حیدر علی آتش

ہے جو حیران صفائے رخ حلب میں آئینہ
بوئے زلفِ یار سے آہو ختن میں مست ہے

شیخ ابراہیم ذوق

دکھلا نہ خال ناف تو اے گل بدن مجھے
ہر لالہ یاں ہے نافۂِ مشکِ ختن مجھے
آ کر اسے بھی دو کبھی آنکھیں ذرا دکھا
آنکھیں دکھا رہا ہے غرال ختن مجھے

سراج الدین ظفر

در مے خانہ سے دیوارِ چمن تک پہنچے
ہم غزالوں کے تعاقب میں ختن تک پہنچے
اس طرح شوق غزالاں میں غزل خواں ہو ظفر
شہرت مشک غزل شہر ختن تک پہنچے

عرفان صدیقی

تیرے وحشی نے گرفتاری سے بچنے کے لیے
رم کیا اتنا کہ آہوئے ختن لگنے لگا
پہاڑ چپ ہیں تو اب ریگ زار بولتے ہیں
ندائے کوہ ختن کی طرف سے آتی ہے
وحشت کے لیے شہر مناسب نہیں ورنہ
آہو تو مری جان ختن میں بھی وہی ہے
ایک دن تو بھی مری فکر کے تاتار میں آ
تیرا گھر اے مرے آہوئے ختن، وہ بھی ہے

مجید امجد

اک جست اس طرف بھی غزالِ زمانہ رقص
رہ تیری دیکھتے ہیں خطا و ختن پڑے

الطاف حسین حالی

فیصلہ گردشِ دوراں نے کیا ہے سو بار
مرو کس کا ہے بدخشان و ختن کس کا ہے

علی سردار جعفری

تصور جس سے رنگیں ہے تخیل جس سے رقصاں ہے
غزال ہند و آہوئے ختن کی یاد آتی ہے