کچھ ٹھکانا نظر نہیں آتا
داغ دہلوی
وہ زمانہ نظر نہیں آتا
کچھ ٹھکانا نظر نہیں آتا
جان جاتی دکھائی دیتی ہے
ان کا آنا نظر نہیں آتا
عشق در پردہ پھونکتا ہے آگ
یہ جلانا نظر نہیں آتا
اک زمانہ مری نظر میں رہا
اک زمانہ نظر نہیں آتا
دل نے اس بزم میں بٹھا تو دیا
اٹھ کے جانا نظر نہیں آتا
رہیے مشتاق جلوۂِ دیدار
ہم نے مانا نظر نہیں آتا
لے چلو مجھ کو راہروان عدم
یاں ٹھکانا نظر نہیں آتا
دل پہ بیٹھا کہاں سے تیر نگاہ
یہ نشانہ نظر نہیں آتا
تم ملاؤ گے خاک میں ہم کو
دل ملانا نظر نہیں آتا
آپ ہی دیکھتے ہیں ہم کو تو
دل کا آنا نظر نہیں آتا
دل پر آرزو لٹا اے داغؔ
وہ خزانہ نظر نہیں آتا
فاعِلاتن مفاعِلن فِعْلن
خفیف مسدس مخبون محذوف مقطوع