داغ دہلوی

میری آغوش سے کیا ہی وہ تڑپ کر نکلے
ان کا جانا تھا الٰہی کہ یہ جانا دل کا
لے چلا جان مری روٹھ کے جانا تیرا
ایسے آنے سے تو بہتر تھا نہ آنا تیرا
اپنے دل کو بھی بتاؤں نہ ٹھکانا تیرا
سب نے جانا جو پتا ایک نے جانا تیرا
اپنی آنکھوں میں ابھی کوند گئی بجلی سی
ہم نہ سمجھے کہ یہ آنا ہے کہ جانا تیرا
دل نے اس بزم میں بٹھا تو دیا
اٹھ کے جانا نظر نہیں آتا

شیخ ابراہیم ذوق

سن کے آمد ان کی از خود رفتہ ہو جاتے ہیں ہم
پیشوا لینے کو جانا کوئی ہم سے سیکھ جائے
ہم نے اول ہی کہا تھا تو کرے گا ہم کو قتل
تیوروں کا تاڑ جانا کوئی ہم سے سیکھ جائے

مصحفی غلام ہمدانی

ہر روز ہمیں گھر سے صحرا کو نکل جانا
کھیتوں کا مزہ لینا جنگل کو نکل جانا
آنکھ لڑانا سامنے آنا منہ دکھلانا اور چھپ جانا
یہ بھی ادا ہے کوئی ظالم مان خدا کو مت دے ایذا

مصطفٰیٰ خان شیفتہ

ہم بھی کیا سادے ہیں کیا کیا ہے توقع اس سے
آج تک جس نے ذرا حال نہ جانا دل کا
رمِ آہو سے وہ رم یاد آیا
دشت و صحرا میں بھی جانا موقوف

میر مہدی مجروح

یہی انداز تو ہیں دل کے اڑا لینے کے
ان کی تم نیچی نگاہوں پہ نہ جانا ہرگز
تو تو ہے انور‌ؔ و میکشؔ کی جدائی کا نشاں
دل پر درد سے اے داغ نہ جانا ہرگز
ہم صفیران چمن سب ہوئے گرم پرواز
اب خوش آتا نہیں گلزار میں جانا ہرگز

یگانہ چنگیزی

مجھے اے ناخدا آخر کسی کو منہ دکھانا ہے
بہانہ کر کے تنہا پار اتر جانا نہیں آتا
مصیبت کا پہاڑ آخر کسی دن کٹ ہی جائے گا
مجھے سر مار کر تیشے سے مر جانا نہیں آتا

باقی صدیقی

اپنی تنہائی پہ مر جانا پڑا
راہ میں کیسا یہ ویرانہ پڑا
کس طرف سے آئی تھی تیری صدا
ہر طرف تکنا پڑا، جانا پڑا

جگر مراد آبادی

جو ان پہ گزرتی ہے کس نے اسے جانا ہے
اپنی ہی مصیبت ہے اپنا ہی فسانا ہے
کیا حسن نے سمجھا ہے کیا عشق نے جانا ہے
ہم خاک نشینوں کی ٹھوکر میں زمانا ہے
آغازِ محبت ہے آنا ہے نہ جانا ہے
اشکوں کی حکومت ہے آہوں کا زمانا ہے
یہ عشق نہیں آساں اتنا ہی سمجھ لیجے
اک آگ کا دریا ہے اور ڈوب کے جانا ہے
وہ جو روٹھیں یوں منانا چاہیے
زندگی سے روٹھ جانا چاہیے
زندگی ہے نام جہد و جنگ کا
موت کیا ہے بھول جانا چاہیے

قمر جلالوی

بلا بلائے حسینوں کا آنا جانا تھا
قمر خدا کی قسم وہ بھی کیا زمانہ تھا
ہوا شب کو عبث مئے کے لیے جانا تو کیا ہو گا
اندھیرے میں نظر نہ آیا میخانہ تو کیا ہو گا

عرفان صدیقی

کہیں تو لٹنا ہے پھر نقدِ جاں بچانا کیا
اب آ گئے ہیں تو مقتل سے بچ کے جانا کیا
جب سے جانا ہے کہ میں جان سمجھتا ہوں اسے
وہ ہرن چھوڑ کے جانا بھی نہیں چاہتا ہے

مجید امجد

اب دردِ شش بھی سانس کی کوشش میں ہے شریک
اب کیا ہو، اب تو نیند کو آ جانا چاہیے

الطاف حسین حالی

افسوس کہ غفلت میں کٹا عہدِ جوانی
تھا آب بقا گھر میں مگر، ہم نے نہ جانا
ڈھاریں سی کچھ اے ہمقدمو تم سے بندھی ہے
حالیؔ کو کہیں راہ میں تم چھوڑ نہ جانا
جیتے جی موت کے تم منہ میں نہ جانا ہرگز
دوستو دل نہ لگانا نہ لگانا ہرگز
لے کے داغ آئے گا سینے پہ بہت اے سیاح
دیکھ اس شہر کے کھنڈروں میں نہ جانا ہرگز
کبھی اے علم و ہنر گھر تھا تمہارا دلی
ہم کو بھولے ہو تو گھر بھول نہ جانا ہرگز

حسرت موہانی

دیکھنا مجھ کو جو برگشتہ تو سو سو ناز سے
جب منا لینا تو پھر خود روٹھ جانا یاد ہے

سیف الدین سیف

یہ آلامِ ہستی یہ دور زمانہ
تو کیا اب تمہیں بھول جانا پڑے گا
چلو میکدے میں بسیرا ہی کر لو
نہ آنا پڑے گا نہ جانا پڑے گا

سیماب اکبر آبادی

آغوش تصور ہے اور نقش جمیل ان کا
دوری ہے نہ مجبوری آنا ہے نہ جانا ہے

شان الحق حقی

دنیا ہی کی راہ پہ آخر رفتہ رفتہ آنا ہو گا
درد بھی دے گا ساتھ کہاں تک بیدل ہی بن جانا ہو گا
دل کا ٹھکانا ڈھونڈ لیا ہے اور کہاں اب جانا ہو گا
ہم ہوں گے اور وحشت ہو گی اور یہی ویرانہ ہو گا
دل میں ہجوم درد ہے لیکن آہ کے بھی اوسان نہیں
اس بدلی کو یوں ہی آخر بن برسے چھٹ جانا ہو گا
اس بستی کا کون مسیحا اس بستی کا کون خدا
خود ہی حشر اٹھانے ہوں گے مرنا اور جی جانا ہو گا

شکیل بدایونی

جو تھی حاصل تری محفل سے پہلے
اسی خلوت میں جانا چاہتا ہوں

احمد فراز

اب کیوں نہ زندگی پہ محبت کو وار دیں
اس عاشقی میں جان سے جانا بہت ہوا
مستقل محرومیوں پر بھی تو دل مانا نہیں
لاکھ سمجھایا کہ اس محفل میں اب جانا نہیں
ایک دنیا منتظر ہے اور تیری بزم میں
اس طرح بیٹھے ہیں ہم جیسے کہیں جانا نہیں
آج تک اپنی بیکلی کا سبب
خود بھی جانا نہیں کہ تجھ سے کہیں
اب تو اپنا بھی اس گلی میں فرازؔ
آنا جانا نہیں کہ تجھ سے کہیں

فراق گورکھپوری

امیدوں میں بھی ان کی ایک شان بے نیازی ہے
ہر آسانی کو جو دشوار ہو جانا سمجھتے ہیں
ہمارا ذکر کیا ہم کو تو ہوش آیا محبت میں
مگر ہم قیس کا دیوانہ ہو جانا سمجھتے ہیں
فراقؔ اس گردشِ ایام سے کب کام نکلا ہے
سحر ہونے کو بھی ہم رات کٹ جانا سمجھتے ہیں
یہ کوئی یاد ہے یہ بھی ہے کوئی محویت
ترے خیال میں تجھ کو بھی بھول جانا تھا
کان بجتے ہیں محبت کے سکوت ناز کو
داستاں کا ختم ہو جانا سمجھ بیٹھے تھے ہم

قیوم نظر

رنج کی گہرائیوں کی تہہ کو پانے کے لیے
دوستوں کی دشمنی کو بھی عطا جانا کرو

کیف بھوپالی

جب ہمیں مسجد جانا پڑا ہے
راہ میں اک مے خانہ پڑا ہے

محسن احسان

مسافر ہیں ہم ایسے قافلے کے
پتہ جس کو نہیں جانا کہاں ہے

ناصر کاظمی

مجھ کو اور کہیں جانا تھا
بس یونہی رستا بھول گیا تھا
تجھ کو جانا ہی تھا لیکن
ملے بغیر ہی کیا جانا تھا