حیدر علی آتش

دو گھڑی کی جو ملاقات تھی وہ بھی موقوف
ایسا پڑتا تھا خلل یار کی اوقات میں کیا

مصحفی غلام ہمدانی

دے مصحفیؔ کو نعمت و دولت تو اے کریم
تا سب کہیں کہ اس کی اب اوقات بڑھ گئی
کاغذ پہ شب و روز تری کھینچوں ہوں تصویر
یعنی اسی صورت بسر اوقات کہیں ہو
کڑھ مت کہ فراغت کی بھی آ جائے ہے ساعت
پھر مان دوانے وہی اوقات ہے اور تو
کس چیز پہ پھر ہم ہوں گفتار تعین
دن رات کی ٹھہرے ہے نہ اوقات کی ٹھہرے
دیکھا جو شبِ ہجر تو رویا میں کہ اس وقت
یاد آیا شبِ وصل کے اوقات کا عالم

مرزا رفیع سودا

تجھ بن بہت ہی کٹتی ہے اوقات بے طرح
جوں توں کے دن تو گزرے ہے پر رات بے طرح

باقی صدیقی

دل ہی جب ٹوٹ گیا تو پھر کیا
نہ ہوئی یا بسر اوقات ہوئی
دل کو روشن کرتی ہیں
بجھ کر شمعیں بعض اوقات

عبدالحمید عدم

یہ دیکھ کہ کس حال میں ہم زندہ ہیں اب تک
مت پوچھ کہ کیسے بسر اوقات ہوئی ہے

عرفان صدیقی

پیش ہوس تھا خوانِ دو عالم سجا ہوا
اس رزق پر مگر بسر اوقات نئیں ہوئی

عبید اللہ علیم

اس کے نام پہ ماریں کھانا اب اعزاز ہمارا
اور کسی کی یہ عزت اوقات نہیں دیکھی

تلوک چند محروم

صورت کوئی قرار کی دن رات میں نہیں
یہ چیز وہ ہے جو مرے اوقات میں نہیں

حسرت موہانی

دن کو ہم ان سے بگڑتے ہیں وہ شب کو ہم سے
رسم پابندی اوقات چلی جاتی ہے

حفیظ جالندھری

دشنام کا جواب نہ سوجھا بجز سلام
ظاہر مرے کلام کی اوقات ہو گئی
اب شکر ناقبول ہے شکوہ فضول ہے
جیسے بھی ہو گئی بسر اوقات ہو گئی

سیف الدین سیف

آہ تسکین بھی اب سیفؔ شبِ ہجراں میں
اکثر اوقات بڑی دیر کے بعد آئی ہے
کیسے جیتے ہیں یہ کس طرح جیے جاتے ہیں
اہلِ دل کی بسر اوقات پہ رونا آیا

شکیل بدایونی

اپنی ہستی کا بھی انسان کو عرفاں نہ ہوا
خاک پھر خاک تھی اوقات سے آگے نہ بڑھی

فراق گورکھپوری

گھٹتے گھٹتے تری عنایت
میری اوقات ہو گئی ہے

قتیل شفائی

مجھ کو لگا عام سا اک آدمی
آیا وہ جب کام کے اوقات میں

کلیم عاجز

میرے ہی لہو پر گزر اوقات کرو ہو
مجھ سے ہی امیروں کی طرح بات کرو ہو

نوح ناروی

یہ میرے واسطے ہے بات کتنی
وہ کہتے ہیں تری اوقات کتنی