حیدر علی آتش

پڑھ کے خط اور بھی مایوس ہوئے وصل سے ہم
یار نے بھیجا سفر سے ہمیں سوغات میں کیا
اے نسیمِ سحری بہر اسیرانِ قفس
تحفہ تر نکہتِ گل سے کوئی سوغات نہ تھی

عرفان صدیقی

یاقوتِ لب تو کارِ محبت کا ہے صلہ
اجرت ہوئی حضور یہ سوغات نئیں ہوئی

مصطفیٰ زیدی

سینے میں خزاں آنکھوں میں برسات رہی ہے
اس عشق میں ہر فصل کی سوغات رہی ہے

رئیس فروغؔ

لہوکے رنگ میں اک بات ہے تمھارے لیے
ہمارے گھر یہی سوغات ہے تمھارے لیے

بشیر بدر

کہاں آنسوؤں کی یہ سوغات ہوگی
نئے لوگ ہوں گے نئی بات ہوگی

علی سردار جعفری

تشنگی ہے کہ بجھائے نہیں بجھتی سردارؔ
بڑھ گئی کوثر و تسنیم کی سوغات کے بعد

غلام محمد قاصر

جمال اپنے نظاروں میں کھو گیا اے دل
سو اس کی میز پہ سوغات چھوڑ دیتے ہیں

سید ضمیر جعفری

اک شگفتہ درد اک شعلوں میں بجھتی چاندنی
اجنبی شہروں سے لایا ہوں یہی سوغات میں

سلام مچھلی شہری

غزل کی ڈال سجا کر چمن کی دلہن کو
سلامؔ نذر کرے گا سہاگ کی سوغات

احمد فراز

کب تک درد کے تحفے بانٹو خونِ جگر سوغات کرو
’’جالب ہن گل مک گئی اے ‘‘ ہن جان نوں ہی خیرات کرو

فراق گورکھپوری

جو چیز بھی مجھ کو ہاتھ آئی
تیری سوغات ہو گئی ہے
اوچھی نگاہ ڈال کے اک سمت رکھ دیا
دل کیا دیا غریب کی سوغات ہو گئی

نوح ناروی

یہ سر ہے یہ کلیجا ہے یہ دل ہے
وہ لیں گے خیر سے سوغات کتنی