فیض احمد فیض

یادِ غزال چشماں، ذکرِ سمن عذاراں
جب چاہا کر لیا ہے کنجِ قفس بہاراں
نذر مانگے جو گلستاں سے خداوندِ جہاں
ساغرِ مے میں لیے خونِ بہاراں چلیے

یگانہ چنگیزی

دیتی ہے وحشتِ دل فصل بہاراں کی خبر
اب کہاں وحشیوں کو جیب و گریباں کی خبر

عرفان صدیقی

گہر برسانے والے ‘ موجِ باراں بھیج دے کوئی
خزاں کی رت میں بھی ابرِ بہاراں بھیج دے کوئی
میں برگ ریزِ ہجر میں زندہ نہ رہ سکوں
اتنا امیدوارِ بہاراں نہ کر مجھے

رئیس فروغؔ

پاگل پنچھی بعد میں چہکے پہلے میں نے دیکھا تھا
اس جمپر کی شکنوں میں ہلکا سا رنگ بہاراں کا

اسرار الحق مجاز

اب گل سے نظر ملتی ہی نہیں اب دل کی کلی کھلتی ہی نہیں
اے فصل بہاراں رخصت ہو ہم لطفِ بہاراں بھول گئے

زہرا نگاہ

کلی اداس چمن سوگوار گل خاموش
یہ انتظار بہاراں ہے دیکھیے کیا ہو

ظہیر کاشمیری

برق بن کر مرے خرمن کو جلانے والے
تو ہی برسا تھا کبھی ابرِ بہاراں کی طرح
دل تو مدت سے کڑی دھوپ میں جلتا ہے ظہیرؔ
آگ برساتا ہوا ابرِ بہاراں کیوں ہے

علی سردار جعفری

کٹ رہی ہے اور کٹ چکتی نہیں فصلِ خزاں
تیز تر اک اور تیغ نو بہاراں چاہیے
نغمۂ زنجیر ہے اور شہرِ یاراں ان دنوں
ہے بہت اہلِ جنوں شور بہاراں ان دنوں

جوش ملیح آبادی

کلیاں جھلس گئی ہیں دہکنے لگے ہیں پھول
یوں بھی چلی ہے باد بہاراں کبھی کبھی

سیف الدین سیف

خزاں کی آہٹوں پر کانپتی ہیں پتیاں گل کی
بکھرنے کو ہے اب زلف بہاراں ہم نہ کہتے تھے

شان الحق حقی

وہ چلے خزاں کے ڈیرے کہ ہے آمد بہاراں
شبِ غم کے رہ نشینوں کہو اب صلاح یاراں

شکیل بدایونی

گلشن کے دل میں آج بھی محفوظ ہیں وہ پھول
مرجھا گئے جو داغ بہاراں لیے ہوئے

عزیز حامد مدنی

کس انتظار میں تھی روح خود نمائی گل
برس کے ابرِ بہاراں کھلے تو بات چلے

قابل اجمیری

اب دیکھتے ہیں کون اڑاتا ہے رنگ و بو
اپنا لہو شریکِ بہاراں کریں گے ہم

مجروح سلطان پوری

آتی ہی رہی ہے گلشن میں اب کے بھی بہار آئی ہے تو کیا
ہے یوں کہ قفس کے گوشوں سے اعلان بہاراں ہونا تھا
کچھ بھی دامن میں نہیں خار ملامت کے سوا
اے جنوں ہم بھی کسے کوئے بہاراں سمجھے
چاکِ جگر محتاج رفو ہے آج تو دامن صرف لہو ہے
اک موسم تھا ہم کو رہا ہے شوق بہاراں تم سے زیادہ
سیل رنگ آ ہی رہے گا مگر اے کشت چمن
ضرب موسم تو پڑی بند بہاراں تو کھلا

ناصر کاظمی

پردۂ گل ہی سے شاید کوئی آواز آئے
فرصتِ سیر و تماشائے بہاراں ہی سہی
دورِ خزاں میں یوں مرے دل کو قرار ہے
میں جیسے آشنائے بہاراں نہ تھا کبھی