داغ دہلوی

حور کی شکل ہو تم نور کے پتلے ہو تم
اور اس پر تمہیں آتا ہے جلانا دل کا
عشق در پردہ پھونکتا ہے آگ
یہ جلانا نظر نہیں آتا

شیخ ابراہیم ذوق

ذکر شمعِ حسن لانا کوئی ہم سے سیکھ جائے
ان کو درپردہ جلانا کوئی ہم سے سیکھ جائے

مصطفٰی خان شیفتہ

ہائے اس برقِ جہاں سوز پر آنا دل کا
سمجھے جو گرمیِ ہنگامہ جلانا دل کا
صبر پروانے کا مجھ پر نہ پڑے ڈرتا ہوں
ماہ رو شمع کو ہرگز نہ جلانا شبِ وصل
غیر کو رشک سے کیا آگ لگے
کہ ہوا میرا جلانا موقوف

عرفان صدیقی

ان آندھیوں میں بھلا کون ادھر سے گزرے گا
دریچے کھولنا کیسا، دیے جلانا کیا
نئی زمیں کی ہوائیں بھی جان لیوا ہیں
نہ لوٹنے کے لیے کشتیاں جلانا کیا
شعلۂ عشق بجھانا بھی نہیں چاہتا ہے
وہ مگر خود کو جلانا بھی نہیں چاہتا ہے

جمال احسانی

آنا اب اس نے چھوڑ دیا ہے اگر تو کیا
دل بے سبب چراغ جلانا بھی چھوڑ دے

غلام محمد قاصر

اڑتی ہوئی چنگاریاں سونے نہیں دیتیں
روٹھے ہوئے اس خط کو جلانا ہی نہیں تھا

جلیل مانک پوری

رات بھر میں شمعِ محفل جل بجھی
عاشقوں کا دل جلانا اور ہے

قتیل شفائی

چھا رہا ہے ساری بستی میں اندھیرا
روشنی کو، گھر جلانا چاہتا ہوں