حیدر علی آتش

شعر ڈھلتے ہیں مری فکر سے آج اے آتشؔ
مر کے کل گور کے سانچے میں میں ڈھل جاؤں گا

شیخ ابراہیم ذوق

وہ صبح کو آئے تو کروں باتوں میں دوپہر
اور چاہوں کہ دن تھوڑا سا ڈھل جائے تو اچھا

مومن خان مومن

کیا روؤں خیرہ چشمی بخت سیاہ کو
واں شغل سرمہ ہے ابھی یاں سیل ڈھل گیا

فیض احمد فیض

بزمِ خیال میں ترے حسن کی شمع جل گئی
درد کا چاند بجھ گیا، ہجر کی رات ڈھل گئی
جاؤ اب سو رہو ستارو
درد کی رات ڈھل چلی ہے

باقی صدیقی

اپنی دھوپ میں بھی کچھ جل
ہر سائے کے ساتھ نہ ڈھل
اشکوں میں خیال ڈھل رہے ہیں
بجھ بجھ کے چراغ جل رہے ہیں

جون ایلیا

دھوپ یعنی کہ زرد زرد اک دھوپ
لال قلعے سے ڈھل گئی ہو گی

عرفان صدیقی

تجھی پہ ختم ہے جاناں مرے زوال کی رات
تو اب طلوع بھی ہو جا کہ ڈھل رہا ہوں میں

ادا جعفری

سانچے میں خبر کے ڈھل رہی تھی
اک خواب کی لو سے جل رہی تھی
کلیوں کو نشان رہ دکھا کر
مہکی ہوئی رات ڈھل رہی تھی

بیان میرٹھی

ٹھہر اے مہر ذرا صبح شب وصل ہے آج
بام پر دھوپ چڑھے گی تو میں ڈھل جاؤں گا

ضیا جالندھری

ترا غم کاکلیں کھولے ہوئے ہے
مرے سینے میں شامیں ڈھل رہی ہیں

ظہیر کاشمیری

ہر بزم اس نگاہ کے گرداب میں رہی
ہر دور اس مزاج کے سانچے میں ڈھل گیا

عبید اللہ علیم

ہر ایک لحظہ یہی آرزو یہی حسرت
جو آگ دل میں ہے وہ شعر میں بھی ڈھل جائے

غلام محمد قاصر

دل میں خیمہ زن اندھیرو کتنی جلدی میں ہے سورج
جسم تک جاگے نہیں ہیں اور سائے ڈھل رہے ہیں

جلیل مانک پوری

ساقی تری شراب جو شیشے میں تھی پڑی
ساغر میں آ کے اور بھی سانچے میں ڈھل گئی

ثروت حسین

تنہائی کے الاؤ سے روشن ہوا مکاں
ثروتؔ جو دل کا درد تھا نغموں میں ڈھل گیا

سلام مچھلی شہری

ہوا زمانے کی ساقی بدل تو سکتی ہے
حیات ساغر رنگیں میں ڈھل تو سکتی ہے

شکیل بدایونی

غمِ عشق رہ گیا ہے غم جستجو میں ڈھل کر
وہ نظر سے چھپ گئے ہیں مری زندگی بدل کر

عزیز حامد مدنی

ہری شمعیں سی انگوروں کی بیلوں میں جو چمکیں تھیں
وہی اب سرخ رنگوں میں جلی ہیں جام میں ڈھل کر

اختر ہوشیارپوری

مٹی میں ابھی نمی بہت ہے
پیمانے ہنوز ڈھل رہے ہیں
کہہ دے یہ کوئی مسافروں سے
شام آئی ہے سائے ڈھل رہے ہیں

احمد فراز

ابھی ابھی تو جدائی کی شام آئی تھی
ہمیں عجیب لگا زندگی کا ڈھل جانا
یہ کیا کہ تو بھی اسی ساعتِ زوال میں ہے
کہ جس طرح ہے سبھی سورجوں کو ڈھل جانا
یہ قرب کیا ہے کہ یک جاں ہوئے نہ دور رہے
ہزار ایک ہی قالب میں ڈھل کے دیکھتے ہیں

فراق گورکھپوری

کڑے ہیں کوس بہت منزل محبت کے
ملے نہ چھاؤں مگر دھوپ ڈھل تو سکتی ہے
یہ زور و شور سلامت تری جوانی بھی
بقول عشق کے سانچے میں ڈھل تو سکتی ہے

مجروح سلطان پوری

وہی بات جو وہ نہ کہہ سکے مرے شعر و نغمہ میں آ گئی
وہی لب نہ میں جنہیں چھو سکا قدح شراب میں ڈھل گئے

ناصر کاظمی

رات ڈھل رہی ہے
ناؤ چل رہی ہے