اب آ گئے ہیں تو مقتل سے بچ کے جانا کیا
عرفان صدیقی
کہیں تو لٹنا ہے پھر نقدِ جاں بچانا کیا
اب آ گئے ہیں تو مقتل سے بچ کے جانا کیا
ان آندھیوں میں بھلا کون ادھر سے گزرے گا
دریچے کھولنا کیسا، دیے جلانا کیا
جو تیر بوڑھوں کی فریاد تک نہیں سنتے
تو ان کے سامنے بچوں کا مسکرانا کیا
میں گر گیا ہوں تو اب سینے سے اتر آؤ
دلیر دشمنو، ٹوٹے مکاں کو ڈھانا کیا
نئی زمیں کی ہوائیں بھی جان لیوا ہیں
نہ لوٹنے کے لیے کشتیاں جلانا کیا
کنارِ آب کھڑی کھیتیاں یہ سوچتی ہیں
وہ نرم رو ہے ندی کا مگر ٹھکانا کیا
مفاعِلن فَعِلاتن مفاعِلن فِعْلن
مجتث مثمن مخبون محذوف مسکن