے ہے
کبھی شکایت رنجِ گراں نشیں کیجے
کبھی حکایتِ صبرِ گریز پا کہیے

امام بخش ناسخ

آتش قدمی سے جلتے ہیں خار
اے قیس میں وہ برہنہ پا ہوں
کس کو پہنچا نہیں اے جان ترا فیضِ قدم
سنگ پر کیوں نہ نشانِ کفِ پا پیدا ہو
گیا وہ چھوڑ کر رستے میں مجھ کو
اب اس کا نقشِ پا ہے اور میں ہوں

بہادر شاہ ظفر

سمجھے وہ اپنا خاکسار مجھے
خاکِ رہ ہوں کہ خاکِ پا کچھ ہوں
دیدۂ حیراں ہمارا تھا تمہارے زیرِ پا
ہم کو حیرت ہے کہ پیدا نقشِ پا کیونکر ہوا

حیدر علی آتش

کس کس کو خوب کہیے اللہ نے بتوں کو
کیا گوش و چشم کیا لب کیا دست و پا دیے ہیں
زیر زمیں بھی تڑپیں گے اے آسمان حسن
بیتاب تیرے گور میں بھی چین پا چکے
صدموں نے عشق حسن کے دم کر دیا فنا
آتشؔ سزا گناہ محبت کی پا چکے

داغ دہلوی

موقوف نہیں دام و قفس پر ہی اسیری
ہر غم میں گرفتار ہوں ہر فکر میں پابند
ان کو خلوت سرا میں بے پردہ
صاف میدان پا کے دیکھ لیا
دیکھیں تو پہلے کون مٹے اس کی راہ میں
بیٹھے ہیں شرط باندھ کے ہر نقشِ پا سے ہم

شیخ ابراہیم ذوق

غیروں کے ساتھ چھوڑ کے تم نقشِ پا چلے
کیا خوب پھول گور پہ میری چڑھا چلے
بل بے غرورِ حسن زمیں پر نہ رکھے پاؤں
مانند آفتاب وہ بے نقشِ پا چلے
عزیزو اس کو نہ گھڑیال کی صدا سمجھو
یہ عمرِ رفتہ کی اپنی صدائے پا سمجھو
تمہاری راہ میں ملتے ہیں خاک میں لاکھوں
اس آرزو میں کہ تم اپنا خاکِ پا سمجھو

مصحفی غلام ہمدانی

نشان مصحفیٔؔ خستہ پوچھتے کیا ہو
وہ خاک راہ تو اب مثل نقشِ پا نہ رہا
خون عاشق سے یہ پرہیز اسے
آشنائے کف پا کیجیے بس
در پہ بیٹھے ہیں ترے بے زنجیر
یہ عجب طرح کی پابندی ہے
شب اختلاط سے وہ مرے کیا خفا ہوا
حد سے گئی زیادہ جو انگشت پا سرک

مصطفٰیٰ خان شیفتہ

میں جل گیا وہ غیر کے گھر جو چلے گئے
شعلے سے استعارہء آواز پا کروں

مومن خان مومن

بہرِ عیادت آئے وہ لیکن قضا کے ساتھ
دم ہی نکل گیا مرا آواز پا کے ساتھ
کوچہ سے اپنے غیر کا منہ ہے مٹا سکے
عاشق کا سر لگا ہے ترے نقشِ پا کے ساتھ
ہے کس کا انتظار کہ خوابِ عدم سے بھی
ہر بار چونک پڑتے ہیں آواز پا کے ساتھ
آنکھیں جو ڈھونڈتی تھیں نگہ ہائے التفات
گم ہونا دل کا وہ مری نظروں سے پا گیا
شب تم جو بزمِ غیر میں آنکھیں چرا گئے
کھوئے گئے ہم ایسے کہ اغیار پا گئے

میر مہدی مجروح

مثل نشتر ہیں خار صحرائی
اور وحشت برہنہ پا ہوں میں
مانگوں تو سہی بوسہ پر کیا ہے علاج اس کا
یاں ہونٹ کا ہل جانا واں بات کا پا جانا
لو وہ آتے ہیں جلد حضرتِ دل
فکر صبر گریز پا کیجے

فیض احمد فیض

فریب آرزو کی سہل انگاری نہیں جاتی
ہم اپنے دل کی دھڑکن کو تری آواز پا سمجھے
ہر خارِ رہِ دشت وطن کا ہے سوالی
کب دیکھیے آتا ہے کوئی آبلہ پا اور

مرزا رفیع سودا

سمجھ کے رکھیو قدم خار دشتِ پر مجنوں
کہ اس نواح میں سوداؔ برہنہ پا بھی ہے

میر انیس

مسافرانِ عدم کا پتہ ملے کیونکر
وہ یوں گئے کہ کہیں نقشِ پا نہیں رکھتے

باقی صدیقی

ابھی کچھ ملتے ہیں منزل کے سراغ
ابھی کچھ آبلہ پا بیٹھے ہیں
درد کی انتہا نہیں کوئی
ورنہ عمر گریز پا کیا ہے
کسی مقام تمنا سے جب بھی پلٹے ہیں
ہمارے سامنے اپنے ہی نقشِ پا آئے
قافلہ آج کہاں ٹھہرے گا
کیا خبر آبلہ پا دیتے ہیں
حسرت راہِ وفا کیا دیکھیں
انے نقشِ کفِ پا کیا دیکھیں
زندگی بھاگ رہی ہے باقیؔ
شوق کو آبلہ پا کیا دیکھیں
کرتے پھرتے ہیں بگولے باقیؔ
بات ہر آبلہ پا سے تیری
سو گئے دل کا ماجرا سنتے
رات بھر کیا صدائے پا سنتے
کارواں بھی گریز پا نکلا
ورنہ کیا کیا شکستہ پا سنتے

جون ایلیا

تمہیں چاہیں گے جب چھن جاؤ گی تم
ابھی ہم تم کو ارزاں پا رہے ہیں
ہے تقاضا مری طبیعت کا
ہر کسی کو چراغ پا کیجے
دل سے ہے بہت گریز پا تو
تو کون ہے اور ہے بھی کیا تو
اے فقیرو گلی کے اس گل کی
تم ہمیں اپنی خاکِ پا بھیجو
دل کے معاملے جو تھے ان میں سے ایک یہ بھی ہے
اک ہوس تھی دل میں جو دل سے گریز پا بھی تھی

جگر مراد آبادی

ٹوٹ پڑتا ہے دفعتاً جو عشق
بیشتر دیر پا نہیں ہوتا
جو دل کا راز تھا اسے کچھ دل ہی پا گیا
وہ کر سکے بیاں نہ ہمیں سے کہا گیا
ہر رنگ ترے رنگ میں ڈوبا ہوا نکلا
ہر نقش ترا نقشِ کفِ پا نظر آیا
رکھتے ہیں خضر سے نہ غرض رہ نما سے ہم
چلتے ہیں بچ کے دور ہر اک نقشِ پا سے ہم
مانوس ہو چلے ہیں جو دل کی صدا سے ہم
شاید کہ جی اٹھے تری آواز پا سے ہم
میں ترک رہ و رسمِ جنوں کر ہی چکا تھا
کیوں آ گئی ایسے میں تری لغزشِ پا یاد
مری تباہی دل پر تو رحم کھا نہ سکے
جو روشنی میں رہے روشنی کو پا نہ سکے
کریں گے مر کے بقائے دوام کیا حاصل
جو زندہ رہ کے مقام حیات پا نہ سکے

خواجہ میر درد

میں تو کچھ ظاہر نہ کی تھی جی کی بات
پر مری نظروں کے ڈھب سے پا گیا
ارض و سما کہاں تری وسعت کو پا سکے
میرا ہی دل ہے وہ کہ جہاں تو سما سکے

سراج الدین ظفر

راہِ وفا میں مجھ کو حکم یہ ہے کہ اپنے آپ کو
اٹھ تو غبار کر خیال بیٹھ تو نقشِ پا سمجھ
اے دل بیقرار دوست دور ہے منزل وفا
جا تجھے شوق دے خدا مجھ کو شکستہ پا سمجھ

عبدالحمید عدم

مطلب معاملات کا کچھ پا گیا ہوں میں
ہنس کر فریب چشمِ کرم کھا گیا ہوں میں

شکیب جلالی

کیا خشک ہوا روشنیوں کا وہ سمندر
اب کوئی کرن‘ آبلہ پا تک نہیں آتی

عرفان صدیقی

اگر وسعت نہ دیجے وحشتِ جاں کے علاقے کو
تو پھر آزادیِ زنجیرِ پا سے کچھ نہیں ہوتا
ابھی سیاہ، ابھی سیم گوں، ابھی خونبار
افق افق ہے یہ منظر گریز پا کیسا
کوئی وحشی چیز سی زنجیرِ پا جیسے ہوا
دور تک لیکن سفر کا سلسلہ جیسے ہوا
بند کمرے میں پراگندہ خیالوں کی گھٹن
اور دروازے پہ اک آواز پا، جیسے ہوا
بند میرے کھولتا تھا کوئی آ کر خواب میں
جاگتے میں پھر مجھے بے دست و پا کرتا تھا رات
دیکھتے دیکھتے دروازے نظر سے اوجھل
بولتے بولتے تقش کف پا بھی خاموش
دیکھتا ہوں آسمانوں پر غبار اٹھتا ہوا
دلدلِ فرخندہ پا ہو گا علیؑ آنے کو ہیں
خدا کا شکر‘ ابھی میرے خواب ہیں آزاد
مرے سفر مری زنجیرِ پا میں زندہ ہیں
مجھے کوئی جاگیرِ وحشت بھی دینا!
مرے نام زنجیرِ پا لکھنے والے
پاؤں میں خاک کی زنجیر پڑی ہے کب سے
ہم کہاں چلتے ہیں نقشِ کفِ پا چلتا ہے
خود ہی نیلے پانیوں میں پھر بلا لے گا کوئی
ساحلوں کی ریت تک اے نقشِ پا لے چل مجھے

مجید امجد

پلکوں سے جن کو جلتے زمانوں نے چن لیا
وہ پھول، اس روش پہ، ترے نقشِ پا کے ہم

مصطفیٰ زیدی

آندھی چلی تو نقشِ کفِ پا نہیں ملا
دل جس سے مل گیا وہ دو بارا نہیں ملا

رئیس فروغؔ

شبوں میں تجھ سے رہی میری گفتگو کیا کیا
دنوں میں چاند ترے نقشِ پا سے کچھ نہ کہا
خرامِ عمر ترا کام پائمالی ہے
مگر یہ دیکھ ترے زیرِ پا تو میں بھی ہوں
خون تو خاک ہوا داغ ہے وہ بھی موہوم
کس کو پہچان ہے نقشِ کفِ پا کہہ دینا

احسان دانش

اف ابتدائے شوق کی معصوم جستجو
ہر پھول تھا چمن میں ترا نقشِ پا مجھے
کاغذی ملبوس میں ابھری ہے ہر شکل حیات
ریت کی چادر پہ اک نقشِ کفِ پا ہم بھی ہیں

ادا جعفری

جب دل کی رہ گزر پہ ترا نقشِ پا نہ تھا
جینے کی آرزو تھی مگر حوصلہ نہ تھا
جس موڑ پہ چھوڑی ہے سہاروں کی تمنا
کہتے ہیں بڑا قہر وہی لغزشِ پا تھی
ہر دن کے صحیفے پہ ترا نام لکھا ہے
ہر شب کی جبیں تیرا نشانِ کفِ پا تھی
اک خوابِ دل پذیر گھنی چھاؤں کی طرح
یہ بھی نہیں تو پھر مری زنجیرِ پا ہے کیا
بجھی ہوئی ہیں نگاہیں غبار ہے کہ دھواں
وہ راستہ ہے کہ اپنا بھی نقشِ پا نہ ملے
ہوائے دشت ابھی تو جنوں کا موسم تھا
کہاں تھے ہم تری آواز پا نہیں آئی

اسرار الحق مجاز

آشفتگی وحشت کی قسم حیرت کی قسم حسرت کی قسم
اب آپ کہیں کچھ یا نہ کہیں ہم راز تبسم پا بھی گئے
ارباب جنوں پر فرقت میں اب کیا کہیے کیا کیا گزری
آئے تھے سواد الفت میں کچھ کھو بھی گئے کچھ پا بھی گئے

بہزاد لکھنوی

اے جبین شوق ہاں تجھ کو بڑی زحمت ہوئی
آج ہر ذرہ کو ان کا نقشِ پا سمجھا تھا میں

بیان میرٹھی

دیدۂ اہل عشق ہے نور نگاہ سے تہی
آئے وہ فرش ناز پر چھوڑ کے کفش پا کہ یوں
اس کف پا کے بوسہ کی کب مجھے راہ یاد تھی
بدرقۂ طلب ہوئی جرأت سنگ پا کہ یوں
اس کے خرام شوق سے پس گئی خلق کس روش
مٹ گئی باد تند سے صورت نقش پا کہ یوں
سعیٔ طریق شوق سے فتنے کو آگہی نہیں
اس کی جلو میں دوڑے سے سایہ برہنہ پا کہ یوں

زہرا نگاہ

جو کچھ ہیں سنگ و خشت ہیں یا گردِ رہگزر
تم تک جو آئے ان کا کوئی نقشِ پا نہیں

ظہیر کاشمیری

عشق یوں وادی ہجراں میں ہوا محوِ خرام
خارزاروں میں کوئی آبلہ پا ہو جیسے
دیار درد میں دل نے بہت تلاش کیا
نصیبِ عشق مگر تیرا نقشِ پا نہ ہوا
یوں تو وہ فروکش تھے جادۂ رگِ جاں میں
ماور ائے امکاں تھی روشنی کف پا کی
ہم کو طلوع صبحِ بہاراں کی تھی تلاش
اس جرم کی سزا ہے یہ زنجیرِ پا ہمیں

عبید اللہ علیم

دامن بنے تو رنگ ہوا دسترس سے دور
موجِ ہوا ہوئے تو ہے خوشبو گریز پا

احمد راہی

جن کے قدموں سے ہیں گلزار یہ دشت
ہم وہی آبلہ پا ہیں یارو

تلوک چند محروم

دل خاک ہو کے بیٹھ نہ جائے تو کیا کرے
کوچے میں غیر کے جو ترا نقشِ پا ملے

جلیل مانک پوری

یہ کہہ گیا بت نا آشنا سنا کے مجھے
کہ آپ میں نہیں رہتا ہے کوئی پا کے مجھے

ثروت حسین

میں راکھ ہو گیا طاؤس رنگ کو چھو کر
عجیب رقص تھا دیوار پیش پا سے ادھر

حفیظ جالندھری

وفا کا لازمی تھا یہ نتیجہ
سزا اپنے کیے کی پا رہا ہوں
ہوا بس ایک ہی نالے میں دم فنا اپنا
یہ تازیانہ تھا عمر گریز پا کے لیے
اسی کو راہ دکھاتا ہوں جو مٹائے مجھے
میں ہوں تو نور مگر چشم نقشِ پا کے لیے
اس کی افتاد پہ خورشید کی رفعت قرباں
جس کو بھایا ترا نقشِ کفِ پا ہو جانا

رسا چغتائی

دل کے صحرا میں آ نکلتا ہے
اب بھی کوئی گریز پا سا کچھ

خاطر غزنوی

تو اور حریمِ ناز میں پابستۂ حنا
ہم پھر رہے ہیں آبلہ پا تیرے شہر میں

سید ضمیر جعفری

ضمیرؔ اک قید نا محسوس کو محسوس کرتا ہوں
کسی نادانی زنجیرِ پا کو دیکھتا ہوں میں

سیف الدین سیف

مری آرزو کی دنیا دلِ ناتواں کی حسرت
جسے کھو کے شادماں تھے اسے آج پا کے روئے

سیماب اکبر آبادی

منزل ملی مراد ملی مدعا ملا
سب کچھ مجھے ملا جو ترا نقشِ پا ملا
محرومیوں پہ دل کی مٹا جا رہا ہوں میں
ہے خاک تیرا نقشِ کفِ پا لیے ہوئے
مری وفاؤں کا ہے اعتراف میرے بعد
خوشا نصیب مجھے کھو کے پا رہا ہے کوئی
سیمابؔ چمن میں جوشِ گل سے
گنجائش نقشِ پا نہیں ہے
اک دائرہ ذروں کا خورشید طریقت تھا
شاید وہ تمہارا ہی نقشِ کفِ پا ہو گا
ہم ہیں سر تا بہ پا تمنا
کیسی امید کیا تمنا

شان الحق حقی

رفیقو راہ کے خم صبح کچھ ہیں شام کچھ اور
ملے گی تم کو نہ منزل نقوشِ پا سے مرے

شکیل بدایونی

بدل دیا ہے محبت نے ان کا طرز عمل
اب ان میں شان تکلف سی پا رہا ہوں میں
ارباب خرد لاکھ سبک گام ہوں لیکن
بے فیض جنوں راہِ طلب پا نہیں سکتے
خود ڈھونڈ لے گا تجھ کو ترا منفرد مقام
راہِ طلب میں نقشِ کفِ پا سے بچ کے چل
دل لذت نگاہِ کرم پا کے رہ گیا
کتنا حسین خواب نظر آ کے رہ گیا
سر بھی ہے پائے یار بھی شوق سوا کو کیا ہوا
جرأت دل کدھر گئی لغزشِ پا کو کیا ہوا
وقف مذاق جستجو دیدہ و دل ہیں اب کہاں
منزل شوق پا ہی کی غیرت پا کو کیا ہوا

فانی بدایونی

رنج پایا دل دیا سچ ہے مگر یہ تو کہو
کیا کسی نے دے کے پایا کس نے کیا پا کر دیا
مری حیات ہے محروم مدعائے حیات
وہ رہ گزر ہوں جسے کوئی نقشِ پا نہ ملا
اسرار جمال کھل رہے ہیں
ہستی کا سراغ پا رہا ہوں
تنہائی شامِ غم کے ڈر سے
کچھ ان سے جواب پا رہا ہوں
ہر قافلۂ دل کو تو مژدۂ منزل دے
ہر رہ گزر غم میں نقشِ کفِ پا ہو جا

اختر ہوشیارپوری

آندھیوں کو روزن زنداں سے ہم دیکھا کئے
دور تک پھیلا ہوا صحرا تھا نقش پا نہ تھا
رات کی پرچھائیاں بھی گھر کے اندر بند ہیں
شام کی دہلیز پر سورج کا نقش پا بھی ہے
اخترؔ یہ جنگلوں میں اسی کے نشان ہیں
جو خار خار آبلہ پا عمر بھر رہا
ایک ہم ہی تو نہیں آبلہ پا آوارہ
نگہت گل بھی ہوئی باد صبا آوارہ
پھول سے ترستے ہوئے لوگ خرابوں میں کہاں
دشت وحشت میں کوئی آبلہ پا ہی ہوگا

افضل منہاس

رات کے پچھلے پہر دستک کا رکھ لینا خیال
پتے کھڑکیں گے ذرا آواز پا بھی آئے گی

اکبر حمیدی

صرف اکبرؔ ہی نہیں دیکھ کے تصویر ہوا
سب کو حیراں ترے نقش کف پا نے رکھا

احمد فراز

وہ برق رو تھا مگر وہ گیا کہاں جانے
اب انتظار کریں گے شکستہ پا اس کا
اے رفیقو سرِ منزل جا کر
کیا کوئی آبلہ پا یاد آیا
چلے تھے یار بڑے زعم میں ہوا کی طرح
پلٹ کے دیکھا تو بیٹھے ہیں نقشِ پا کی طرح
کیا قیامت ہے کہ جن کے لیے رک رک کے چلے
اب وہی لوگ ہمیں آبلہ پا کہتے ہیں
وقت نے وہ خاک اڑائی ہے کہ دل کے دشت سے
قافلے گزرے ہیں پھر بھی نقشِ پا کوئی نہیں
ہر ایک صاحبِ منزل کو با مراد نہ جان
ہر ایک راہ نشیں کو شکستہ پا نہ سمجھ
جو اب گھمنڈ سے سر کو اٹھائے پھرتا ہے
اسی طرح کی تو مخلوق خاکِ پا تھی مری

امیر مینائی

وا کردہ چشم دل صفت نقشِ پا ہوں میں
ہر رہ گزر میں راہ تری دیکھتا ہوں میں

شاذ تمکنت

ترے خرام کو دیکھا بہ چشم حسرت و یاس
تمام عمر ترے نقشِ پا سے کچھ نہ کہا
بھنور کی چیخ بلاتی رہی مگر اے شاذؔ
اندھیری رات تھی موجوں کا نقشِ پا نہ ملا
میں تری راہ میں پامال ہوا جاتا ہوں
مٹ نہ جائے ترا نقشِ کفِ پا میری طرح
دریا پہ آنسوؤں کے تجھے ڈھونڈتا ہوں میں
پانی پہ تیرا نقشِ کفِ پا دکھائی دے

فراق گورکھپوری

یہ سناٹا ہے میرے پاؤں کی چاپ
فراقؔ اپنی کچھ آہٹ پا رہا ہوں
چال ہے بادۂ ہستی کا چھلکتا ہوا جام
ہم کہاں تھے ترے نقشِ کفِ پا سے پہلے
ہم سفر راہِ عدم میں نہ ہو تاروں بھری رات
ہم پہنچ جائیں گے اس آبلہ پا سے پہلے

کلیم عاجز

چلتے گئے ہم پھول بناتے گئے چھالے
صحرا کو مری لغزشِ پا یاد رہے گی

کیفی اعظمی

اکیسویں صدی کی طرف ہم چلے تو ہیں
فتنے بھی جاگ اٹھے ہیں آواز پا کے ساتھ

محبوب خزاں

کوئی قریب نہ آئے شکستہ پا ہوں میں
کرم تو ہے مگر انجام دیکھتا ہوں میں

مجروح سلطان پوری

یہ کوئے یار یہ زنداں یہ فرش مے خانہ
انہیں ہم اہل تمنا کے نقشِ پا کہیے

محسن احسان

مجھے بھی لگتی کچھ آسان منزلِ دشوار
جو دوسروں کی صدائے نقوشِ پا سنتا

میرا جی

گناہوں سے نشوونما پا گیا دل
در پختہ کاری پہ پہنچا گیا دل

ناصر کاظمی

آج پھر وسعتِ صحرائے جنوں
پرسشِ آبلہ پا چاہتی ہے
اسی منزل میں ہیں سب ہجر و وصال
رہرو آبلہ پا غور سے سن!
سرمئی دیس کے سپنے لے کر
شبنمِ زمزمہ پا پھر آئی
لیے ہی جاتی ہے ہر دم کوئی صدا ناصر
یہ اور بات سراغِ نشانِ پا نہ لگے
غمگسار سفر راہِ وفا
مژۂآبلہ پا ہوتی ہے
بنے بنائے ہوئے راستوں پہ جا نکلے
یہ ہم سفر مرے کتنے گریز پا نکلے