خزاں کی رت میں بھی ابرِ بہاراں بھیج دے کوئی
عرفان صدیقی
گہر برسانے والے ‘ موجِ باراں بھیج دے کوئی
خزاں کی رت میں بھی ابرِ بہاراں بھیج دے کوئی
پرندے تھک چکے ہیں اڑتے اڑتے آسمانوں میں
انہیں بھی اب نویدِ شاخساراں بھیج دے کوئی
بہت دن سے غبار اٹھا نہیں ویران راہوں پر
خرابوں میں گروہِ شہسواراں بھیج دے کوئی
مری بستی کے سارے رہنے والے سرکشیدہ ہیں
تو پھر کس کو کلاہ شہرِ یاراں بھیج دے کوئی
جو اوروں کے دکھوں کا بار اٹھائے پھرتے رہتے ہیں
اب ان شانوں کو دستِ غمگساراں بھیج دے کوئی
مفاعیلن مفاعیلن مفاعیلن مفاعیلن
ہزج مثمن سالم