داغ دہلوی

نگۂِ یار نے کی خانہ خرابی ایسی
نہ ٹھکانا ہے جگر کا نہ ٹھکانا دل کا
دے خدا اور جگہ سینہ و پہلو کے سوا
کہ برے وقت میں ہو جائے ٹھکانا دل کا
بے دلی کا جو کہا حال تو فرماتے ہیں
کر لیا تو نے کہیں اور ٹھکانا دل کا
اپنے دل کو بھی بتاؤں نہ ٹھکانا تیرا
سب نے جانا جو پتا ایک نے جانا تیرا
تو جو اے زلف پریشان رہا کرتی ہے
کس کے اجڑے ہوئے دل میں ہے ٹھکانا تیرا
کعبہ و دیر میں یا چشم و دلِ عاشق میں
انہیں دو چار گھروں میں ہے ٹھکانا تیرا
وہ زمانہ نظر نہیں آتا
کچھ ٹھکانا نظر نہیں آتا
لے چلو مجھ کو راہروان عدم
یاں ٹھکانا نظر نہیں آتا

مصحفی غلام ہمدانی

اول تو ترے کوچے میں آنا نہیں ملتا
آؤں تو کہیں تیرا ٹھکانا نہیں ملتا

مصطفٰی خان شیفتہ

عاقبت چاہِ ذقن میں خبر اس کی پائی
مدتوں سے نہیں لگتا تھا ٹھکانا دل کا
آپ منت سے بلانے تجھے کیوں کر آؤں
غیر کے گھر میں ہے تیرا تو ٹھکانا شبِ وصل

میر مہدی مجروح

جن کے ایوان تھے ہم پلۂِ قصر قیصر
ان کی ملتا نہیں قبروں کا ٹھکانا ہرگز

عرفان صدیقی

کنارِ آب کھڑی کھیتیاں یہ سوچتی ہیں
وہ نرم رو ہے ندی کا مگر ٹھکانا کیا
آزادگاں کو خانہ خرابی کا کیا ملال
کیا موجِ گل کا کوئی ٹھکانا بھی ہوتا ہے

الطاف حسین حالی

دلی سے نکلتے ہی ہوا جینے سے دل سیر
گویا نہ رہا اب کہیں دنیا میں ٹھکانا

اسرار الحق مجاز

نہ دنیا نہ عقبیٰ کہاں جائیے
کہیں اہلِ دل کا ٹھکانا بھی ہے