یاں ہوا راز چھپانا موقوف
مصطفٰی خان شیفتہ
واں ہوا پردہ اٹھانا موقوف
یاں ہوا راز چھپانا موقوف
غیر کو رشک سے کیا آگ لگے
کہ ہوا میرا جلانا موقوف
ذکرِ شیریں کی اگر بندی ہے
کوہ کن کا بھی فسانہ موقوف!
اب کس امید پہ واں جائے کوئی
کہ ہوا غیر کا آنا موقوف
رمِ آہو سے وہ رم یاد آیا
دشت و صحرا میں بھی جانا موقوف
بد دماغ آج ہوا وہ گل رو
شیفتہ عطر لگانا موقوف
فاعِلاتن فَعِلاتن فِعْلن
رمل مسدس مخبون محذوف مسکن