حیدر علی آتش

شمع گل ہووے جو صبح شبِ ہجراں مانگوں
اوس پڑنی بھی ہو موقوف جو یاراں مانگوں

فیض احمد فیض

آنکھوں میں درد مندی، ہونٹوں پہ عذر خواہی
جانانہ وارآئی شامِ فراق یاراں

جون ایلیا

کیا ہوئے آشفتہ کاراں کیا ہوئے
یاد یاراں یار یاراں کیا ہوئے

عرفان صدیقی

مری بستی کے سارے رہنے والے سرکشیدہ ہیں
تو پھر کس کو کلاہ شہرِ یاراں بھیج دے کوئی

ضیا جالندھری

آج ہی محفل سرد پڑی ہے آج ہی دردِ فراواں ہے
کوئی تو دل کی باتیں چھیڑو یارو محفل یاراں ہے

ظہیر کاشمیری

ابھی کچھ کارِ محبت ہے مجھے دنیا میں
زندگی ختم نہ ہو صحبت یاراں کی طرح
وہ جن کو اپنے ترکِ تعلق پہ ناز تھا
آج ان کو یاد صحبت یاراں بھی آئے گی

علی سردار جعفری

منزل عشق و جنوں کے فاصلے ہیں سر بکف
ان کٹھن راہوں میں لطف دست یاراں چاہیے
نغمۂ زنجیر ہے اور شہرِ یاراں ان دنوں
ہے بہت اہلِ جنوں شور بہاراں ان دنوں
اس وفا دشمن سے پیمانِ وفا ہے استوار
زیرِ سنگِ سخت ہے پھر دست یاراں ان دنوں
ہے گدائے مے کدہ کے سر پہ تاج خسروی
کوزہ گر کی گل ہے خاک شہرِ یاراں ان دنوں

سیف الدین سیف

اسی رستے میں آخر وہ کڑی منزل بھی آئے گی
جہاں دم توڑ دے گی یاد یاراں ہم نہ کہتے تھے

شان الحق حقی

وہ چلے خزاں کے ڈیرے کہ ہے آمد بہاراں
شبِ غم کے رہ نشینوں کہو اب صلاح یاراں

عزیز حامد مدنی

وہ شکستِ خواب محفل وہ ہوا کے چار جھونکے
لگی دل پہ تیر بن کر دمِ صبح یاد یاراں

احمد فراز

اب کے کچھ ایسی سجی محفل یاراں جاناں
سر بہ زانو ہے کوئی سر بہ گریباں جاناں

مجروح سلطان پوری

دست پر خوں کو کف دست نگاراں سمجھے
قتل گہہ تھی جسے ہم محفل یاراں سمجھے