یک زخمہ بصد ترانہ ہے یاں
مصحفی غلام ہمدانی
یک نالۂِ عاشقانہ ہے یاں
یک زخمہ بصد ترانہ ہے یاں
مذکور رہے ہے درد و غم کا
دن رات یہی فسانہ ہے یاں
پھینکے ہے وہ تیر غمزہ مجھ پر
سمجھے ہے کہ دل نشانہ ہے یاں
گر اپنی بدی کے سر کو کاٹے
بیگانہ بھی پر یگانہ ہے یاں
یک جنبش شوقِ دل کو بس ہے
کیا حاجت تازیانہ ہے یاں
جو آئے ہے جھک کے جائے ہے وہ
گویا کہ شراب خانہ ہے یاں
ویران ہوئے چمن سے نکلے
ہم سمجھتے تھے آشیانہ ہے یاں
آنکھیں جو بھری ہی آتیاں ہیں
پانی کا مگر خزانہ ہے یاں
دیواں کی مرے تو سیر تو کر
اے مصحفیؔ اک زمانہ ہے یاں
بلبل ہے چمن ہے سرو و گل ہے
ساقی ہے مے مغانہ ہے یاں
مفعول مفاعِلن فَعُولن
ہزج مسدس اخرب مقبوض محذوف