داغ دہلوی

کیا تصور ہے نہایت مجھے حیرت آئی
آئنے میں بھی نظر تیری ہی صورت آئی

باقی صدیقی

وہ نظر آئنہ فطرت ہی سہی
مجھے حیرت ہے تو حیرت ہی سہی

جون ایلیا

بابا الف ارشاد کناں ہیں پیش عدم کے بارے میں
حیرت بے حیرت برپا ہے اللٰہ ہو کے باڑے میں

عرفان صدیقی

ہوتی ہے یہی مصحف ناطق کی نشانی
نیزے پہ بھی سر بولے تو حیرت نہیں کرتے
اس زمیں پر مرے یکتا ترے تمثال بہت
آئینہ خانے میں آیا ہے تو حیرت کیسی
ہم عبث دیکھتے ہیں غرفۂ خالی کی طرف
یہ بھی کیا کوئی تماشا ہے کہ حیرت کی جائے

جمال احسانی

کبھی یہ آنکھیں خود بھی اڑا کرتی تھیں پتنگ کے ساتھ
دور دریچے سے ہوتے تھے اشارے حیرت والے

بیان میرٹھی

نگہ بے حس خط ساغر کی صورت ہے کہ ساقی نے
دیا ہے مردم چشم جہاں کو جام حیرت کا

جلیل مانک پوری

دیکھتا میں اسے کیوں کر کہ نقاب اٹھتے ہی
بن کے دیوار کھڑی ہو گئی حیرت میری

جوش ملیح آبادی

اس کا اک ادنیٰ کرشمہ روح وہ اتنا عجیب
عقل استعجاب میں ہے فلسفہ حیرت میں ہے

حسرت موہانی

اے شوق کی بیباکی وہ کیا تیری خواہش تھی
جس پر انہیں غصہ ہے انکار بھی حیرت بھی

شکیل بدایونی

نہ کیوں ہوں اس ادا پر عشق کی خودداریاں صدقے
انہیں رودادِ غم سن سن کے حیرت ہوتی جاتی ہے

اقبال ساجد

اس آئنے میں دیکھنا حیرت بھی آئے گی
اک روز مجھ پہ اس کی طبیعت بھی آئے گی