بہادر شاہ ظفر

شب و روز پھول میں جو تلے کہو خار غم کو وہ کیا سہے
ملے طوق قید میں جب انہیں کہا گل کے بدلے یہ ہار ہے
پوچھتے ہو حال کیا میرا قمار عشق میں
جھاڑ بیٹھا ہاتھ میں نقدِ دل و دیں ہار کے

حیدر علی آتش

پہنا ہے جب سے تو نے شب ماہ میں اسے
کیا کیا شگوفے پھولتے ہیں ہار کے لیے

مصحفی غلام ہمدانی

کیوں کر نہ تجھے دوڑ کے چھاتی سے لگا لوں
پھولوں کا گلے میں ترے یہ ہار غضب ہے

فیض احمد فیض

دونوں جہان تیری محبت میں ہار کے
وہ جارہا ہے کوئی شبِ غم گزار کے

باقی صدیقی

بیکلی کو قرار مان گئے
لے غم زیست ہار مان گئے

جون ایلیا

ہم یہاں ہیں بے گناہ سو ہم میں سے جونؔ ایلیا
کوئی جیت آیا یہاں اور کوئی ہار آیا تو کیا
شوق کا بار اتار آیا ہوں
آج میں اس کو ہار آیا ہوں

قمر جلالوی

قمر نثار ہو یہ سادگی بھی کیا کم ہے
گلے میں ڈال کے پھولوں کا ہار کیا ہو گا
تم چلے آئے تو رونق پر مزار آ ہی گیا
شمعِ روشن ہو گئی پھولوں کا ہار آ ہی گیا

شکیب جلالی

اک آہ بھرنا شکیبؔ‘ ہم سے خزاں نصیبوں کو یاد کر کے
کلائیوں میں جو ٹہنیوں کی‘ مہکتی کلیوں کے ہار دیکھو

عرفان صدیقی

میں نے تو یہ جنگ نہیں چھیڑی، مرا کام تو لڑتے رہنا ہے
آنے والے مرے کھاتے میں، کل جیت لکھیں یا ہار لکھیں

مصطفی زیدی

متاعِ دل ہی بچی تھی بس اک زمانے سے
سو ہم اسے بھی تری انجمن میں ہار آئے

جمال احسانی

وہ مثلِ آئینہ دیوار پر رکھا ہوا تھا
جو اک انعام میری ہار پر رکھا ہوا تھا

بشیر بدر

اگر آسماں کی نمائشوں میں مجھے بھی اذن قیام ہو
تو میں موتیوں کی دکان سے تری بالیاں ترے ہار لوں

عبید اللہ علیم

اک سبز شاخِ گلاب کی تھا اک دنیا اپنے خواب کی تھا
وہ ایک بہار جو آئی نہیں اس کے لیے سب کچھ ہار دیا

سیماب اکبر آبادی

شاید جگہ نصیب ہو اس گل کے ہار میں
میں پھول بن کے آؤں گا اب کی بہار میں
کفنائے باغباں مجھے پھولوں کے ہار میں
کچھ تو برا ہو دل مرا اب کی بہار میں
گندھوا کے دل کو لائے ہیں پھولوں کے ہار میں
یہ ہار ان کو نذر کریں گے بہار میں

شاد عظیم آبادی

ہمارے نالۂ دل کا نہ پوچھئے احوال
گلی سے یار کی ہمت بھی اب کے ہار آیا
دلا پلٹ گیا قسمت کا پہلے ہی پاسا
اب اپنی جیت کہاں دل جب اپنا ہار آیا

شان الحق حقی

حقیؔ سے سرگراں ہی سہی نکتہ دان شعر
اک رنگ ہے کہ ہے کچھ اسی جان ہار تک

احمد فراز

زندگی تیری امانت ہے مگر کیا کیجے
لوگ یہ بوجھ بھی تھک ہار کے رکھ دیتے ہیں

امیر مینائی

نہیں پوچھتا ہے مجھ کو کوئی پھول اس چمن میں
دلِ داغدار ہوتا ہو گلے کا ہار ہوتا

شاذ تمکنت

زد میں آتے رہے تیرے شہ و فرزیں کیا کیا
اپنی جیتی ہوئی بازی کو مری ہار سے دیکھ

کلیم عاجز

اسیر کر کے ہمیں کیا پھرے ہے اتراتا
گلے میں ڈالے وہ پھولوں کا ہار دیکھو تو

محبوب خزاں

محبت کو گلے کا ہار بھی کرتے نہیں بنتا
کچھ ایسی بات ہے انکار بھی کرتے نہیں بنتا

محسن نقوی

لبوں پہ حرفِ رجز ہے زرہ اتار کے بھی
میں جشن فتح مناتا ہوں جنگ ہار کے بھی