انشاء اللہ خان انشا

بات کے ساتھ ہی موجود ہے ٹال ایک نہ ایک
ہے خلاف اپنے سدا آپ کے چال ایک نہ ایک

حیدر علی آتش

زنجیر و طوق ہر برس آ کر پنہا گئی
دیوانہ ہوں میں بادِ بہاری کی چال کا

مصحفی غلام ہمدانی

دل چلا صبر چلا جی بھی چلا جاتا ہے
ٹک مدد کر تو کہ لشکر میں مرے چال ہے آج
اے سروِ رواں ٹک اک ادھر دیکھ
جی جاتے ہیں تیری چال کے ساتھ
یوں تلاشی جو چاہے لکھ جاوے
لیک مشکل ہے بول چال کا شعر
فرصت ملی تو خامۂِ بال تدرو سے
عاشق ترے لکھیں گے تری چال کی کتاب
آنکھوں کے تلے مری پھرے ہے
اب تک وہی بول چال دن رات

باقی صدیقی

کھو بیٹھے ہیں اعتبار اپنا
آ آ کے جہاں کی چال میں ہم
احتیاط غمِ حیات نہ پوچھ
چل دیے ہم جہاں کی چال کے ساتھ
ہیں ابھی مرحلے بہت باقیؔ
خود فریبی تو ہے اک آخری چال
زندگی کی بساط پر باقیؔ
موت کی ایک چال ہیں ہم لوگ

غلام محمد قاصر

اسی سے کرتے تھے ہم روز و شب کا اندازہ
زمیں پہ رہ کے وہ سورج کی چال رکھتے تھے

ماجد صدیقی

ساڑھی کی سبز ڈال میں لپٹی ہوئی بہار
کیا کچھ شباب تھا نہ سکوٹر کی چال پر

حسرت موہانی

ایسے بگڑے وہ سن کے شوق کی بات
آج تک ہم سے بول چال نہیں

سیماب اکبر آبادی

اہلِ چمن ہمیں نہ اسیروں کا طعن دیں
وہ خوش ہیں اپنے حال میں اہم اپنی چال میں

احمد فراز

اب تو شہہ مات ہو رہی ہے فرازؔ
اب بچاؤ کی کوئی چال کہاں
یہ رہ گزر پہ جو شمعیں دمکتی جاتی ہیں
اسی کا قامتِ زیبا ہے ، چال جو بھی ہو

قتیل شفائی

بھر بھر نظریں دیکھیں تجھ کو آتے جاتے لوگ
دیکھ تجھے بدنام نہ کر دے یہ ہرنی سی چال

محسن احسان

زمانے ہم تری ہر کج روی کو جانتے ہیں
اسی لیے کبھی آئے نہ تیری چال میں ہم