مرزا غالب

دود کو آج اس کے ماتم میں سیہ پوشی ہوئی
وہ دلِ سوزاں کہ کل تک شمع، ماتم خانہ تھا
غم نہیں ہوتا ہے آزادوں کو بیش از یک نفس
برق سے کرتے ہیں روشن، شمعِ ماتم خانہ ہم
محفلیں برہم کرے ہے گنجفہ بازِ خیال
ہیں ورق گردانی نیرنگِ یک بت خانہ ہم
دائم الحبس اس میں ہیں لاکھوں تمنائیں اسدؔ
جانتے ہیں سینۂِ پر خوں کو زنداں خانہ ہم
رہا آباد عالم اہلِ ہمت کے نہ ہونے سے
بھرے ہیں جس قدر جام و سبو، مے خانہ خالی ہے

بہادر شاہ ظفر

تھا جلانا ہی اگر دوری ساقی سے مجھے
تو چراغ در مے خانہ بنایا ہوتا

حیدر علی آتش

تونگروں کو مبارک ہو شمع کافوری
قدم سے یار کے روشن غریب خانہ ہوا
بھرا ہے شیشۂ دل کو نئی محبت سے
خدا کا گھر تھا جہاں واں شراب خانہ ہوا
خدا کے واسطے کر یار چین ابرو دور
بڑا ہی عیب لگا جس کماں میں خانہ ہوا
دکھائی چشمِ غزالاں نے حلقۂِ زنجیر
ہمیں تو گوشۂِ صحرا بھی قید خانہ ہوا
چاروں طرف سے صورت جاناں ہو جلوہ گر
دل صاف ہو ترا تو ہے آئینہ خانہ کیا
اس میں رہتا ہے صفائے روئے جاناں کا خیال
دل نہیں پہلو میں اپنے آئینہ کا خانہ ہے
شب اس کے افعیِ گیسو کا جو فسانہ ہوا
ہوا کچھ ایسی بندھی گل چراغ خانہ ہوا
تماشا گاہ ہستی میں عدم کا دھیان ہے کس کو
کسے اس انجمن میں یاد خلوت خانہ آتا ہے
زیارت ہو گی کعبہ کی یہی تعبیر ہے اس کی
کئی شب سے ہمارے خواب میں بت خانہ آتا ہے
دل قصر شہنشہ ہے وہ شوخ اس میں شہنشاہ
عرصہ یہ دو عالم کا جلو خانہ ہے اس کا

داغ دہلوی

مجھے اے اہل کعبہ یاد کیا مے خانہ آتا ہے
ادھر دیوانہ جاتا ہے ادھر مستانہ آتا ہے

شیخ ابراہیم ذوق

دود دل سے ہے یہ تاریکی مرے غم خانہ میں
شمع ہے اک سوزن گم گشتہ اس کاشانہ میں
میں ہوں وہ خشت کہن مدت سے اس ویرانے میں
برسوں مسجد میں رہا برسوں رہا مے خانہ میں
ہوش کا دعویٰ ہے بے ہوشوں کو زیر آسماں
خم نشیں مثل فلاطوں سب ہیں اس خم خانہ میں
پتھروں میں ٹھوکریں کھاتا ہے ناحق سیل آب
پوچھو کیا لے جائے گا آ کر مرے غم خانہ میں
ایک پتھر پوجنے کو شیخ جی کعبے گئے
ذوقؔ ہر بت قابل بوسہ ہے اس بت خانہ میں

مصحفی غلام ہمدانی

جو آئے ہے جھک کے جائے ہے وہ
گویا کہ شراب خانہ ہے یاں

یگانہ چنگیزی

روشن تمام کعبہ و بت خانہ ہو گیا
گھر گھر جمالِ یار کا افسانہ ہو گیا

جگر مراد آبادی

جان کر من جملۂ خاصان مے خانہ مجھے
مدتوں رویا کریں گے جام و پیمانہ مجھے
ننگ مے خانہ تھا میں ساقی نے یہ کیا کر دیا
پینے والے کہہ اٹھے یا پیرِ مے خانہ مجھے

خواجہ میر درد

مدرسہ یا دیر تھا یا کعبہ یا بت خانہ تھا
ہم سبھی مہمان تھے واں تو ہی صاحبِ خانہ تھا
ہو گیا مہماں سرائے کثرت موہوم آہ!
وہ دل خالی کہ تیرا خاص خلوت خانہ تھا

سراج الدین ظفر

رہین بیم ہستی ہے دلِ دیوانہ برسوں سے
ہوا کی زد میں ہے اپنا چراغ خانہ برسوں سے

عبدالحمید عدم

ذکر اس کا گفتگو میں جو شامل ہوا عدمؔ
جو شعر کہہ دیا وہ پری خانہ بن گیا

قمر جلالوی

کچھ تو کہہ دے کیا کریں اے ساقی مے خانہ ہم
اپنی توبہ توڑ دیں یا توڑ دیں پیمانہ ہم
سرِ راہ کیسے سوجھی تجھے ہجوِ مئے کی واعظ
نہ یہاں ہے تیری نہ مرا شراب خانہ
کہیں میکشوں سے ساقی نہ نگاہ پھیر لینا
کہ انہیں کے دم سے قائم ہے ترا شراب خانہ
دل عجب شے ہے یہ پھر کہتے ہیں آزادانہ ہم
چاہے جب کعبہ بنا لیں چاہے جب بت خانہ ہم
اگر چھوٹا بھی اس سے آئینہ خانہ تو کیا ہو گا
وہ الجھے ہی رہیں گے زلف میں شانہ تو کیا ہو گا

عرفان صدیقی

اک ہوا آئی کہ برہم ہوا مے خانۂ لب
اب تک آیا بھی نہیں تھا ابھی پیمانۂ لب
خاک اڑتی ہے سینے میں بہت رقص نہ فرما
صحرا سے مری جان پری خانہ اٹھا لے

احسان دانش

کرتے کرتے امتزاج کعبہ و بت خانہ ہم
اس جگہ پہنچے کہ ہو کر رہ گئے دیوانہ ہم

اختر شیرانی

بادل کے اٹھتے ہی مے و پیمانہ آ گیا
بجلی کے ساتھ ساتھ پری خانہ آ گیا
مستوں نے اس ادا سے کیا رقص نو بہار
پیمانہ کیا کہ وجد میں مے خانہ آ گیا
اخترؔ غضب تھی عہدِ جوانی کی داستاں
آنکھوں کے آگے ایک پری خانہ آ گیا
اس طرح ریل کے ہم راہ رواں ہے بادل
ساتھ جیسے کوئی اڑتا ہوا مے خانہ چلے
گرچہ تنہا تھے مگر ان کے تصور کے نثار
اپنے ہمراہ لیے ایک پری خانہ چلے

بہزاد لکھنوی

کفر سے یہ التجائیں کر رہا ہوں بار بار
جاؤں تو کعبہ مگر رخ سوئے مے خانہ رہے
آخر کوئی صورت بھی تو ہو خانۂ دل کی
کعبہ نہیں بنتا ہے تو بت خانہ بنا دے

علی سردار جعفری

مستی رندانہ ہم سیرابی مے خانہ ہم
گردشِ تقدیر سے ہیں گردش پیمانہ ہم
کیا بلا جبر اسیری ہے کہ آزادی میں بھی
دوش پر اپنے لیے پھرتے ہیں زنداں خانہ ہم
یاد کرتا تھا ہمیں ساقی و مینا کا ہجوم
اٹھ گئے تھے جو کبھی رونق مے خانہ لیے

جلیل مانک پوری

راحت نہ مل سکی مجھے مے خانہ چھوڑ کر
گردش میں ہوں میں گردش پیمانہ چھوڑ کر
خم میں سبو میں جام میں نیت لگی رہی
مے خانے ہی میں ہم رہے مے خانہ چھوڑ کر
یاد آئی کس کی آنکھ کہ رند اٹھ کھڑے ہوئے
پیمانہ توڑ کر مے و مے خانہ چھوڑ کر
دنیا میں عافیت کی جگہ ہے یہی جلیلؔ
جانا کہیں نہ گوشۂ مے خانہ چھوڑ کر
کہاں ہم اور کہاں اب شراب خانۂ عشق
نہ وہ دماغ نہ وہ دل نہ وہ زمانۂ عشق
خیال رخ پہ ہے موقوف دل کی آبادی
کبھی نہ گل ہو الٰہی چراغِ خانۂ عشق
گئی دماغ میں جس کے کیا اسیر اسے
عجب کمند ہے بوئے شراب خانۂ عشق
چمک کے داغ یہ کہتا ہے دل کی آہوں سے
ہوا سے بجھ نہیں سکتا چراغِ خانۂ عشق

جوش ملیح آبادی

آؤ کعبے سے اٹھیں سوئے صنم خانہ چلیں
تابع فقر کہے صولت شاہانہ چلیں

سیماب اکبر آبادی

ہستی کو مری مستیِ پیمانہ بنا دے
اے بے خبری حاصل مے خانہ بنا دے
اے برہمن اک دن بتِ پندار کو اپنے
توڑ اور چراغ در بت خانہ بنا دے
ضبط سے نا آشنا ہم صبر سے بیگانہ ہم
کیوں کسی سے مانگتے جائیں چراغ خانہ ہم

شاد عظیم آبادی

کعبہ بھی ہے ٹوٹا ہوا بت خانہ ہمارا
یا رب رہے آباد یہ ویرانہ ہمارا
باطن کی طرح پاک ہے خم خانہ ہمارا
کیوں کر نہ اچھوتا رہے پیمانہ ہمارا

شکیل بدایونی

دیکھنا دیکھنا یہ حضرتِ واعظ ہی نہ ہوں
راستہ پوچھ رہا ہے کوئی مے خانہ کا
ہے گردش ساغر مری تقدیر کا چکر
محتاج طوافِ در مے خانہ نہیں ہوں
راہِ خدا میں عالم رندانہ مل گیا
مسجد کو ڈھونڈتے تھے کہ مے خانہ مل گیا

عزیز حامد مدنی

اس کے پیکر کی جھلک راہوں پہ تھی نزدیک و دور
کل غروب مہر تھا اک آئینہ خانہ مجھے

احمد فراز

اس ایک شکل میں کیا کیا نہ صورتیں دیکھیں
نگار تھا نظر آیا نگار خانہ وہ

امیر مینائی

جادۂ راہِ عدم ہے رہِ کاشانۂ عشق
ملکُ الموت ہیں دربان درِ خانۂ عشق
کم بلندی میں نہیں عرش سے کاشانۂ عشق
دونوں عالم ہیں دو مصراع درِ خانۂ عشق
ہے جو واللیل سرا پردۂ کاشانۂ عشق
سورۂ شمس ہے قندیل درِ خانۂ عشق
ہوں وہ دیوانہ کہ قدموں سے لگا ہے مرے حسن
ہے مرے پانوں میں زنجیر پری خانۂ عشق

کلیم عاجز

ہم نے ساقی کو بھی دیکھا پیرِ مے خانہ کو بھی
کوئی بھی ان میں نہ راز آگاہ مے خانہ ملا
سروں کے خم صراحی گردنوں کی جام زخموں کے
مہیا جب یہ ہو لیتے ہیں تب مے خانہ بنتا ہے
ہمیں تو فکرِ دل سازی کی ہے دل ہے تو دنیا ہے
صنم پہلے بنا دیں پھر صنم خانہ بنا دیں گے
نہ جانے کتنے دل بن جائیں گے اک دل کے ٹکڑے سے
وہ توڑیں آئنہ ہم آئنہ خانہ بنا دیں گے

کیف بھوپالی

جب ہمیں مسجد جانا پڑا ہے
راہ میں اک مے خانہ پڑا ہے

کیفی اعظمی

لائی پھر اک لغزشِ مستانہ تیرے شہر میں
پھر بنیں گی مسجدیں مے خانہ تیرے شہر میں

مجروح سلطان پوری

سرخی مے کم تھی میں نے چھو لیے ساقی کے ہونٹ
سر جھکا ہے جو بھی اب ارباب مے خانہ کہیں

محسن احسان

ہر ایک سمت کھڑی ہیں بلند دیواریں
تمام شہر نظر آئے قید خانہ ہمیں
نگاہ پڑتی ہے پھر کیوں پرائی شمعوں پر
اگر عزیز ہے محسنؔ چراغ خانہ ہمیں

ناصر کاظمی

آج غربت میں بہت یاد آیا
اے وطن تیرا صنم خانۂ گل

نوح ناروی

کیا ذکرِ چمن کیا فکرِ چمن کیا ذوق چمن کیا شوق چمن
داغوں سے ہمارا خانۂ دل ہے دولت خانہ پھولوں کا