حیدر علی آتش

نگاہِ ناز بتاں سے نہ چشم رحم بھی رکھ
کسی کا یار نہیں فتنۂِ زمانہ ہوا
طبل و علم ہی پاس ہے اپنے نہ ملک و مال
ہم سے خلاف ہو کے کرے گا زمانہ کیا
شہیدِ ناز و ادا کا ترے زمانہ ہوا
اڑایا مہندی نے دل چور کا بہانہ ہوا

داغ دہلوی

وہ زمانہ نظر نہیں آتا
کچھ ٹھکانا نظر نہیں آتا
اک زمانہ مری نظر میں رہا
اک زمانہ نظر نہیں آتا

مصحفی غلام ہمدانی

دیواں کی مرے تو سیر تو کر
اے مصحفیؔ اک زمانہ ہے یاں

مصطفٰی خان شیفتہ

جلوہ گاہِ غم و شادی، دل و شادی کم یاب
کیوں نہ ہو شکوہ سرا ایک زمانہ دل کا
یہ بت کہ جائے شیب ہے ، جب تھا نقاب میں
عہدِ شباب اور بتوں کا زمانہ تھا

فیض احمد فیض

خوشا کہ آج ہر اک مدعی کے لب پر ہے
وہ راز جس نے ہمیں راندۂ زمانہ کیا

یگانہ چنگیزی

یار ہے آئنہ ہے شانہ ہے
چشمِ بد دور کیا زمانہ ہے
جھانکنے تاکنے کا وقت گیا
اب وہ ہم ہیں نہ وہ زمانہ ہے
وحشت انگیز ہے نسیم بہار
کیا جنوں خیز یہ زمانہ ہے

باقی صدیقی

ہوئی کش مکش زندگی کی فسانہ
وہ دل چھوڑ کر جا رہا ہے زمانہ
اسی میں ہے پوشیدہ راز زمانہ
فسانہ حقیقت، حقیقت فسانہ
نہ پوچھو محبت کی پرواز باقیؔ
بہت دور تک ساتھ آیا زمانہ
چال ایسی غمِ زمانہ چلا
پھر نہ آگے ترا فسانہ چلا
ان کا یا اپنا تماشا دیکھو
جو دکھاتا ہے زمانہ دیکھو

جگر مراد آبادی

وہ ادائے دلبری ہو کہ نوائے عاشقانہ
جو دلوں کو فتح کر لے وہی فاتح زمانہ
یہ ترا جمال کامل یہ شباب کا زمانہ
دل دشمناں سلامت دل دوستاں نشانہ
ترے عشق کی کرامت یہ اگر نہیں تو کیا ہے
کبھی بے ادب نہ گزرا مرے پاس سے زمانہ
میں وہ صاف ہی نہ کہہ دوں جو ہے فرق مجھ میں تجھ میں
ترا درد درد تنہا مرا غم غمِ زمانہ
یہ فلک یہ ماہ و انجم یہ زمین یہ زمانہ
ترے حسن کی حکایت مرے عشق کا فسانہ
وہ ادائے دلبری ہو کہ نوائے عاشقانہ
جو دلوں کو فتح کر لے وہی فاتح زمانہ
کبھی حسن کی طبیعت نہ بدل سکا زمانہ
وہی ناز بے نیازی وہی شان خسروانہ
یہ مرا پیام کہنا تو صبا مؤدبانہ
کہ گزر گیا ہے پیارے تجھے دیکھے اک زمانہ

قمر جلالوی

بلا بلائے حسینوں کا آنا جانا تھا
قمر خدا کی قسم وہ بھی کیا زمانہ تھا
نہ روکیے مجھے نالوں سے کہ اب محشر ہے
یہ میرا وقت ہے وہ آپ کا زمانہ تھا
مجھے یاد ہے ابھی تک ترے جور کا فسانہ
جو میں راز فاش کر دوں تجھے کیا کہے زمانہ
نہ وہ پھول ہیں چمن میں نہ وہ شاخ آشیانہ
فقط ایک برق چمکی کہ بدل گیا زمانہ
یہ رقیب اور تم سے رہ و رسمِ دوستانہ
ابھی جس ہوا میں تم ہو وہ بدل گیا زمانہ

عرفان صدیقی

عجب گداز پرندے بدن میں اڑتے ہوئے
اسے گلے سے لگائے زمانہ ہوتا ہوا
بدن میں جیسے لہو تازیانہ ہو گیا ہے
اسے گلے سے لگائے زمانہ ہو گیا ہے

مجید امجد

کوئی بھی دور سرِ محفل زمانہ رہا
تمہارا ذکر رہا یا مرا فسانہ رہا
تم اک جزیرۂ دل میں سمٹ کے بیٹھ رہے
مری نگاہ میں طوفانِ صد زمانہ رہا
حرم اور دیر فسانہ ہے ، یہی جلتی سانس زمانہ ہے
یہی گوشۂ دلِ ناصبور ہی کنجِ باغ نعیم ہے
یہ کون ادھر سے گزرا، میں سمجھا حضور تھے
اک موڑ اور مڑ کے جو دیکھا، زمانہ تھا

الطاف حسین حالی

وہ تو بھولے تھے ہمیں ہم بھی انہیں بھول گئے
ایسا بدلا ہے نہ بدلے گا زمانہ ہرگز

اسرار الحق مجاز

جو دل تیرے غم کا نشانہ بھی ہے
قتیل جفائے زمانہ بھی ہے

بیخود بدایونی

خیال میں نہ رہیں صورتیں عزیزوں کی
وطن سے چھوٹے ہوئے اس قدر زمانہ ہوا

عالم تاب تشنہ

میں اپنی جنگ میں تنِ تنہا شریک تھا
دشمن کے ساتھ سارا زمانہ شریک تھا

غلام محمد قاصر

سوئے ہوئے جذبوں کو جگانا ہی نہیں تھا
اے دل وہ محبت کا زمانہ ہی نہیں تھا

جلیل مانک پوری

کہاں ہم اور کہاں اب شراب خانۂ عشق
نہ وہ دماغ نہ وہ دل نہ وہ زمانۂ عشق

سیماب اکبر آبادی

یہ دور ترقی ہے رفعت کا زمانہ ہے
ذروں کو اٹھانا ہے تاروں سے ملانا ہے
کیا شعبدہ ساماں ہے سیمابؔ زمانہ بھی
ہر شخص سمجھتا ہے میرا ہی زمانہ ہے

شاد عظیم آبادی

وہ تیغ لے کے کہتے ہیں دیکھوں تو حق پر کون ہے
میں اک طرف شادؔ اک طرف سارا زمانہ اک طرف

شکیل بدایونی

نہ ہوں جس میں نمایاں حال و ماضی
کوئی ایسا زمانہ چاہتا ہوں

فانی بدایونی

عہدِ جوانی ختم ہوا اب مرتے ہیں نہ جیتے ہیں
ہم بھی جیتے تھے جب تک مر جانے کا زمانہ تھا

احمد فراز

ابھی ابھی وہ ملا تھا ہزار باتیں کیں
ابھی ابھی وہ گیا ہے مگر زمانہ ہوا
اس کو جدا ہوئے بھی زمانہ بہت ہوا
اب کیا کہیں یہ قصہ پرانا بہت ہوا
ہمیں بھی غم طلبی کا نہیں رہا یارا
ترے بھی رنگ نہیں گردشِ زمانہ وہ
ایک تو حرف آشنا تھا مگر
اب زمانہ نہیں کہ تجھ سے کہیں
اے دل گرفتۂ غمِ جاناں سبو اٹھا
اے کشتۂ جفائے زمانہ شراب پی
عشق خود اپنے رقیبوں کو بہم کرتا ہے
ہم جسے پیار کریں جان زمانہ بن جائے

امیر مینائی

اب تو پیری میں نہیں پوچھنے والا کوئی
کبھی اے حسن جوانی! تھا زمانہ تیرا
دور اگلے شعراء کا تھا کبھی، اور امیرؔ
اب تو ہے ملک معانی میں زمانہ تیرا

فراق گورکھپوری

چمن چمن تھی گل داغ عشق سے ہستی
اسی کی نکہتِ برباد کا زمانہ تھا

محسن احسان

کچھ اس کا حسن تھا کچھ زیوروں کی زیبائش
یہ خواب تھا اسے دیکھے ہوئے زمانہ ہوا
جہاں سے ساتھ زمانے کو لے کے چلنا تھا
وہیں پہ چھوڑ گئی گردشِ زمانہ ہمیں

نوح ناروی

گلشن میں کبھی ہم سنتے تھے وہ کیا تھا زمانہ پھولوں کا
کلیوں سے کہانی کلیوں کی پھولوں سے فسانہ پھولوں کا
کیا موسمِ گل پر اترا کر ہم گائیں ترانہ پھولوں کا
دو روز میں آنے والا ہے اک روز زمانہ پھولوں کا
نازاں ہے جو اپنی قسمت پر گلچیں کو یہ کیا معلوم نہیں
جائے گی بہار آئے گی خزاں بدلے گا زمانہ پھولوں کا
شاخیں بھی بلائیں لیتی ہیں پتے بھی نچھاور ہوتے ہیں
اللٰہ رے جوانی گلشن کی اف اف رے زمانہ پھولوں کا
فطرت کے مسافر کو بس میں رکھ سکتے نہیں اشجار چمن
آتا ہے زمانہ پھولوں کا جاتا ہے زمانہ پھولوں کا