شعلۂ رنگ بہارِ گل عذاراں چاہیے
علی سردار جعفری
سرد ہیں دل آتش روئے نگاراں چاہیے
شعلۂ رنگ بہارِ گل عذاراں چاہیے
منزل عشق و جنوں کے فاصلے ہیں سر بکف
ان کٹھن راہوں میں لطف دست یاراں چاہیے
کٹ رہی ہے اور کٹ چکتی نہیں فصلِ خزاں
تیز تر اک اور تیغ نو بہاراں چاہیے
آج مے خانہ میں سحر چشمِ ساقی کے لیے
التفات چشمِ مست میگساراں چاہیے
اس دلِ وحشی کی آزادی کا کیا کیجے علاج
اک کمند گیسوئے یزداں شکاراں چاہیے
نغمہ بن جاتا ہے نالہ ان کی بزمِ ناز میں
ان کو خوش رکھنے کو شور سوگواراں چاہیے
آسمانوں سے برستے ہیں زمیں پر ریگزار
آج پھر سردارؔ رقص برق و باراں چاہیے