حیدر علی آتش

شب اس کے افعیِ گیسو کا جو فسانہ ہوا
ہوا کچھ ایسی بندھی گل چراغ خانہ ہوا
دکھا دے زاہد مغرور کو بھی اے صنم آنکھ
جمال حور کا حد سے سوا فسانہ ہوا
ہمیشہ شام سے ہمسائے مر رہے آتشؔ
ہمارا نالۂ دل گوش کو فسانہ ہوا
ہوتا ہے زرد سن کے جو نامرد مدعی
رستم کی داستاں ہے ہمارا فسانہ کیا
سن تو سہی جہاں میں ہے تیرا فسانہ کیا
کہتی ہے تجھ کو خلقِ خدا غائبانہ کیا

مصحفی غلام ہمدانی

مذکور رہے ہے درد و غم کا
دن رات یہی فسانہ ہے یاں

مصطفٰی خان شیفتہ

دیکھتے ہم بھی کہ آرام سے سوتے کیوں کر
نہ سنا تم نے کبھی ہائے فسانہ دل کا
ان کو منظور نہیں نیند کا آنا شبِ وصل
اس لیے کہتے ہیں غیروں کا فسانہ شبِ وصل
ذکرِ شیریں کی اگر بندی ہے
کوہ کن کا بھی فسانہ موقوف!

یگانہ چنگیزی

لو بجھا چاہتا ہے دل کا کنول
ختم اب عشق کا فسانہ ہے

باقی صدیقی

ہوئی کش مکش زندگی کی فسانہ
وہ دل چھوڑ کر جا رہا ہے زمانہ
اسی میں ہے پوشیدہ راز زمانہ
فسانہ حقیقت، حقیقت فسانہ
ادھر نام تک مٹ رہا ہے کسی کا
ادھر بن رہا ہے کسی کا فسانہ
چال ایسی غمِ زمانہ چلا
پھر نہ آگے ترا فسانہ چلا

جگر مراد آبادی

میں ہوں اس مقام پر اب کہ فراق و وصل کیسے
مرا عشق بھی کہانی ترا حسن بھی فسانہ
تری دوری و حضوری کا یہ ہے عجیب عالم
ابھی زندگی حقیقت ابھی زندگی فسانہ
یہ فلک یہ ماہ و انجم یہ زمین یہ زمانہ
ترے حسن کی حکایت مرے عشق کا فسانہ
یہ ہے عشق کی کرامت یہ کمال شاعرانہ
ابھی منہ سے بات نکلی ابھی ہو گئی فسانہ

قمر جلالوی

مجھے یاد ہے ابھی تک ترے جور کا فسانہ
جو میں راز فاش کر دوں تجھے کیا کہے زمانہ
نہ سنا سکے مسلسل غمِ دوریِ وطن کو
کبھی رو لیے گھڑی بھر کبھی کہہ دیا فسانہ
قمر اپنے داغِ دل کی وہ کہانی میں نے چھیڑی
کہ سنا کیے ستارے مرا رات بھر فسانہ

عرفان صدیقی

تمام جلنا جلانا فسانہ ہوتا ہوا
چراغ لمبے سفر پر روانہ ہوتا ہوا
غرض کہ پوچھتے کیا ہو مآل سوختگاں
تمام جلنا جلانا فسانہ ہو گیا ہے

مجید امجد

مری تباہیوں کا بھی فسانہ کیا فسانہ ہے
نہ بجلیوں کا تذکرہ نہ آشیاں کی بات ہے
کوئی بھی دور سرِ محفل زمانہ رہا
تمہارا ذکر رہا یا مرا فسانہ رہا
کیا کہیے کیا حجابِ حیا کا فسانہ تھا!
سب کچھ بس اک نگاہِ کرم کا بہانہ تھا

الطاف حسین حالی

تذکرہ دہلی مرحوم کا اے دوست نہ چھیڑ
نہ سنا جائے گا ہم سے یہ فسانہ ہرگز

بشیر بدر

دل دکھوں کو سبھی ستاتے ہیں
شعر کیا گیت کیا فسانہ کیا

بیخود بدایونی

پری وشوں کو سناتے ہیں قصہ خواں بیخودؔ
ہمارا حال نہ ٹھہرا کوئی فسانہ ہوا

جلیل مانک پوری

ہوا ہے شہرِ خموشاں میں جب گزر میرا
سنا کیا ہوں لبِ گور سے فسانۂ عشق
کہیں ہے داغ کا مضموں کہیں ہے سوز کا ذکر
سنو نہ تم کہ بہت گرم ہے فسانۂ عشق
تمام عمر اسی صحرا کی خاک چھانی ہے
جو تم سنو تو سناؤں کوئی فسانۂ عشق

احمد فراز

وہ رات بھول چکو وہ سخن نہ دہراؤ
وہ رات خواب ہوئی وہ سخن فسانہ ہوا
ہم خلد سے نکل تو گئے ہیں پر اے خدا
اتنے سے واقعے کا فسانہ بہت ہوا
دکھ فسانہ نہیں کہ تجھ سے کہیں
دل بھی مانا نہیں کہ تجھ سے کہیں
اس سے بڑھ کر کوئی انعام ہنر کیا ہے فرازؔ
اپنے ہی عہد میں اک شخص فسانہ بن جائے

نوح ناروی

گلشن میں کبھی ہم سنتے تھے وہ کیا تھا زمانہ پھولوں کا
کلیوں سے کہانی کلیوں کی پھولوں سے فسانہ پھولوں کا
گلچیں سے کبھی میں سنتا ہوں بلبل سے کبھی میں کہتا ہوں
اس دردِ سری کا باعث ہے دلچسپ فسانہ پھولوں کا
مرغان قفس کو نیند کہاں نیند آئے یہی امید کہاں
گلچیں سے انہیں سنواتا ہے صیاد فسانہ پھولوں کا
اے نوحؔ اثر اتنا تو کیا تم پر بھی چمن کے منظر نے
طوفان اٹھانا بھول گئے لے بیٹھے فسانہ پھولوں کا