داغ دہلوی

زاہد نہ کہہ بری کہ یہ مستانے آدمی ہیں
تجھ کو لپٹ پڑیں گے دیوانے آدمی ہیں
محفل بھری ہوئی ہے سودائیوں سے اس کی
اس غیرت پری پر دیوانے آدمی ہیں

مصحفی غلام ہمدانی

لگتے ہیں نت جو خوباں شرمانے باؤلے ہیں
ہم لوگ وحشی خبطی دیوانے باؤلے ہیں

فیض احمد فیض

اب کسی لیلیٰ کو بھی اقرارِ محبوبی نہیں
ان دنوں بدنام ہے ہر ایک دیوانے کا نام

یگانہ چنگیزی

اہلِ دل مست ہوئے پھیل گئی بوئے وفا
پیرہن چاک ہوا جب ترے دیوانے کا
سرِ شوریدہ کجا عشق کی بیگار کجا
مگر اللٰہ رے دل آپ کے دیوانے کا
دیکھ کر آئنے میں چاکِ گریباں کی بہار
اور بگڑا ہے مزاج آپ کے دیوانے کا
کیا عجب ہے جو حسینوں کی نظر لگ جائے
خون ہلکا ہے بہت آپ کے دیوانے کا
دامن بادِ بہاری ہے گریباں پہ نثار
آتی ہے بوئے محبت ترے دیوانے سے

باقی صدیقی

تیز ہوتا ہے جنوں اور بھی سمجھانے سے
کیا توقع کرے دنیا ترے دیوانے سے
کوئی دنیا سے شکایت تو نہیں
کون پوچھے ترے دیوانے سے
چلے ہیں ایک زمانے کے بعد دیوانے
عجب نہیں ترا در بھی نہ ان کو پہچانے
ادا شناس نگاہیں بھی کھا گئیں دھوکا
یہ کس لباس میں نکلے ہیں تیرے دیوانے

قمر جلالوی

حسن سے رسوا نہ ہو گا اپنے دیوانے کا نام
شمعِ رو دے گی مگر نہ لے گی پروانے کا نام
لے کے اپنے ساتھ اک خاموش دیوانے کو ہم
جا رہے ہیں حضرتِ ناصح کو سمجھانے کو ہم
وہ مہتمم ہیں جہاں بھی گئے دیوانے
صراحی جھک گئی اٹھے ادب سے پیمانے
زمینِ عشق میں ہیں دفن وہ بھی دیوانے
نہ جن کے نام کی شہرت نہ جن کے افسانے
کسے سمجھا رہے ہیں آپ سمجھانے سے کیا ہو گا
بجز صحرا نوردی اور دیوانے سے کیا ہو گا
بگولے مجھ سے کوسوں دور بھاگے دشتِ وحشت میں
بس اتنا میں نے پوچھا تھا کہ دیوانے پہ کیا گزری

عبید اللہ علیم

تیرے پیار میں رسوا ہو کر جائیں کہاں دیوانے لوگ
جانے کیا کیا پوچھ رہے ہیں یہ جانے پہچانے لوگ
آگے پیچھے دائیں بائیں سائے سے لہراتے ہیں
دنیا بھی تو دشتِ بلا ہے ہم ہی نہیں دیوانے لوگ

فارغ بخاری

حواس لوٹ لیے شورش تمنا نے
ہری رتوں کے لیے بن گئے ہیں دیوانے

احمد راہی

دیکھیں اب رہتا ہے کس کس کا گریباں ثابت
چاک دل لے کے تری بزم سے دیوانے چلے

خاطر غزنوی

خلق کی تہمت سے چھوٹے سنگ طفلاں سے بچے
خوب تھے وہ لوگ جو خود اپنے دیوانے ہوئے
اپنی صورت میں بھی خاطرؔ ایک گونہ سحر تھا
آئنہ خانوں میں فرزانے بھی دیوانے ہوئے

سیف الدین سیف

کوئی نہیں آتا سمجھانے
اب آرام سے ہیں دیوانے
طے نہ ہوئے دل کے ویرانے
تھک کر بیٹھ گئے دیوانے
بن نہ سکی احباب سے اپنی
وہ دانا تھے ہم دیوانے

سیماب اکبر آبادی

وہ کہتا تھا خدا جانے بہار آئے تو کیا گزرے
خدا جانے بہار آئی تو دیوانے پہ کیا گزری

شاد عظیم آبادی

کچھ کہے جاتا تھا غرق اپنے ہی افسانے میں تھا
مرتے مرتے ہوش باقی تیرے دیوانے میں تھا
ہائے وہ خود رفتگی الجھے ہوئے سب سر کے بال
وہ کسی میں اب کہاں جو تیرے دیوانے میں تھا
پاس تھا زنجیر تک کا طوق پر کیا منحصر
وہ کسی میں اب کہاں جو تیرے دیوانے میں تھا

شکیل بدایونی

بے تعلق ترے آگے سے گزر جاتا ہے
یہ بھی اک حسنِ طلب ہے ترے دیوانے کا

فانی بدایونی

خلق کہتی ہے جسے دل ترے دیوانے کا
ایک گوشہ ہے یہ دنیا اسی ویرانے کا
اک معمہ ہے سمجھنے کا نہ سمجھانے کا
زندگی کاہے کو ہے خواب ہے دیوانے کا
ہڈیاں ہیں کئی لپٹی ہوئی زنجیروں میں
لیے جاتے ہیں جنازہ ترے دیوانے کا
ہم نے چھانی ہیں بہت دیر و حرم کی گلیاں
کہیں پایا نہ ٹھکانا ترے دیوانے کا

فراق گورکھپوری

ہوش و خرد کیا جوش جنوں کیا الٹی گنگا بہتی ہے
کیا فرزانے کیسے سیانے یارو سب دیوانے ہیں
جن کی زندگی دامن تک ہے بے چارے فرزانے ہیں
خاک اڑاتے پھرتے ہیں جو دیوانے دیوانے ہیں

قابل اجمیری

وہ کب آئیں خدا جانے ستارو تم تو سو جاؤ
ہوئے ہیں ہم تو دیوانے ستارو تم تو سو جاؤ
گزر جائے گی غم کی رات امیدو تو جاگ اٹھو
سنبھل جائیں گے دیوانے ستارو تم تو سو جاؤ

قتیل شفائی

وہ پھول سے لمحے بھاری ہیں اب یاد کے نازک شانوں پر
جو پیار سے تم نے سونپے تھے آغاز میں اک دیوانے کو
تمہاری انجمن سے اٹھ کے دیوانے کہاں جاتے
جو وابستہ ہوئے تم سے وہ افسانے کہاں جاتے

کلیم عاجز

ہے انہیں دو ناموں سے ہر ایک افسانے کا نام
ایک تیرا نام ہے اک تیرے دیوانے کا نام
پھول توڑے کوئی پتھر ہم کو مارا جائے ہے
تو نے اتنا کر دیا بدنام دیوانے کا نام
رہے گا سلسلہ دار و رسن کا
جہاں دو چار دیوانے رہیں گے
خرد زنجیر پہناتی رہے گی
جو دیوانے ہیں دیوانے رہیں گے

میرا جی

پہلے تیرا دیوانہ تھا اب ہے اپنا دیوانہ
پاگل پن ہے ویسا ہی کچھ فرق نہیں دیوانے میں

ناصر کاظمی

گرفتہِ دل ہیں بہت آج تیرے دیوانے
خدا کرے کوئی تیرے سوا نہ پہچانے
خیال آ گیا مایوس رہگزاروں کا
پلٹ کے آ گئے منزل سے تیرے دیوانے